"အတွေးအခေါ်တိဆိတ်သုဉ်းလားကေ စကားလုံးတိရာ အဖတ်တင်ကျန်လိုက်တေ" ဆိုရေ ဥရောပစကားပုံချေတခုပိုင် အိုင်ဒီယာအကျပ်အတည်းကိုအဖြေရှာဖို့မစိုင်းစားပဲအိမ်ခေါင်မိုးပေါက်နိန်စွာကိုကြမ်းလားဖါနိန်ကတ်တေလူတိကြားမှာအမြတ်ထွက်နိန်စွာကဗမာစစ်အုပ်စုလို့ရာaပြောကတ်ရဖို့ထင်ယင့်။ရာသီပေါ်နိုင်ငံရေးလှိုင်းထက်မှာတခုခုဖြစ်စွာနန့်ပုရွက်စိတ်ချေတိတွင်း
ကထွက်တေပိုင် မိုးဦးကျဖားပြုတ်ကေတိ ဖဲသာမပီးရတိုင်းအော်ကတ်တေပိုင် ဖတ်လို့မကုန်နိုင်ရေစတိတ်မန့်တိ ကြားလို့ မဆုံးနိုင်ရေအသံတိ ရွီးလိုက်ကတ်တေ သတင်းတိ လုပ်လိုက်ကတ်တေ ဆန္ဒပြပွဲတိ ထိုနိုင်ငံဒေနိုင်ငံက ဂေါင်းဆောင်တိ ထိုအဖွဲ့ဒေအဖွဲ့က အတွင်းရေးမှူး ဥက္ကဌတိ နိုင်ငံတကာဆက်ဆံရေးဒီပလိုမေစီစာအုပ်ကြီးတိကို မျိုချထားကတ်တေ သံတမန်ကြီးတိ ကိုယ်စားလှယ် တော်တိ လားကတ်လာကတ် ပြောကတ်ဆိုကတ် ငြင်းကတ်ခုန်ကတ် တောင်းဆိုကတ်ကန့် ကွက်ကတ် ဝေဖန်ကတ် အပြစ်တင်ကတ် အဆုံးသတ်နိဂုံးမှာ ဗမာစစ်ဂေါင်းဆောင်သန်းရွှေဆင်ထားရေ ထောင်ချောက်ကြီးထဲမှာ လက်ကားရား ခြီကားရား ပြောနိန်ကျစကားတိနန့် ခေါက်ရိုးကျိုးနိန်ရေ တိုက်တွန်းသုံးသပ်မှုတိကိုကိုင်ပနာ ဖြေသိမ့်ကျေနပ် အဆုံး အဖြတ်ရလဒ်က အယင်အတိုင်းလားနိန်လီဖို့စွာပါရာ။တွိဆုံဆွေးနွေးစေ့စပ်ညှိနှိုင်းအဖြေရှာကတ်။သူမနာကိုယ်မနာဝါဒကိုကျင့်သုံးကတ်။ယကေအားလုံးစာရင်းအင်းသိမ်းလို့အိမ်ပြန်ဖို့ကြည့်လိုက်တေခါဗမာတိလက်ထဲမှာနိုင်ငံရေးအာဏာကျန်ရေလူတိကကျွန်ဘ၀နန့်ကုန်းရီတိစုတ်လို့။ကောင်းကတ်သိမ့်ယင့်လား။တချက်ချေလောက်ကြည့်ကတ်ပါဖိ်။ လွန်ခရေ ဆယ်နှစ်ကျော်လောက်ကဆိုကေ ဒေပိုင်အချိန်တိစွာ နိုင်ငံရေးယစ်လို့ အကောင်းဆုံးအချိန်။ တောင်မသိ မြောက်မသိပန်းတိုင်မဟိကေလေ့လားလို့ကောင်းခရေ။အော်လို့ခြီခရေ။ပဇ(ပါးစပ်)ကအမြှပ်ထွက်အောင်ဖယ်ဒရယ်နန့်လွတ်လပ်ရေးကိုငြင်း၊တပြားလေ့မရကေလေ့တလုံးလေ့မတတ်ကေလေ့သွီးနထင်ရောက်ပနာနိုင်ငံရေးဘိုးတော်ယောင် ယောင်တော်လှန်ရေးဂုရုယောင်ယောင်အေနိန့်လားတိုက်ကေအေနိန့်ရခိုင်ပြည်ကိုပြန်ရဖို့စွာပိုင်စိတ်ကူးယိုင်အိမ်မက် တိနန့်ရူးခဖူးရေ။ နိုင်ငံရေးအယစ်ပြေလို့ နိုးပါလတ်တေခါ ဂေါင်းကိုက်တေဝေဒနာက သံပုရာသီးလေ့ မကယ်နိုင် လှော်စာသောက်ကေလေ့မပျောက်။ နောက်ကုန်းကို တုတ်ကျခါမှ သိရေ။ အော် ငါရို့  ရခိုင်သားတိမှာ လက်နန့်  ဖ၀ါး ရာ ဟိရေ။ ၀မဟိပဲ ၀ိလုပ်ဖို့  ကြိုးစားဖူးခရေ အချိန်တိ နှမြောဖို့ ကောင်းလိုက်တေပင်။ လွတ်တေငါးအကြီးသန် လတ်။ အဂုလေ့ ကုန်လားခရေ အချိန်တိစွာဂေါ်ဇီလာလောက်ဟိဖို့လို့ထင်မိယင့်။ လူ့ဘ၀စွာ တိုရေ လတ်။ ဇာလောက်တိုလေလို့ မိန်းကေ အဖြေတိထွက်ကျလာဖို့မထင်။ တိုရေလို့ ရာ မှတ်ထားလိုက် ကတ်မေဖိ။ မငြင်းချင်ဗျာယ်။ ယကေလေ့ အေချင့်နန့် ဆန့်ကျင်ဖက် ရခိုင်ရို့  ရက္ခိတရို့  မဟာအာရိယန်ရို့  ဗမာကျွန် ဖြစ်နိန်ကတ်ရရေ ဘ၀က ရှည်ရေလို့ ပြောကေလွန်လားလီဖို့ လားချင့်။ ဇာလောက်ထိ ရှည်ဖို့ သိမ့်လေး ဆိုစွာကို ရခိုင် သားတိအားလုံးရာတိုင်းကြည့်ကတ်လီပါဖိ။ မရှည်ချင်ကေတော့ခါ အားလုံးသူဆုံးဖြတ်ပနာ အဆုံးသတ်လီကတ်ပါဖိ။ ယကေဒေစာစုချေ ဂေါင်းစိုဉ်မှာပါရေအတိုင်း ဗမာစစ်အုပ်စုပရိယာယ်ကို ခြီရာခံကြည့်ရဖို့ဆိုကေ ဒေသူရို့ စစ်စနစ် ကို ဇာဝါဒအတွေးအခေါ်နန့် နိုင်ငံရေးယုံကြည်ချက်မှာ အခြီခံပနာ တည်ဆောက်ထားပြီးကေ ဒေနိန့်ကာလထိ ဇာဖြစ်လို့ ခြီတလှမ်းချေ မပျက်အောင်လားနိုင်ကတ်လေဆိုစွာကိုအယင်ဆုံးဆန်းစစ်ကြည့်ကတ်ရဖို့ထင်ယင့်။ကမ္ဘာသမိုင်းနန့်ချီပနာ ပြောရဖို့ ဆိုကေ ဒုတိယကမ္ဘာစစ်မှာ လူဦးရေပေါင်း ၅၅ သန်း သီဆုံးလားခရခြင်း၏ အဓိက စစ်ရာဇ၀တ်ကောင်တိနန့်တရားခံတိဖြစ်တေ ဟစ်တလာဦးဆောင်ခရေဂျာမန်နာဇီဝါဒ၊မူဆိုလီနီဦးဆောင်ခရေအီတလီဖက်ဆစ်နန့်ဂျပန်ပဒေသရာဇ်တိဦးဆောင်ခရေဂျပန်ဖက်ဆစ်၀၀ါဒတိအားလုံးစွာအမျိုးသားရေးအစွန်းရောက်ဝါဒနန့်နိုင်ငံရေးယုံကြည်ချက်မှာသန္ဓေတည်ပနာမွီးဖွါးလာကတ်ခြင်းပင်ဖြစ်တေ။အဂုခေတ်နအဖဗမာပဒေသရာဇ်စစ်စနစ်လည်းဗမာအမျိုးသားရေးအစွန်းရောက်ဝါဒနန့်နိုင်ငံရေးခံယူချက်ဖြစ်တေဗမာအမျိုးသားနိုင်ငံထူထောင်ရေးနန့် နိုင်ငံရေး အာဏာကို ဗမာတိကရာထိန်းချူပ်ထားနိုင်ရေး ဥခွံထဲက ပေါက်ဖွါးရှင်သန်လာခြင်းပင် ဖြစ်တေ။ ဒေပိုင် အမျိုးသားရေး အစွန်းရောက်မှိုင်းနန့်အဆိပ်တိမိနိန်ရေ ဗမာစစ်အုပ်စုကို နာဇီဖက်ဆစ်ဝါဒအတွေးအခေါ်တိ နိဂုံးချူပ်လားကတ်တေပိုင် မလုပ်နိုင်ရေ ကာလပတ်လုံး တခြားတခုချဉ်းကပ်နည်းနန့်လေ့ ဒေနိန့်ကာလဖြစ်နိန်ရေ နိုင်ငံရေးပြဿနာကို အဖြေရှာ လို့ ရနိုင်လ်ီဖို့ မဟုတ်ပါ။ ၁၉၅၉ ခုနှစ် ဂျူလိုင်လမှာ ပုံနှိပ်ဖော်ပြခရေ နိုင်ငံရေးဆိုင်ရာ ပညာသျှင်စာတမ်းတစောင်မှာ ဆောင်းပါးသျှင် ဂျိုးဆဖ်ဆေလဗာစတိုင်း (Josef Silverstine) က ဗမာအမျိုးသားရေးဝါဒရေ ၁၉၃၀ ကာလမှာ "ဒို့ဗမာ အစည်းအရုံး" ကိုထူထောင်ပြီးကေ "ဗမာစာသည် ဒို့စာ ဗမာစကားသည် ဒို့စကား" ဆိုရေ ဆောင်ပုဒ်နန့် စတင်လှုပ်ရှား အသက်ဝင် ပါလတ်တေ လို့ ရွီးထားစွာကို ဖတ်ရရေ။ ဒေ အစည်းအရုံးက ဗမာတက္ကသိုလ် ကျောင်းသား လူငယ်တိကို စည်းရုံး သိမ်းသွင်းနိုင်ပနာ ဗမာတိနိုင်ငံရေးအချူပ်အချာအာဏာပိုင်ဆိုင်ရေးနန့် ဗမာမှုပြုရေးပေါ်လစီ (Burmanization Policy) ကိုပါ ကျင့်သုံးပါလတ်ကတ်တေ။ ဗမာအမျိုးသားနိုင်ငံရေးလမ်းကြောင်းကို ဖောင်ဒေးရှန်း ချပနာ တဖဲ့ချေလေ့ အစောင်းမခံပဲ ပါလတ်စွာ နောက်ဆုံးဗမာစစ်တပ်ကို ထူထောင်ရေ အဆင့်ကိုရောက်လို့ ပါလတ်တေ။ စစ်ကြိုခေတ် ကာလက ရန်ကုန်တက္ကသိုလ်မှာ သမိုင်းပါမောက္ခလုပ်ခရေ ဂေါ်ဒွန် အိတ်ခ်ျ လူးစ် ( Gordon H Luce) က "ဒို့ဗမာ အစည်းအရုံးဝင် သခင်တိဦးဆောင်ပါဝင်ရေ ရဲဘော်သုံးကျိပ်က စတုတ္ထဗမာနိုင်ငံတော်ကို ထူထောင်နိုင်ခရေ လို့ ကောက်ချက်ချခစွာကို ဖတ်ရရေ။ အင်္ဂလိပ်မအုပ်ချူပ်ခင်ကာလက နိုင်ငံရေးအရ တခုပိုင်လေ့ဆက်စပ်မှုမဟိပဲတသီးတခြားစီနိန်ခကတ်တေတိုင်းပြည်နိုင်ငံတိစွာအင်္ဂလိပ်ကိုလိုနီစနစ်အောက်မှာနယ်မြေတခုတည်းဖြစ်လာလတ်ပြီး ကေ လွတ်လပ်ရေးရရေခါ ဗမာတိ၏နိုင်ငံရေးအရ လိမ်မာပါးနပ်မှုနန့် ဗမာအမျိုးသားရေးဝါဒကို တစိုက်မတ်မတ် ဆုပ်ကိုင်ထားနိုင်ခလို့ အေနိန့်ကာလ မြန်မာနိုင်ငံ ဆိုရေ ဧရိယာအကျယ်အ၀န်းကို ထိန်းချူပ်ထားနိုင်ခြင်းဖြစ်တေလို့ သုံးသပ်ရပါဖို့။ယင်းအတွက်နန့် အဂုကာလစွာ စတုတ္ထဗမာနိုင်ငံတော်ကို နအဖစစ်အုပ်စုက ဦးဆောင်ပနာ ခရီးနှင်နိန်ကတ်တေ အချိန်လို့ သတ်မှတ်ကတ်ရဖို့ ထင်ယင့်။ အေနိန်ရာမှာ ထူးခြားနိန်စွာတခုက "အမျိုးသား" ဆိုရေ စကားလုံးပင် ဖြစ်ပါရေ။ နိုင်ငံရေးသိပ္ပံအဘိဓါန်မှာ အမျိုးသား ဆိုရေ စကားလုံးစွာ လူမျိုးတမျိုးတည်းကိုရာကိုယ်စားပြုကြောင်း အဓိပ္ပါယ်ဖွင့်ဆိုထားရေ။ န၀တဗမာစစ်အုပ်စုအာဏာသိမ်းပြီးကေထုတ်ပြန်ကျေညာထားရေယင်းသူရို့မူဝါဒနိုင်ငံရေးဦးတည်ချက်(၄)ရပ်မှာ ဒုတိယစာကြောင်းက "အမျိုးသားပြန်လည်စည်းလုံးညီညွတ်ရေး"ပင်ဖြစ်ပါရေ။ယကေဒေနိန့်  ကာလ အတိုက်အခံပါတီတခုဖြစ်တေအမျိုးသားဒီမိုကရေစီအဖွဲ့ ချူပ်ကတောင်းဆိုနိန်ရေ"အမျိုးသားရင်ကြားစေ့ရေး"စွာလည်းအထက်ကပြောခရေဗမာစစ်အုပ်စုနိုင်ငံရေးမူဝါဒနန့်တထပ်တည်းကျနိန်စွာကိုတွိရရေ။နောက်ပြီးကေ ဒေအမျိုး သားဒီမိုကရေစီအဖွဲ့ ချူပ်မှာ ပါရေ စကားလုံး "အမျိုးသား" စွာ ဗမာလူမျိုးတမျိုးတည်းကိုရာ ကိုယ်စားပြုနိန်ရေ ပြောကတ်ရဖို့ ထင်ရေ။ အမျိုးသားများ (Nationalities) နိန်ထိုင်ရေ ဗဟုလူ့ ဘောင်တိုင်းပြည်ကြီး၏နိုင်ငံရေးပဋိပက္ခ ကို ဖြေ ရှင်းဖို့ တောင်းဆိုတိုက်ပွဲဝင်ကတ်စွာမှာ "အမျိုးသားများရင်ကြားစေ့ရေး" လို့ မူဝါဒ မချခြင်းက ဗမာအမျိုးသားရေးလမ်းကြောင်းတခုတည်းကိုရာဦးတည်ပြီးကေလားနိန်ကြောင်းမီးမှောင်းထိုးပြနိန်ရေ။
