ဘာလဲဟဲ့ အာဇာနည်
Tuesday, August 7, 2007
မောင်စွမ်းရည်
ကျနော်ကအညာသားပါ။ ရန်ကုန်ကိုပြောင်းလာတော့ အညာကဧည့်သည်တွေလာရင် အဓိကလိုက်ပို့ရတာက ရွှေတိဂုံဘုရားကြီး၊ ရွှေတိဂုံရောက်ရင် ဒါကအာဇာနည်ဗိမာန်၊ ဟိုဟာက အမျိုးသားနေ့အထိမ်းအမှတ်(ပထမကောလိပ်သပိတ်)ကျောက်တိုင်၊ ဟိုဟာက သခင် ကိုယ်တော် မှိုင်းဂူဗိမာန်၊ အဲဒီနားက အချန်အတက်နဲ့အုတ်ဂူက သီပေါမဟေသီ စုဘုရားလတ်ရဲ့အုတ်ဂူ၊ ဒီဘက် ကတော့ ဗိုလ်ချုပ်အောင်ဆန်းကတော် ဒေါ်ခင်ကြည်ရဲ့အုတ်ဂူဆိုပြီး ပြောပြရတယ်။ သမိုင်းဝင် အထိမ်း အမှတ်ဖြစ်နေလို့ အစီစဉ်လိုက်ပြောရမယ်ဆိုရင် ပါတော်မူကစပြီး အမျိုးသားနေ့သမိုင်းကို အောင်ဆန်းတို့ရဲ့ ၁၉၃၆ သပိတ်နဲ့ ၁၉၃၈ သပိတ်သမိုင်း၊ လွတ်လပ်ရေးသမိုင်းနဲ့ ဒီမိုကရေစီ တိုက်သမိုင်းအထိ(၁၈၈၅ ခုနှစ် ၁၉၈၈ ထိ) ခေတ်သစ်ဗမာနိုင်ငံ သမိုင်းကြီးတခုလုံးပါဝင်နေတာကို တွေ့ရပါမယ်။
ရွှေတိဂုံဘုရားကိုလဲ ကမာရွတ်ကနေ ဘတ်စ်ကားနဲ့သွားရင် ရွှေတိဂုံဘုရားကုန်းဆီဦး တိုက်တဲ့ မြောက်ဖက်ကလမ်းကနေ အာဇာနည်ကုန်းကိုဖြတ်သွားရတဲ့လမ်းကို ကျနော်ရွေးလေ့ ရှိပါတယ်။ ပြည်ပကိုထွက်မလာခင်တရက်မှာ အဲဒီခရီးစဉ်အတိုင်းတက်ကြဖို့ အညာကဧည့်သည် တွေ ကို ခေါ်သွားခဲ့တယ်။ အာဇာနည်ဗိမာန် အရှေ့ဘက်ဦးခေါင်းရင်း ထိပ်တည့်တည့် ရောက်တော့ အာဇာနည်ကုန်းကို ၀င်းခြံခတ်ထားတဲ့ သံဝင်းထရံနားကိုကပ်သွားလိုက်တယ်။ ကပ်သွားခိုက်မှာပဲ သေနတ်ထမ်းလာတဲ့ စစ်သားတယောက်က လက်ဆန့်ခြေဆန့်နဲ့ တခွပ်ခွပ် လမ်းလျောက်လာ တယ်။ အနှေးလျောက်ပုံစံပေါ့။ အရင်ကတော့ အဲလိုစစ်သားအစောင့် မရှိဘူး။ နောက်မှသတိရ လိုက်တယ်။ ဒီဘက်မှာဗိမာန်တခု တိုးထားတာကိုး။
“ဒီဘက်ဟာက” အညတြစစ်သည်ဗိမာန်လို့ခေါ်တယ်။ ဒါက ခုမှတို့ဖြည့်ထည့်ထားတာ လို့ ပြောပြလိုက်တယ်။ ဒီမှာတင် အနှေးလျောက်စစ်သားကြီးက“မဟုတ်ဘူး၊ ဒါသူရဲကောင်း စစ်သည် ဗိမာန်”တဲ့။ မျက်နှာထားကြီးနဲ့အော်လိုက်တာ အားလုံးလိပ်ပြာစင်သွားမတတ်ပါပဲ။ “ပြည်သူချဉ် သော စစ်သားကြီး”၊ “ပျိုတိုင်းကြောက်တဲ့ပဒိုင်းပွင့်ကြီး”လို့ စိတ်ထဲကပဲကျိန်ဆဲ လိုက်တယ်။ နှုတ်က တော့ “သြ မသိလို့ပါခင်ဗျာ”လို့ ကျောင်းဆရာအကျင့်ပါနေတဲ့ အောက်ကြို့သံနဲ့ တောင်းပန်လိုက်ရ ပါတယ်။ သူအတော်လေးဝေးသွားမှ ခပ်လှမ်းလှမ်းအနိမ့်ဘက်ရွှေ့ထားတဲ့ အာဇာနည်ဗိမာန်ကို လှမ်းပြရပါတယ်။ မြောက်ကိုရီယားက အကြမ်းဖက်သမားတွေ လာရောက်ဗုံးခွဲခဲ့တဲ့ နောက်ကြောင်း ရာဇ၀င်လဲ ပြောပြလိုက်ရပါတယ်။
မြောက်ကိုရီးယားထောက်လှမ်းရေးသမားတွေဟာ အလွန်ညံ့ပါတယ်။ သူတို့က အာဇာ နည်နေ့မှာ ဗမာထိပ်တန်း ခေါင်းဆောင်တွေက အာဇာနည်ကျေးဇူးရှင်တွေကို မမေ့မလျော့ လာရောက် ဂါဝရပြုကြမယ်လို့ ထင်ထားပုံရပါတယ်။ ဗမာပြည် စစ်အာဏာရှင်တွေမှာ ဂါဝရ နိဝါတ တရားမရှိကြတော့ဘူး။ ဗိုလ်နေ၀င်းတို့တခါမှ အလေးမပြုဖူးဘူး။ ဗိုလ်ချုပ်အောင်ဆန်းဆိုတာ လွတ်လပ်ရေးဖခင်၊ တပ်မတော်ရဲ့ဖခင်ဆိုတာ မေ့ပစ်ချင်ကြတယ်။ ပြည်သူတွေကိုလဲ ကျေးဇူးမေ့ဖို့ ဇွတ်လုပ်နေတယ်။ ဒါကို ကိုရီးယားတို့မသိ၊ အရင်ကတော့ အောင်ဆန်းပုံကိုငွေ တကျပ်တန်မှာပဲ ချန်ထားတယ်။ အောင်ဆန်းကို သူတောင်းစားရဲ့ခွက်ထဲမှာပဲ မြင်ခွင့်ရအောင် လုပ်ခဲ့ရာကခုတော့ လုံးဝဖျောက်ပစ်ကြပြီး ပျဉ်းမနားကြက်ပြေးမှာ အောင်ဆန်းကြေးရုပ်၊ အောင်ဆန်းဈေး၊ အောင်ဆန်း လမ်းဆိုတာ တွေ့ရှိမှာမဟုတ်ဘူး။ လမ်းဆုံလမ်းမ လမ်းလေးခွမှာ ဗိုလ်ချုပ်မှူးကြီးသန်းရွှေရဲ့ ကြေးရုပ်ကို အီရတ်မှာ ဆတ်ဒန်ဟူစိန်ကြေးရုပ်လို လုပ်ထားလား မသိဘူး။ (လုပ်ထားရင်ကောင်း မယ်၊ နောင်အခါ လည်ပင်းကြိုးကွင်းစွပ်ပြီး ဆွဲဖြိုချရတာပေါ့။)