ကမ္ဘာ့နိုင်ငံရေးသမိုင်းကို လေ့လာမှတ်တမ်းတင်စာတမ်းပြုစုနိန်ကတ်တေ အဖွဲ့ အစည်းကြီးတိက ဗမာစစ်အာဏာသျှင်စနစ်စွာ ကမ္ဘာမှာသက်တမ်းအရှည်ဆုံးစစ်အာဏာသျှင်စနစ်လို့ မှတ်တမ်းတင်ထားကတ်တေ။ ၁၉၉၇ ခုနှစ်မှာ ရွီးခရေ "လက်ဟိခေတ်ကာလအခြေအနေကို ဆန့်ကျင်လို့ ဗမာပြည်မှာ အာဏာသျှင်စနစ်သက်ဆိုးရှည်နိန်ခြင်း" (Against the current: The Survival of Authoritarianism in Burma) ဆိုရေ သုတေသနစာတမ်းမှာ ပညာသျှင် ဂျာလာ အလမ်ဂီးယာ (Jalal Alamgir) က ဗမာအမျိုးသားရေးဝါဒ ရေ လက်ဟိဗမာစစ်စနစ်ကို ကျားကန်ပီးနိန်ရေ အဓိက အိုင်ဒီယာတခုဖြစ်ကြောင်းကို ထောက်ပြထားရေ။ ယပြီးကေ သူက "အန်အယ်လ်ဒီ၏ရပ်တည်မှုက န၀တ (အဂုနအဖ) သက်ဆိုးရှည်ဖို့အတွက်အကျိုးဖြစ်ထွန်းနိန်စီရေ၊ တဖဲ့ချေအကျယ်ချဲ့ ပြောရဖို့ဆိုကေ စစ်အုပ်စုက စုကြည်၏နိုင်ငံရေးကို ကြိုတင်ခန့်မှန်းထားနိုင်ရေ" (The stance of NLD has been beneficial to SLORC’s survival, at least to the extent that Suu Kyi’s politics are predictable to the junta.) လို့ ဝေဖန်ထားစွာကို ဖတ်ရရေ။ အန်အယ်လ်ဒီ စီအီးစီထဲမှာ ဗမာအမျိုးသားရေးဝါဒကို ဆုပ်ကိုင်ထားရေ နအဖအလံရှူး ဖျက်မြင်းတိကို ထည့်ထားပနာ နိုင်ငံရေးကဇတ်ပါလတ် ကတ်စွာ အဂုဆိုကေ ဆယ်စုနှစ် နှစ်စုကိုကျော်လွန်ပါလတ်လို့ အချိန်သစ်ကာလကိုရောက်လာနိန်ကြောင်းကို အားလုံး သူရို့ မျက်မြင်ကိုယ်တွိလို့  ဆိုကတ်ရပါဖို့။ အဂုလေ့ ပြောလို့ ဆိုလို့ ခံစားလို့ကောင်းရေ ဒရမ်မာနိုင်ငံရေး (Drama Politics) ပြကွက်တိက လူတိစိတ်ကို ဖမ်းစားထားရေလို့ပြောရဖို့ထင်ယင့်။ ယကေလေ့ အပြောင်းအလဲကတော့ တခုထောင့်ကြားကလေ့ ထွက်ကျလာဖို့ မဟုတ်။ ကြိုပနာစီစိုင်ထားရေအတိုင်း ၂၀၁၀ မှာ ရွီးကောက်ပွဲကျင်းပလို့ ဗမာနည်းဗမာဟန် မကျက်တကျက် ဒီမိုကရေစီနန့် စတုတ္ထဗမာနိုင်ငံတော်ကြီးကို ခြီလှမ်းမပျက်လားကတ်ဖို့ စွာက တန်းလို့ မြင်နိန်ရရေ။ ၂၀၀၈ ခုနှစ် ဖွဲ့  စည်းအုပ်ပုံ အခြေခံဥပဒေမှာ ပြဌါန်းထားရေပိုင်စစ်ရေးအမြင်ဟိရေ ဗမာစစ်သားက သမ္မတဖြစ်လာပနာ(၅)နှစ် သက်တမ်း (၂) ကြိမ် အုပ်ချူပ်လားကေ ဒီမိုကရေစီနှမ်းဖြူးထားရေဗမာအမျိုးသားရေးစစ်ဝါဒက၂၀၂၀ထိဇိမ်ခံပနာလားနိန်လီဖို့စွာကဗေဒင်မိန်းစရာမလိုပါ။ဒေပိုင်ဗမာစစ်အုပ်စုဇိမ်ခံနိုင်ဖို့အတွက် ရုပ်ဝတ္ထုရင်းမြစ်ပိုင်းဆိုင်ရာ ဖဲသာတိကို ရခိုင်ပြည်က ထောက်ပံ့ပီးနိန်ရေ။ နအဖစစ်ယန္တရားလည်ပတ်ဖို့ လိုအပ်တေ ဖဲသာကို ရခိုင်ပြည်ကထွက်တေ ရခိုင်သားတိပိုင်ရေ သဘာဝဓါတ်ငွေ့ က ကျောထောက်နောက်ခံလုပ်ပီးထားရေ။ ယကေ အမောင်ရခိုင်သားဝံလက်ရို့ မှာ ဗျရာကျန်ရေ။ ဟုတ်ဖို့ လားနင်းခံခီကေ တဘော်စီလျော့လားရေ။ အိတ်ပေါက် နန့်ဖားကောက်တေပိုင်လမ်းလျှောက်လို့လမ်းပျောက်နိန်ရရေ။"ရခိုင်သားကိုတိုက်စရာမလိုအချင်းချင်းတိုက်ပြီးကေ ဘ၀ပျက်နိန်လီကတ်ဖို့စွာရာ" လို့ ဗမာစစ်ထောက်လှမ်းရေး ခင်ညွန့် ပြောခပိုင် ရခိုင်သားတိကလေ့ အတိအကျ လိုက်နာကျင့်သုံးကတ်တေ။ ဥာဏ်ကောင်းလိုက်တေပင်။ ယင်းပိုင်နန့် အယင်ပိုင် ပဒေသရာဇ် လက်ကျန် အိမ်မက်နန့် ပွဲမတိုးရေ ရခိုင်သားတိနိုင်ငံရေးက၂၁ရာစုမှာစိန်ခေါ်မှုတိကိုရင်ဆိုင်လာကတ်ရရေ။ရှိဆက်ပြီးကေဇာပိုင်လုပ်လားကတ်ဖို့လဲဆိုရေမိန်းခွန်းကထွက်ကျပါလတ်တေ။ကျိန်းသီနိန်စွာ တခုက ရာစုနန့်ချီပနာ ဖြစ်ပါလတ်တေ နိုင်ငံရေးရောဂါကို အဂုချက်ချင်းပျောက်အောင် ဥုံဖွလို့မန်း ပနာကူးပစ်လိုက်နိုင်ရေဆီးကြိမ်လုံးတယောက်ဘားမှာလေ့မဟိ။ရေရှည်အမြင်(Long-term perspective)နန့် ကြိုတင် ပြင်ဆင်တည်ဆောက်လားနိုင်ခြင်းကရာ အနာဂတ်မှာ မျှော်မှန်းထားရေ ရလဒ်ကောင်းကို ရလာနိုင်ဖို့ ယုံကြည်မိယင့်။ နည်းဗျူဟာ မဟာဗျူဟာသစ်နန့် နိုင်ငံရေးသမားအသစ် မျိုးဆက်သစ် သွီးသစ်တိပါ ကွက်လပ်တိဖြည့်ပီးဖို့ လိုအပ်နိန် စွာက ရခိုင်နိုင်ငံရေး၏ လက်ဟိတောင်းဆိုနိန်မှုပင်ဖြစ်ပါရေ။ ။ ။ ခိုင်အောင်အောင်၂၃၊၀၅၊၂၀၀၉
"ရခိုင်ပြည်အတွက် ငါရို့ တိတာဝန်"
မျက်နှာကို မှန်ထဲမှာ ကြည့်မိရေအချိန်တိုင်း ငါစွာ ကျွန်တယောက်ရာမနှန်းဂုလို့ ရက်ပြတ်အတွက်ပေါ်သတိရနီမိရေ။ ငါ့မှာတိုင်းပြည်မဟိ။ ငါ့မှာ ကိုယ့်ကံကြမ္မာကို ကိုယ်ဖန်တီးပိုင်ခွင့်မဟိ။ ငါ့အမင်ဘာသာစကားနန့်  စာသင်ပီးရေ ကျောင်း မဟိ။ ငါ့မှာ ငါ့ကို အကာအကွယ်ပီးဖို့  အစိုးရမဟိ။ ရခိုင်ပစပို့တ်ကို ကိုင်ပြီးကေ ရခိုင်နိုင်ငံသားဝေးလို့  လက်မထောင် ပနာ ရခိုင်အောင်လံတော်ကိုလွှင့်ထူလို့  ကမ္ဘာကြီးကို ပတ်လားခွင့် ငါ့မှာမဟိ။ ကမ္ဘာ့ရွာထက်မှာ ငါတခုခု ဖြစ်ကေ ဒုက္ခရောက်ကေ ချက်ချင်းအကူအညီပီးနိုင်ရေ ရခိုင်သံရုံး မဟိ။ ကုလသမဂ္ဂ ကမ္ဘာ့အိုလံပစ် အေပိုင် နိုင်ငံတကာအဖွဲ့  အစည်းတိ အားကစားပြိုင်ပွဲတိမှာ ရခိုင်ဆိုရေ ဆိုင်းဘုတ်ကို ကိုင်ပနာ ရခိုင်ကို ကိုယ်စားပြုလို့  ပြောခွင့်ဆိုခွင့် ရခိုင့် အရည်အချင်းကို ပြခွင့် ငါ့မှာ မဟိ။ ရခိုင်တံဆိပ်ခတ်ထားရေ ဖေးသာကိုကိုင်ပနာ ကမ္ဘာကြီးနန့်  အယင်ခါပိုင် ကူးသန်း ရောင်းဝယ်ရေး လုပ်ခွင့် ငါ့မှာမဟိ။ ငါ့ဘ၀က မျောက်နှင်ခံထားရရေ ယာသျှင်ဘ၀။ သူတောင်းစားပိုင် မျှော်လင့်ချက်ပန်းဖူးမဟိရေ လမ်းမထက်မှာ အလားအပြန် တယောက်ကလေ့ ငါ့ကို လူလို့ မသတ်မှတ် မလေးစား။ ငါ့သီကျလားခကေတောင် ခွီးတကောင်ပိုင် မြီမြှပ်ခံလားရဖို့  အဖြစ်မျိုး တယောက်ကလေ့ ငါ့ကို သတိရလီကတ်ဖို့ မဟုတ်။ မော်ကွန်းထိုး သမိုင်းတင်ကတ်ဖို့  မဟုတ်။ ဇာဖြစ်လို့ လေးဆိုကေ ငါ့မှာတိုင်းပြည်ကမဟိ နိုင်ငံမဟိ။ ငါ ဇာပင်လုပ်လုပ် ဇာလောက်ပင်ထူးချွန်ချွန် ငါ့မှာ ကိုယ်ပိုင်တိုင်းပြည်မဟိရေအတွက် ငါ့ကြိုးစားမှုကို ငါ့ရင်ဖတ်နှလုံးသားနန့် ပြည့်ပြည့်၀၀ ဂုဏ်ယူကျေနပ်တေ ခံစား ချက်ပီတိ တခါလေ့ဖြစ်လာဖို့ မဟုတ်။ ကိုယ့်ထမင်းကို ကိုယ်စားပနာ လူများနွားကို လားကျောင်းပီးရရေ အဖြစ်မျိုးရာ ဖြစ်နီလီဖို့ ။ ငါ့နှာခေါင်းနန့် ငါ အသက်မရှုမရရေဘ၀ လူတယောက်ဖြစ်ခြင်း၏အနှစ်သာရနန့်  လုံးဝမညီညွတ်။ ငါစွာ လူနန့်  တူကေလေ့ လူကားမဟုတ်။ လူ့ ဘောင်လောကကြီးထဲမှာ ငါကခေတ်သစ်ကျွန်တယောက်ရာ။ ငါ့အမိ ငါ့အဖ ငါ့အဘိုးငါ့အဘောင်ငါ့အဖီးငါ့အဇူမျိုးရိုးစိုဉ်ဆက် တသက်လုံးပိုင်ဆိုင်လာကတ်တေမြီ အဂုငါ့မပိုင်ဗျာယ်။ ငါ့ညီမ ငါ့အေးမ တိလေ့ တခုပိုင်လည်း လုံခြုံမှုမဟိ။ ငါ့ဆွေမျိုး သူငယ်ချင်း အသိုင်းအ၀ိုင်းတိ အားလုံးလေ့ အဂုဆိုကေ နိုင်ငံတကာ ကျွန်ဘ၀နန့်  ကုန်းရီစုတ်ပါအောင် အလုပ်လုပ်ပနာ ရလာရေ တပြားတချပ်ကို မ၀ရီစာစားလို့  အသက်ရှင် နီကတ်ရရေ ဘ၀။ တခုအာမခံချက်လေ့ မဟိ။ နွားပြီးရာမှာ ဖျာဆိုးရွင့်ရေပိုင် အမောင် တောင်မှန်း မြောက်မှန်း မသိရေ ဘ၀။ အဓိက ကငါရို့မှာတိုင်းပြည်မဟိလို့အေပိုင်ဖြစ်နီကတ်ရစွာ။ ကိုယ်ပိုင်တိုင်းပြည်နိုင်ငံ ဟိခါမှရာ ရခိုင်ဆိုစွာ လွတ်လပ်တေ လူမျိုး၊ ကြီးကျယ်မြင့်မြတ်တေ သမိုင်းကြောင်းနန့်  ကမ္ဘာ့အလယ်မှာ လူရာဝင်ခရေ လူမျိုး၊ စာပီယိုင်ကျေးမှုထွန်းကားပနာ တရားမျှတခြင်းနန့် ငြိမ်းချမ်းရေးကို တန်ဖိုးထား ခရေလူမျိုး လို့  လက်မထောင်ပနာ ပြောခွင့်ဟိလာဖို့ ။ အေနိကာလမှာ ဒေစကားလုံးတိကို လားပြောခီကေ ရီစရာ ဟာသ၀ထုချေတပုဒ်ကို လားပြောရေပိုင် လူတိဘားမှာ အဟားခံနိန်ရရေ အဖြစ်မျိုး မြီကြီးလက်ခတ်မလွဲ ကြုံလာရကတ်ဖို့ စွာဗျာယ်။ အေချင့်ထက် လူ့ ဂုဏ်သိက္ခာကျ လူ့ တန်ဖိုးမဟိလူဖြစ်ခြင်းအနှစ်သာရမဲ့စွာ မဟိဗျာယ်လို့  ထင်ရေ။ ရခိုင်ပြည်က တနှစ်ကို အမေရိကန်ဒေါ်လာ သန်းထောင်နန့် ချီပနာ ရနိန်ရေ အချိန်မှာ စားစရာမဟိလို့ ကိုယ့်ကိုယ်ကို သတ်သီလားခကတ်တေ ရခိုင်မိသားစုတိ၊ စာမသင်နိုင်ရေ အချေတိ ဘုန်းကြီးကျောင်းတိမှာ တပုံကြီး၊ လယ်တိကို အသိမ်းခံရလို့  နိုင်ငံခြားတိုင်းပြည်တိမှာ ကျွန်ဖြစ်နိန်ကတ်ရရေ ရခိုင်လယ်သမားတိ၊ ဘုရားကအောက်က မျောက်က အထက်မှာ ဆိုရေပိုင် ရခိုင်စာတတ်ဝန်ထမ်းတိ အထက်မှာ တလုံးလေ့မတတ် လူစိတ်မဟိရေ ဗမာစစ်ဗိုလ်တိက ထိုင်လို့ ၊ အရက်ဝယ် ကြက်ဖမ်း ရှိတန်းထွက်ကေ သီ ဆိုရေနိန်ရာမှာ အလုပ်မဟိလို့  ဗမာစစ်တပ်ထဲကိုဝင်ခါမှ ကျွန်ဖြစ်နိန်ကတ်ရရေ ရခိုင်စစ်သားတိ၊ ဒေပိုင် ထောင့်ပေါင်းစုံက စနစ်တကျသွီးစုပ်နှိပ်စက်ခံနိန်ရရေ ငရဲဘုံဘ၀က ရခိုင်တိလွတ်မြောက်ဖို့ နန့်  ဒေပြဿနာတိအားလုံးကို ဖြေရှင်းပီးနိုင်ဖို့ တခုတည်းရာဟိရေ အဖြေက သီးခြား လွတ်လပ်တေရခိုင်ရို့ ပြည်ကို ပြန်ပနာထူထောင်ရေး ပင်ဖြစ်တေ။ ဒေပိုင်သီးခြားလွတ်လပ်တေ ရခိုင်ပြည်ကို ပြန်ပနာ ထူထောင်ဖို့ဇာချင့်တိလိုအပ်ဖို့ လဲ။ အရင်ဆုံးလိုအပ်ချက်က "ရခိုင်ပြည် ဒေ ၂၁ ရာစုမှာ သီးခြားလွတ်လပ်တေတိုင်းပြည်ဖြစ်လာရဖိုဆိုရေ ယုံကြည်မှုပန်းတိုင်ဟိရဖို့။" အေ ယုံကြည်မှုကို အမျိုးသားရေးတာဝန်တခုလို့ သတ်မှတ်ပနာအသက်မသီသိမ့်ရေကာလပတ်လုံးနှလုံးသားထဲမှာစွဲစွဲမြဲမြဲမှတ်ပနာ အကောင်အထည်ဖော်ထမ်းဆောင်လားကတ်ရဖို့။ အေချင့်စွာ အင်္ဂလိပ်ပိုင် ပြောရဖို့ဆိုကေ Goal တခုဖြစ် တေ။ ယင်းအတွက်နန့် ဒေယုံကြည်ခြင်းပန်းဖူးကို အရောက်လားဖို့ အင်္ဂလိပ်ပိုင် Means လုပ်ဆောင်ချက် လိုအပ်တေ။ သီအိုရီနန့် လက်တွိ ထပ်တူကျခါမှရာ ပန်းဖူးကို ရောက်နိုင်ဖို့။ စနစ်ကျရေ အလုပ်နန့်  အင်အားဖြစ်လာဖို့  ရခိုင် သားလူဦးရေပေါင်း ၄ သန်းလောက်ဟိစွာထဲက တစ်ရာခိုင်နှိုင်းဖြစ်တေ လေးသောင်း (၄၀၀၀၀) လောက်ရာ နိုင်ငံရေးကို စိတ်ဝင်စားပနာ တိုင်းပြည်နန့် လူမျိုးအတွက် အသက်ပီးစွန့် လွှတ်ဝံ့ကေ ရခိုင်ပြည်ကို ထူထောင်လို့  ရပါ ဗျာယ်။ ဒေလေးသောင်းထဲကရခိုင်သူရဲကောင်းတိစွာပထမဆုံးအမျိုးသားနိုင်ငံရေးဦးသျှောင်အဖွဲ့ ချူပ်ကိုထူထောင်ရပါဖို့။ Institutionalization လို့ ခေါ်ရေလူမှုအဆောက်အအုံတည်ဆောက်ရေးအပိုင်းကို ဦးစားပီးပနာ ပရိုဖက်ရှင်းနယ် နိုင်ငံရေးကွန်ကရက်ကြီးဖြစ်လာအောင် လုပ်လားကတ်ရပါဖို့။ ဒေအဖွဲ့ ချူပ်ကြီးကို အခြီခံပနာ ရခိုင်အစိုးရကို ဖွဲ့  စည်း လားကတ်ရပါဖို့။ ဒေနိန်ရာမှာ ရခိုင်အစိုးရကိုဖွဲ့ဖို့ ၀န်ကြီးအမတ်အရည်အချင်းနန့်ပြည့်စုံရေအနည်းဆုံးအယောက်၁၅၀လိုအပ်လာပါဖို့။အောက်လွှတ်တော်အတွက်ဥပဒေပြုအမတ်အယောက် ၁၀၀ ဖြစ်ပြီးကေ အထက်လွှတ်တော်အတွက် အယောက် ၅၀ ဖြစ်ပါရေ။ ယပြီးကေ ဒေရခိုင်အစိုးရလက်အောက်မှာ ရခိုင်စစ်တပ်ကို ထူထောင်လားကတ်ရပါဖို့။ ရခိုင်စာပီကို မသုံးမနိန်ရဆိုရေ မူကိုချပနာ စာပီ ဖွံ့ ဖြိုးလာရေးကိုလုပ်ဆောင်လားရပါဖို့။ ရခိုင်အစိုးရတရားဝင်ရုံးသုံးစာရေရခိုင်စာဖြစ်ရပါဖို့။အရေးကြီးဆုံးကအေရခိုင်ကယ်တင်ရှင်လေးသောင်းစွာအချင်းချင်းတယောက်ကိုတယောက်နစ်နာအောင်အမျိုးသား အကျိုးစီးပွါးပျက်စီးစီရေ တခုလုပ်ရပ်ကိုလေ့ မကျူးလွန်ရ ဆိုရေ ဂတိသစ္စာစာချူပ်ကို လိုက်နာကျင့်သုံးကတ်ရပါဖို့။အေလေးသောင်းစွာကိုယ်ပိုင်အသိစိတ်နန့်ဇာဘ၀ဇာအဆင့်အတန်းဇာပတ်ဝန်းကျင်နန့် ဇာနိန်ရာကိုပင်ရောက်ရောက် မိမိကိုယ်ကိုတော်လှန်ရေး ဆိုရေ ကိုယ့်ဘ၀တိုးတက်ရာတိုးတက်ကြောင်းကို ရှာဖွေစိုင်းစားကတ်ရဖို့။ တရက်မှာ အနည်းဆုံး စာ လေးနာရီဖတ်ရဖို့။ ငါ့ဘ၀နန့် ငါ့ခန္ဓာကို ငါ့တိုင်းပြည်ထူထောင်ရေး နိုင်ငံရေးဖြစ်စဉ်က ပိုင်ရေလို့ စိတ်မှာ မှတ်ပနာ အခြီခံနိုင်ငံရေးအသိတရားနန့် ခြီလှမ်းမှန်မှန်လားကေ ဒေ ၂၁ ရာစုမှာ ရခိုင်သားတိချစ်တေ ရခိုင်လူမျိုး အတွက် ရခိုင်ပြည်ရေသီးခြားလွတ်လပ်တေတိုင်းပြည်တခုဖြစ်လာဖို့စွာကျိန်းသီနိန်ပါရေ။ ။ ။ခိုင်အောင်အောင်၁၈၊၀၅၊၂၀၀၉
"ရခိုင်ရို့ ပြဿနာ အဖြေရှာ"