တကယ်တော့ သခင်ကိုယ်တော်မှိုင်း၊ ဗိုလ်ချုပ်အောင်ဆန်း၊ ဦးသန့်တိုလို ပုဂ္ဂိုလ်တွေရဲ့ အုပ်ဂူတွေ၊ ကျောက်ရုပ်၊ ကြေးရုပ်တွေဟာ လမ်းဆုံတကာမှာရှိနေရမှာပါ။ ခုတော့ ရှိပြီးသား တွေကိုတောင် လိုက်ဖျက်နေကြလေရဲ့။ အာဇာနည်ဆိုတဲ့ဂုဏ်ရော အလွန်ပဲမနာလိုဖြစ်နေ ဟန်ရှိ ပါတယ်။ ကျနော်တို့ မန္တလေးမှာဆိုရင် အာဇာနည်ဗိမာန် ရှိနေတာကို လူမသိကြတော့ဘူး။ ခုအာဇာနည်လမ်းခေါ်တဲ့ ၂၆ ဘီလမ်းပေါ်မှာ ၁၉၃၈ ခုနှစ်သပိတ်၊ ၁၃၀၀ ပြည့်အရေးတော်ပုံ ကာလက ချီတက်ဆန္ဒပြလာကြတဲ့ သံဃာတော်၊ ကျောင်းသားတွေကို အင်္ဂလိပ်အရေးပိုင်က သေနတ်နဲ့ပစ်သတ်တားဆီးခဲ့လို့ အာဇာနည် ၁၇ ဦးကျဆုံးခဲ့ရတယ်။ ၁၂ နှစ်ရွယ် ကျောင်းသား လေးမောင်တင်အောင်ဆိုတာ ရောင်ပေစူးလေးနဲ့ပါ။ ရန်ကုန်မှာ ဗိုလ်အောင်ကျော် တယောက် အသက်ပေးခဲ့တာကို မန္တလေးက ၁၇ ယောက်ဆက်လက်အသက်ပေးခဲ့ပါတယ်။ အဲဒီဂူဗိမာန် ကို ခုအခါ ချုံနွယ်ပိပ္ပေါင်းနဲ့ မြင်မကောင်းအောင်ဖြစ်နေပါပြီ။ မန္တလေးနဲ့အမရပူရသွားလမ်းဘေး မှာရှိတာကိုတောင် လူမသိတော့ပါဘူး။ အဲဒီတုံးက“တပ်မတော်”ဆိုတာ တကောင်တမြီးမှ မရှိသေး ဘူး။ သံဃာနဲ့ကျောင်းသားတွေကပဲ အသက်စွန့်ခဲ့ကြတာလေး။ ခုတော့ သူတို့စစ်သား တွေသာလျှင် နိုင်ငံရဲ့ကျေးဇူးရှင်တဲ့။ နိုင်ငံအုပ်ချုပ်ရေးမှာ သူတို့ပါမှဖြစ်မှာတဲ့။
လွတ်လပ်ရေးရခါနီး ၁၉၄၇ ဂျူလိုင် ၁၉ မှာ ကျဆုံးခဲ့တာ အာဇာနည်အားလုံး ၉ ဦးပါ။ အဓိကလုပ်ကြံတာကတော့ ဖဆပလဥက္ကဠဦးအောင်ဆန်းကိုပါ။ စစ်ဗိုလ်တွေမပါဘူး။ ဂဠုန်စောက ပုဂ္ဂိုလ်ရေးမနာလိုမှုနဲ့လုပ်ကြံခဲ့တဲ့ ဒဏ်ရာဒဏ်ချက်အကျိုးဆက်ဟာ ဒီနေ့ထိ နက်ရှိုင်းသည်ထက် နက်ရှိုင်းလာနေပါတယ်။ ဒီးဒုတ်ဦးဘချို၊ သခင်မြ၊ ဦးရာဇတ်၊ ဦးဘ၀င်းတို့ဟာ ဗိုလ်ချုပ် အောင်ဆန်းက ဆရာခေါ်ခံရသူတွေပ။ ဦးဘချိုဟာ ၁၉၂၀ ခုနှစ် ပထမသပိတ်မှာက တည်းက ဆရာကြီးသခင်ကိုယ်တော်မှိုင်းနဲ့ တွဲဖက်လာခဲ့တာပါ။ ဘကြီးမှိုင်းလိုပဲ ဦးဘချိုဟာ ရောင်ထုံးနဲ့ ပိုးပုဝါခေါင်းပေါင်းနဲ့ နှုတ်ခမ်းမွှေးနဲ့ကွယ်လွန်သည်ထိ မြန်မာ့ဆင်ယင်ထုံးဖွဲ့မှုမစွန့်ခဲ့ သူပါ။ တိုင်းရင်း ဆေးပညာရှင်ရဲ့သားတဦးပီပီ နက္ခ၊ ဗေဒင်၊ မဟာဂီတတို့ကို တဖက်ကလိုက် စားပေမဲ့ တက္ကသိုလ် မှာ သိပ္ပံပညာသင်ယူသူပါ။ ရူပဗေဒပညာမှာဆိုရင် ဗမာလူထုကို အိုင်စတိုင်းနဲ့ ပထမဆုံး မိတ်ဆက် ပေးသူဖြစ်သလို ဓါတုဗေဒမှာဆိုရင်လဲ ဆပ်ပြာ၊ ဆေးဝါးစတဲ့ ဓါတုဗေဒပစ္စည်းတွေချက်လုပ်ပြီး အသက်မွေးဝမ်းကျောင်းနိုင်သူပါ။ အမျိုးသားကောလိပ်မှာ ဘကြီးမှိုင်းနဲ့အတူ မြန်မာစာဆရာ လုပ်တော့ လခမမှန်လို့ မစားလောက် မသောက်လောက်ဖြစ်နေချိန်မှာ ဓါတုထွက်ကုန်တွေ ထုတ် လုပ် အသက်ဆက်ခဲ့ရသူပါ။
ဒီးဒုတ်ဂျာနယ်ဆိုတာ အမျိုးသားကောလိပ်ပျက်မှ ထူထောင်တာပါ။ ဆရာကြီးချိုရဲ့ တပည့်ရင်း ဦးနုကို အကြောင်းပြု ပြီးနောက်အခါမှာ ဦးသိန်းဖေမြင့်နဲ့ ဦးအောင်ဆန်းတို့လဲ ပါဝင်ရေးသားလာကြပါတယ်။ ဒီးဒုတ်ဂျာနယ်ထုတ်မှ “ဒီးဒုတ်ဦးဘချို” အမည်ရလာခဲ့တာပါ။ ၀တ္ထု၊ ကဗျာတွေလဲရေးပါတယ်။ စာပြောင်စာလှောင်တွေလဲ ရေးပါတယ်။ မဟာဂီတကိုလဲ တည်းဖြတ်ခဲ့ ပါတယ်။ ဗမာခေါင်းပေါင်းနဲ့ ခါးတောင်မြောက်အောင်ကျိုက်ပြီးတော့လဲ “စကိတ်” စီးခဲ့ပါတယ်။ အင်္ဂလိပ်တွေမျက် လုံးပြူးအောင်စီးပြနိုင်တာပါ။
သခင်မြဆိုရင် ဆရာစံသူပုန်ကစပြီး နာမည်ထွက်လာသူပါ။ ဆရာစံဘက်ကရှေ့နေ လိုက်ခဲ့ရာက နိုင်ငံရေးလောကမှာ သခင်ဖြစ်လာပါတယ်။ ဖက်ဆစ်တော်လှန်ရေး မြေအောက် ခေါင်းဆောင်ကြီးတဦးပါပဲ။ ဦးရာဇတ်နဲ့ဦးဘ၀င်းတို့ကတော့ အမျိုးသားကျောင်းက ကျောင်းအုပ် ကြီးတွေပါ။ ဖြောင်မတ်တည်ကြည်ပြီး ကိုယ်ကျိုးစွန့်လုပ်ခဲ့ကြတဲ့ မျိုးချစ်နိုင်ငံရေးသမားကြီးတွေ အဖြစ် ကျော်ကြားပါတယ်။ စ၀်စံထွန်းတို့ မန်းဘခိုင်တို့ဆိုတာလဲ ကျဉ်းမြောင်းတဲ့မျိုးချစ် စိတ်ဓါတ် ကို ခ၀ါချပြီး ပြည်ထောင်စုကြီးထူထောင်ရေးမှာ ဗိုလ်ချုပ်အောင်ဆန်းနဲ့အတူ လက်တွဲပူးပေါင်း ဆောင်ရွက်သူတွေအဖြစ် ပြည်သူကလေးစားခဲ့ရသူတွေ ဖြစ်ပါတယ်။
ဗိုလ်ချုပ်အောင်ဆန်းရဲ့ နိုင်ငံရေးခေါင်းဆောင်ပီသမှု၊ နိုင်ငံရေးသုခမိန်ဂုဏ်မြောက်မှုက အဲသလိုစွမ်းဆောင်မှု အသီးသီးရှိကြတဲ့ ပြည်ချစ်နိုင်ငံရေးသမားကြီးတွေကို ရှာဖွေရွေးခြယ် စုစည်း ပြီး ဦးဆောင်နိုင်မှုစွမ်းရည်ပါပဲ။ လူတဦးရဲ့ အတ္တကြီးမှု အမြင်ကျဉ်းမြောင်းမှုတွေကြောင့် ဒီလို အရည်အချင်းပေါင်းစုံနဲ့ ပြည့်ဝတဲ့လူစုကြီးတစုလုံးကို ခေါင်းဆောင်သူပါ တပါတည်း ဆုံးရှုံသွား ရပုံဟာ အလွန်ကြေကွဲဝမ်းနည်းစရာကောင်းလှပါတယ်။
ဗိုလ်ချုပ်အောင်ဆန်းဟာ အကြမ်းဖက်အုပ်ချုပ်တဲ့ ဖက်ဆစ်ဂျပန်အစိုးရကိုအကြမ်းဖက် ပြီးလက်နက်ကိုင် တော်လှန်ခဲ့တယ်။ ဖြစ်နိုင်ရင် တိုင်းပြည်ရဲ့အနာဂတ်ရေး၊ ပြည်သူတွေနစ်နာ ဆုံးရှုံးမှုမဖြစ်ရေးအတွက် စေ့စပ်ဆွေးနွေးတဲ့ ဒိုင်ယာလော့နည်းကို စနစ်တကျပြင်ဆင်ပြီး စိတ်ရှည် လက်ရှည်အသုံးချပါတယ်။ ခေတ်သစ်သမိုင်းမှာ အင်္ဂလိပ်အစိုးရနဲ့ စားပွဲဝိုင်းထိုင်ပြီး ဆွေး နွေးခဲ့တဲ့ ဦးအောင်ဆန်းရဲ့ ဒိုင်ယာလော့အစဉ်အလာဟာ အလွန်ကြီးမားခဲ့ပါတယ်။ ပင်လုံစာ ချုပ်ဟာလဲ လွတ်လပ်ရေးအတွက် တံတားခင်းပေးရုံမက ဒီမိုကရေစီပြည်ထောင်စုအတွက်လဲ အုပ်မြစ်ချပေးခဲ့ တာ မဟုတ်လား။ ပင်လုံစာချုပ်ကိုလဲ ဒိုင်ယာလော့ခေါ် စေ့စပ်ဆွေးနွေးနည်းနဲ့ပဲ ချုပ်ဆိုနိုင်ခဲ့တာ မဟုတ်လား။
ဗိုလ်ချုပ်အောင်ဆန်းဟာ တပ်မတော်ရဲ့ဖခင်ပါ။ သူရဲ့စစ်သေနာပတိရာထူးကို ဘယ် သူမှမျက်စောင်းမထိုးဝံ့၊ မထိုးနိုင်ပါဘူး။ ဒါပေမဲ့ ဒီစစ်တပ်အာဏာကိုစွန့်ပြီး ဖဆပလ ဥက္ကဠ အဖြစ်နဲ့ နိုင်ငံရေးလုပ်ခဲ့ပါတယ်။ “နိုင်ငံရေးလုပ်ချင်ရင် စစ်တပ်ကထွက်”လို့ လမ်းပြခဲ့တာဟာ အလွန်ကြီးမား တဲ့၊ ကောင်းမြတ်တဲ့ နမူနာ အစဉ်အလာကြီးပါ။ အမြော်အမြင်ကြီးပါပေတယ်လို့ လူတိုင်းချီးမွမ်း ရတာပါ။ ဖဆပလတွင်းမှာ ဖက်ဆစ်တော်လှန်တုန်းက ရှောင်တောင်တောင် လုပ်ခဲ့ နိုင်ငံရေးသမား တချို့က ၀င်မွေတော့ ဖဆပလကြီးအက်ကြောင်းပေါ်ခဲ့ပါတယ်။ ဒါကို စေ့စပ်ဖို့ “လက်ဝဲသမား