ဒေနိကာလ ရခိုင့်နိုင်ငံရေးလူမှုရေးနယ်ပယ်တိမှာ ဖြစ်ပျက်နိန်ကတ်တေ ရခိုင်အချင်းချင်းကြားက မညီညွတ်မှုအတွင်းပြဿနာတိရေ ၁၇၈၄ခုနှစ်ဗမာပဒေသရာဇ်ဘုရင်ဘိုးတော်မောင်ဝိုင်းရခိုင်ပြည်ကိုကျူးကျော်ဝင်ရောက်မသိမ်းပိုက်ခင်ကာလကရခိုင်အချင်းချင်းကြားမှာ ဖြစ်ပျက်ခရေ ပဋိပက္ခတိနန့် လားပနာ ဆင်တူနိန်စွာကိုတွိရရေ။ ပြဿနာအစပြုလာခြင်း၊ ပြဿနာကို ဖြေရှင်းဖို့ ကြိုးပမ်းကတ်ခြင်း၊ ပြဿနာကပီးလာရေ ဆိုးကျိုး၊ နောက်ဆုံး ရခိုင်ရို့ ၏အချူပ်အချာအာဏာနန့် ထီးနန်း ဆုံးရှုံးလားရခြင်းတိနန့်  ပတ်သက်လို့  လေ့လာသုံးသပ်ကြည့်ရဖို့ဆိုကေအရေးကြီးရေအချက်အလက်တိကိုအဂုပိုင်တွိရရေ။နိုင်ငံရေးဦးဆောင်မှုစွမ်းရည်အပြည့်အ၀ဟိပနာ ဂေါင်းဆောင်မှုအရည်အချင်းနန့် ပြည့်စုံခရေ သီရိသုဓမ္မဘုရင် (၁၆၂၂-၁၆၃၈) ကွယ်လွန်လားခပြီးရေနောက်ပိုင်း ရခိုင်ရို့ လူ့ အဖွဲ့ အစည်းရေ စည်းလုံးညီညွတ်ရေးအင်အား ကျဆင်းလာပနာ ပြည်တွင်းနိုင်ငံရေး မငြိမ်မသက်ဖြစ်ပါလတ်တေ။ အုပ်စုဖွဲ့ အားပြိုင်မှုတိပေါ်ပါလတ်တေ။ ပြဿနာရေ အစုလိုက်အပြုံလိုက်လာတတ်တေဆိုရေ စကားအတိုင်း တဆက်တည်းမှာ စီးပွါးရေးအကျပ်အတည်းတိနန့် ကြုံတွိပါလတ်ရရေ။ နှစ်ပေါင်းရှစ်ဆယ်လောက် ရခိုင်ဘုရင့်နိုင်ငံ၏ စစ်ရေးနန့် စီးပွါးရေးအခြေခံအုတ်မြစ် တခုအဖြစ်ရပ်တည်နိန်ခရေ စစ်တကောင်းဆိပ်ကမ်းကိုလက်လွှတ်ဆုံးရှုံးလိုက်ရရေနောက်ပိုင်း ကူးသန်းရောင်းဝယ်ရေးနန့် ကုန်သွယ်ရေးတိပါ ကျဆင်းပါလတ်တေ။ နောက်ဆုံး ကိုယ်ရို့ အထဲက ပြဿနာကို အဖြေရှာဖို့ မစိုင်းစားပဲ လူမျိုးခြားဖြစ်တေ ဗမာကိုလားပနာ အားကိုးမိခြင်းကြောင့် ဘီစီ ၃၃၂၅ ကပင်စပနာထူထောင်တည်တံ့ပါလတ်တေ ရခိုင်ပြည်ရေ အေဒီ ၁၇၈၄ ခုနှစ် ဒီဇင်ဘာလ ၃၁ ရက်နိမှာ ဗမာပဒေသရာဇ်နယ်ချဲ့  ရို့ ၏ မတရားကျူးကျော်သိမ်းပိုက်ခြင်းကို ခံလိုက်ရပနာ သီးခြားလွတ်လပ်တေတိုင်းပြည်ဘ၀ကိုလက်လွှတ်ဆုံးရှုံးလိုက်ရရေ။အထက်က အချက်အလက်တိကို ခွဲခြမ်းစိတ်ဖြာကြည့်ကေ ရခိုင်ရို့ လူ့ အဖွဲ့ အစည်းကြီးတခုလုံးကို လွှမ်းမိုးချူပ်ကိုင်ထိန်းထားနိန်ရေ အမျိုးသားဂေါင်းဆောင်တိ စိုင်ဆက်မပြတ် မပေါ်ထွန်းလာခြင်း၊ အုပ်စုအားပြိုင်မှုကို ကြားဝင်စေ့စပ်ဖြေရှင်းပီးနိုင်ရေ အုပ်စုနှစ်ခုလုံးက ယုံကြည်အားထားကတ်ပြီးကေ သမာသမတ်ကျရေ အလယ်အလတ်လမ်းစိုင်နန့် တတိယအုပ်စုတစုမဟိခခြင်း နန့်  သူတင်းကိုယ်တင်းသူငြင်းကိုယ်ငြင်းကိုသူလျှော့ကိုယ်လျှော့ပြောင်းပနာအရေးကြုံလာကေအမြင်ကျယ်ရေအမျိုးသားတရပ်လုံးအကျိုးစီးပွါးကိုဦးတည်ပနာလက်တွဲလားနိုင်ရေးလမ်းကြောင်းကိုမရွီးချယ်ခကတ်ခြင်းတိကိုတွိရရေ။ဒေနိထက်ထိ နိုင်ငံရေးပါတီအဖွဲ့ အစည်းတိကြားမှာ ပြဿနာတိဖြစ်ကေ ကြားဝင်ညှိနှိုင်းအဖြေရှာဆုံးဖြတ်ပီးနိုင်ရေ အလယ်အလတ်အုပ်စုတစု ရခိုင်ရို့ လူ့ အဖွဲ့ အစည်းမှာ မပေါ်ထွန်းသိမ့်စွာကို တွိမြင်နိန်ရရေ။ ရခိုင်တမျိုးသားလုံးက ယုံကြည်အားထားရရေရခိုင်ရိုလူဘောင်တခုလုံးကိုလွှမ်းမိုးနိုင်မှုဟိရေအမျိုးသားဂေါင်းဆောင်သစ်တိကိုလေ့ပြုစုပျိုးထောင်ပီးနိုင်မှုအားနည်းပနာ ပေါ်ထွန်းမလာနိုင်သိမ့်လို့ ပြောကတ်ရပါဖို့ ။ နောက်ထပ်အားနည်းချက်တခုက အေနိကာလရခိုင်သားတိရေ ပြဿနာကို ထိုင်ပြောခြင်းမှာ ပိုလို့ အားသန်ပနာ အဖြေရှာဖို့ အပိုင်းကို ဦးစားပီးခြင်းနည်းနိန်သိမ့်ရေလို့  ဝေဖန်ရဖို့ ထင်ပါရေ။ အကျိုးဆက်က ပြဿနာတိရေ ပိုလို့ ကြီးလာပနာ ရခိုင်သားတိရေ ပြဿနာ၏သံသရာထဲမှာ လည်နိန်ကတ်ရခြင်းပင်ဖြစ်ပါရေ။ကျိန်းသီနိန်စွာတခုက ကမ္ဘာ့ရွာထက်က လူ့ အဖွဲ့ အစည်းတိုင်းမှာ ပြဿနာကိုယ်စီကိုယ်ငှ ဟိကတ်တေ။ အရာအားလုံးပြည့်စုံနိန်ရေ လူ့ ဘောင်စွာ မဟိ။ ဖြေရှင်းဖို့ လိုအပ်တေအကြောင်းအရာတခုခုနန့်  ရက်ပြတ်ရင်ဆိုင်နိန်ကတ်ရရေ။ အေပိုင်ကြုံတွိနိန်ကတ်ရခြင်းကို အရင်းတည်ပနာ အဖြေထုတ်ဖို့ ကြိုးစားယင်းနန့်  လူ့  ဘောင်လောကကို တဆင့်ပြီးကေတဆင့်ဖွံ့ ဖြိုးတိုးတက်လာစီရေ။ အရေးကြီးဆုံးက ဖြစ်လာရေ ပြဿနာကို ဥပက္ခာပြုရှောင်ဖယ်ပနာ မျက်စိကိုစုံမှိတ်ပြီးကေ လစ်လျူမရှုမိစီဖို့ ပင်ဖြစ်တေ။ လူတိ ဇာအတွက်ငြင်းခုန် ရန်ဖြစ်နိန်ကတ်လေ။ ဇာအကြောင်းအရာကို ပဓါနထားပနာ ပြောနိန်ကတ်စွာလေ။ လူတိအဖြေရှာဖို့ ကြိုးစား နိန်ကတ်တေ ပြဿနာ၏ရင်းမြစ်က ဇာချင့်လဲ။ အေပိုင် ပြဿနာကို ခွဲခြမ်းစိတ်ဖြာဆန်းစစ်ကြည့်ပနာ အကောင်းဆုံးအဖြေထုတ်နိုင်ခြင်းကရာ လူတိကို ပြဿနာ၏အရှင်သခင်ဘ၀ကို ပိုင်ဆိုင်လာနိုင်အောင် ဖန်တီးပီးရေ။ ဖြစ်လာရေ ပြဿနာကိုကြောက်ပနာရင်မဆိုင်ဝံ့ခြင်းကပြဿနာ၏ကျေးကျွန်ဘ၀ကိုရောက်လားနိုင်စီရေ။လူမျိုးတူညီမှု၊ ကိုးကွယ်ရေ ဘာသာတူညီမှု၊ ဖြတ်သန်းလာရေ သမိုင်းကြောင်းတူညီမှု၊ ယိုင်ကျေးမှု ဘာသာစကားဓလေ့ထုံးတမ်းစိုင်လာတိတူညီမှုတိ ပေါင်းစပ်မျှဝီထားရေ ဘုံအမျိုးသားရေးလက္ခဏာနန့် ညီညွတ်မှုတိ ဟိကေလေ့ ပြဿနာဖြစ်လာကေ ရခိုင်သားတိုင်းလိုက်နာကျင့်သုံးဖို့  အားလုံးသဘောတူညီချက်နန့် စံပြုပြဌါန်းထားရေ စည်းမျဉ်းဥပဒေတရပ်မဟိခြင်းကလေ့ အားနည်းချက်တခုလို့ ဆိုကတ်ရဖို့ ။ လူဆိုစွာ ဘက်လိုက်တတ်တေသဘောဟိလို့  အားလုံး၏ဆန္ဒနန့် အတည်ပြုထားရေ ဘုံယုံကြည်အားကိုးလောက်တေ တရားစီရင်ရေးမဏ္ဍိုင်တခုဟိခြင်းက အယင်ကထက် ပြဿနာတိဖြေရှင်းရေးအပိုင်းကိုချဉ်းကပ်ရေခါ ပိုပြီးကေလွယ်ကူလာစီဖို့ လို့ ထင်ရေ။ အမှန်တရားကို ဒေလူတိမပိုင် အမှန်တရားကို အမှန်တရားကရာ ပိုင်ဆိုင်ရေအတွက်နန့်  အမှန်တရားကိုသီးခြားနိန်ရာတခုပီးပနာ လူတိမှာဖြစ်လာရေ ပြဿနာတိကို ဆုံးဖြတ်ပီးခိုင်းခြင်းက ပဋိပက္ခဖြေရှင်းရေးအတွက် ပိုလို့ အထောက်အကူဖြစ်စီနိုင်ဖို့ လို့ ယူဆမိရေ။ ဥပမာ- ရခိုင်အမျိုးသားထုတရပ်လုံးကိုယ်စားပြုတက်ရောက်တေ ညီလာခံမှာ လူထုပဋိဥာဉ်စာချူပ်တခုချူပ်ဆိုပနာ အမျိုးသားညီညွတ်ရေးနန့် အတွင်းပြဿနာဖြေရှင်းရေးအတွက် အတည်ပြုပြဌါန်းထားလိုက်ကေ ရခိုင်အချင်းချင်းကြားမှာ တရားမျှတတန်းတူညီမှုနန့် ငြိမ်းချမ်းရေးကို တည်ဆောက်လာနိုင်ဖို့ လို့ ထင်ရေ။ ယေမှရာ တစုတစည်းတည်းဟိရေ အမျိုးသားအင်အားကိုတည်ဆောက်လာနိုင်ပနာ လိုချင်ရေပန်းဖူးကို ဆွတ်ခူးလာနိုင်ဖို့ လို့  ယုံကြည်လိုက်ပါယင့်။ ။ ။ခိုင်အောင်အောင်Friday, February 6, 2009
"ရခိုင်ရို့ အတွက် အနာဂတ်ခရီး"
ခိုင်အောင်အောင်သမိုင်းမှတ်တမ်းတိအရ ဘီစီ ၃၃၂၅ ခုနှစ်ကပင် သီးခြားလွတ်လပ်ပြီးကေ အချူပ်အချာအာဏာပိုင်ဆိုင်ရေ တိုင်းပြည် တပြည်အဖြစ် ကမ္ဘာ့မျက်နှာပြင်ထက်မှာ ကိုယ့်စံ ကိုယ်ဟန် ကိုယ့်အားမာန်နန့်  ရပ်တည်ပါလတ်တေ ရခိုင်ပြည်ရေ အေဒီ ၁၇၈၄ ဒီဇင်ဘာလ ၃၁ ရက်နိန့် မှာ မောင်ဝိုင်းဦးဆောင်ရေဗမာပဒေသရာဇ်တိ မတရားကျူးကျော် နယ်ချဲ့ ပနာ သိမ်းပိုက်ခြင်းကို ခံလိုက်ရရေ။ ယင်းအချိန်ကပင် ရခိုင်ရို့ ၏နိုင်ငံရေးပါဝါ (Arakanese Political Power)၊ မွီးရာပါလူ့  အခွင့်အရေး (Fundamental Human Rights)၊ ကိုယ့်ကံကြမ္မာ ကိုယ်ဖန်တီးပြဌါန်းပိုင်ခွင့် (Self-determination) နန့်  လူမှုစီးပွါးဖွံဖြိုးတိုးတက်မှုတိ (Socio-economic growths and developments) အားလုံးဆုံးရှုံးလားခရရေ။ "လူမျိုး တမျိုးကိုတခြားလူမျိုးတမျိုးက ကိုလိုနီပြုဖိနှိပ်အုပ်ချူပ်ထားကေ အအုပ်ချူပ်ခံ လူမျိုးရေ တခါလေ့ဖွံဖြိုးတိုးတက်လီဖို့  မဟုတ် " ဆိုရေ စကားက လုံးဝမှန်ကန်ကြောင်းကို ဗမာစစ်ပဒေသရာဇ်တိ သွီးစုပ်နှိပ်စက်အုပ်ချူပ်နိန်ရေ အဂုခေတ် ကာလရခိုင်ပြည် အခြေအနေက သက်သီခံပြနိန်ရေ။ နှစ်ပေါင်းရာနန့် ချီပနာ သက်တမ်းရှည်လာနိန်ရေ ရခိုင်ရို့ အဖြစ်ဆိုး (The tragedy of Arakan)၊ အစုလိုက်အပြုံလိုက် ဒုက္ခရောက်ရခြင်း (Mass of tormented)၊ စိတ်သောကဖိစီးမှု (Careworn)၊ အကြောက်တရား (Fear) နန့်  ၀ီခွဲမရ လမ်းစပျောက်နိန်ရရေလူတိ (Bewildered human beings) ဒေပိုင်ဘ၀အနိဋ္ဌါရုံတိက လွတ်မြောက်အောင် ရုန်းကန်ကြိုး ပမ်းကတ်ရဖို့ စွာရေ သွီးစစ်တေအမျိုးသားရေးတာဝန်နန့်  လူသားဖြစ်ခြင်း၏ ဂုဏ်သိက္ခာကို ရယူလိုခြင်း ၀တ္တရားပင်ဖြစ်တေ။ လူစိတ်ပျောက်နိန်ရေ ဗမာစစ်ဝါဒီတိနန့် ယင်းသူရို့ စစ်အုပ်ချူပ်ရေး