လူငယ်တွေ ညီညွတ်ဖို့လိုတယ်”၊ “စားဖားတွေ ညီညွတ်တာမလိုချင်ဘူး”လို့ ကြွေးကြော်လိုက်တာ နဲ့တပြိုင်နက် ဗိုလ်ချုပ်အောင်ဆန်းကို အင်္ဂလိပ်နယ်ချဲ့သမားနဲ့တကွ တကိုယ်ကောင်းအတ္တ နိုင်ငံရေးသမားတွေက အမြန်ရှင်းပစ်ဖို့ကြိုးစားတော့တာပါပဲ။ ဗိုလ်ချုပ်နဲ့တကွ ပြည်ချစ်နိုင်ငံရေး ခေါင်းဆောင်ကြီးတွေ၊ တည်ကြည်ဖြောင့်မတ်အတ္တကင်းတဲ့ ခေါင်းဆောင်ကြီးတွေ ကျဆုံးသွား ခဲ့တာဟာ နှစ်ပေါင်း ၅၀ ကျော်အထိ အဖတ်ဆည်လို့ မရနိုင်တော့ပါလား။ လူငယ်မျိုးဆက်သစ် အဖွဲ့အစည်းတွေ၊ နိုင်ငံရေးအဖွဲ့အစည်းတွေ၊ ကျောင်းသားသံဃာတွေကို တခုမကျန်ဖြိုဖျက်ပြီး မြန်မာ့နိုင်ငံရေးကိုသင်းကွပ်၊ မြန်မာ့သမိုင်းကိုပြာချရေမျော လုပ်တာကို ကျနော်တို့သတိပြုပြီး ညီညွတ်မှုနဲ့ ပြန်လည်အဖတ်ဆည်ရပါလိမ့်မယ်။ နိုင်ငံရေးအမြင်ကို အမြင်ကျဉ်းခဲ့တာတွေ၊ မညီညွတ်ခဲ့တာတွေကို သင်ခန်းစာယူပြီး အချိန်မြန်မြန်နဲ့ပြင်ဆင်ပြီး အမြင်ကျယ်ဖို့၊ အမြော်အမြင် ကြီးဖို့ ကြိုးစားကြရပါလိမ့်မယ်။
၁၉၈၈ ခုနှစ်မှာ နိုင်ငံရေးမဲ့ အာဏာရှင်စစ်ဖိနပ်အောက်က ပြည်သူတရပ်လုံး ကုန်းထ ခဲ့ကြပြီး၊ ရုန်းလက်စနဲ့ဆက်မရုန်း ရင်းတော့ လယ်တီဆရာတော်ဘုရားကြီးအမိန့်ရှိသလို ...
ခွင့်သာတုန်းမှ မရုန်းချင်လျင် အရှုံးနှင့်ပြင်ရှိသေးလေလိမ့်လား၊
ခွင့်သာဆဲမှ မခဲချင်လျင် အလွဲနှင့်ပြင်ရှိသေးလေလိမ့်လား၊
ခွင့်သာခိုက်မှ မလိုက်ချင်လျင် အမိုက်နှင့်ပြင်ရှိလေလိမ့်လား၊
နဲ့ပဲပြောလိုက်ရပါတော့မယ်။ အဲဒါကိုသာအလွတ်ကျက်ထားကြ၊ ဂါထာလိုရွတ်ဖတ်ကြပါစို့။
အာဇာနည်ဗိမာန်ကို ပြည်သူစုံညီ၊ စိတ်ရှိလက်ရှိ၊ လွတ်လွတ်လပ်လပ် အလေးပြုနိုင် ကြမယ့် နေ့တနေ့ကို ရောက်အောင်မလုပ်နိုင်ရင်၊ ပြည်ပရောက်ဗမာတွေလဲ ပြည်ပမှာပဲ ဗမာ မလုပ်တော့ပဲ ဇာတ်မြှုပ်လိုက်ကြပါစို့။
ကွယ်လွန်သူအာဇာနည်အပေါင်းကို အလေးပြုလျက်။
မောင်စွမ်းရည်
Labels: ဆောင်းပါး