ယန္တရားအောက်က ဖောက် ထွက်ပနာ ရခိုင်ရို့  ကိုယ်ပိုင် အနာဂတ်ခရီးသစ်ကိုလားနိုင်ခါမှရာ ရခိုင်ရို့  လူ့ ဘောင်နန့်  မျိုးဆက်တိကို ထိန်းသိမ်း လာနိုင်ဖို့ ။ဒေနိန်ရာမှာ အရေးကြီးဆုံးက ရခိုင်တိအားလုံးဘက်ပေါင်းစုံက အောက်ကျနောက်ကျ လူလုံးမ လှဖြစ်နိန် ကတ်တေအချိန်မှာ ဇာပိုင်အင်အားနန့် ဗမာစစ်အုပ်စုလက်အောက်က ရုန်းထွက်ပနာ လွတ်လမ်း ရှာနိုင်ဖို့ လဲ ဆိုရေ မိန်းခွန်းပင် ဖြစ်တေ။ ဒေမိန်းခွန်းကို အဖြေရှာဖို့  သမိုင်းကပီးရေ သင်ခန်းစာတိကို လေ့လာခြင်း နန့်  နိုင်ငံရေး ယိုင်ကျေးမှုကိုပြန်ပြင်ခြင်း ဆိုရေ အပိုင်းချေ (၂) ခု ခွဲပနာ သုံးသပ်တင်ပြချင်ရေ။ သမိုင်းကပီးရေသင်ခန်းစာတိကို လေ့လာခြင်း ရခိုင်ရို့ သမိုင်းကို လှန်ကြည့်လိုက်ကေ အလိမ်ခံရခြင်းစာမျက်နှာတိနန့်  ပြည့်နိန်ရေ။ စီးပွါးရေးပျက်ကိန်းဆိုက်ပြီးကေ နန်းတွင်းအရှုပ်အထွီးနန့်  အချင်းချင်းသွီးကွဲပနာ ရခိုင်ပြည်ထိန်းမနိုင်သိမ်းမရဖြစ်နိန်ရေ အချိန်မှာ မဟာသမ္မတရာဇာကို နန်းချပြီးကေ မင်းသားဟရီကို နန်းတင်ဖို့  အေမင်းသားကို ထောက်ခံရေ ရွာစားမြို့ စားတိက ဗမာပဒေသရာဇ်မင်း ဘိုးတော်မောင်ဝိုင်းနန့် လားပြီးကေ မဟာမိတ်ဖွဲ့ ခကတ်တေ။ သူခိုးကို ဓါးရိုးကမ်း ဒမြကို အိမ်တန်းခါးဖွင့်ဗျာယ်ကြိုမိ ခရေ အကျိုးဆက်ကြောင့် မြောက်ဦးမြို့ ထီးနန်းကျပနာ ဗမာတိသိမ်းခြင်းကိုခံလိုက်ရရေ။ "နောက်မြီးဆွဲစိတ်နန့်  သူတပါးကိုအားကိုးရေစိတ်ဟိရေ လူတိုင်း ဒေပိုင်အမှားမျိုးကို ကျူးလွန်တတ်တေ။ အဂုခေတ် ရခိုင်ရို့  သတိထားစရာ ပင်ဖြစ်တေ" လို့  ရခိုင်အမျိုးသားခေါင်းဆောင်ဆရာစံကျော်ထွန်းက သူရီးထားခရေ "ဇာလုပ်ကတ်ဖို့  လေး" စာအုပ်မှာ သတိပီးပြောထားခစွာကို ဖတ်ရရေ။ ရခိုင်အမျိုးသားတော်လှန်ရေးခေါင်းဆောင်တယောက်ဖြစ်တေ ဗုံပေါက်သာကျော် ကလေ့ သူရီးခရေ "တော်လှန်ရေးခရီးဝယ်" စာအုပ်မှာ "ဂျပန်ကိုတော်လှန်ဖို့  အင်္ဂလိပ်ကိုဆက်သွယ်ပနာ ပူးပေါင်း ဆောင်ရွက်နိုင်ဖို့ အတွက် ရခိုင်ပြည်ကခေါင်းဆောင်တိနန့်  ဗမာတိလာလို့ တွီ့  ဆုံဆွေးနွေးကတ်တေခါ ရခိုင်ခေါင်း ဆောင်ရို့ က "ဗြိတိသျှဗားမား လွတ်လပ်ကေ ရခိုင်ပြည်ကို သီးခြားလွတ်လပ်ရေးပီးရဖို့ လို့ တောင်းဆိုရေခါ ဗမာကိုယ် စားလှယ်တိက အလွယ်တကူသဘောတူကတ်တေ။ ယင်းလောက်နန့် မလုံလောက်သိမ့်လို့  ဗုံပေါက်သာကျော် ကိုယ်တိုင် ရန်ကုန်ဖဆပလဌါနချူပ်မှာ ဆွေးနွေးခါလေ့ ယင်းအတိုင်းသဘောတူချက်ရခရေ။ ယင်းအတွက်နန့်  ဘုံရန်သူဖက်ဆစ်ဂျပန်ကို တော်လှန်ရေးအတွက် ရခိုင်ခေါင်းဆောင်ရို့  ဗမာခေါင်းဆောင်တိနန့် ပူးပေါင်းခကတ်တေ" လို့  မှတ်တမ်းတင်ရီးထားခရေ။ ၁၉၄၈ အင်္ဂလိပ်ဘားက လွတ်လပ်ရေးရရေခါ ရခိုင်သားစွာ လွတ်လပ်တေစာရင်း မှာမပါ။ ဗမာဘားမှာ အလိမ်ခံရပနာ ဗမာကိုလိုနီစစ်ကျွန်ဖြစ်ပါလတ်စွာ အေနိန့် ထက်ထိပင်ဖြစ်တေ။ အထဲလားကောက်ကျစ်တေ ဗမာပရိယာယ်မာယာနန့်  မဟာဗမာအမျိုးသားရေးဝါဒက ကမ္ဘာ့နိုင်ငံရေးရာသီ ခေတ်စနစ် တိလိုက်လို့  အပြင်က သကာလူးထားပနာ ချိုချင်စွာပိုင်အကွန်ဆောင်နိန်ကေလေ့ အထဲမှာအတွင်းအနှစ်သား တမာအခါးတုံးက တခါလေ့နိန်ရာမပြောင်းလမ်းမစောင်းခ။ ဖားတပိုင်းငါးတပိုင်း ပါလီမန်ဗမာဒီမိုကရေစီ၊ ဗမာ့နည်း ဗမာ့ဟန်ဆိုရှယ်လစ်ဝါဒ နန့်  အဂု နအဖဗမာစစ်အုပ်စုပြောနိန်ရေ သိပ္ပံနည်းကျအမျိုးသားရေးဝါဒ အေယှင့်တိ အားလုံးကို ခြုံကြည့်လိုက်ကေ အဖြေက ဗမာတိကရာ နိုင်ငံရေးအာဏာကိုလက်ဝါးကြီးအုပ်ချူပ်ကိုင်ပနာ ဗမာမဟုတ်တေလူမျိုးတိကို ဗမာစစ်ကိုလိုနီကျွန်ပြုလားရေပင် ဖြစ်တေ။ မဟာဗမာကျိုင်းမြောင်း လူမဆန်ရေ အမျိုးရေးဝါဒကို အကောင်အထည်ဖော်လားရေးပင်ဖြစ်တေ။ "ပြည်ထောင်စုမပြိုကွဲရေး" ဆိုရေ စကားလုံးကို တကျာကျာအော်နိန်စွာကို ကြည့်ကေ ဗမာတိ ဇာနိုင်ငံရေးခြီလှမ်းနန့်  လားနိန်ကတ်လေဆိုစွာကို ခန့်  မှန်းသိနိုင်ရေ။ လူမျိုးကြီးဝါဒယုံကြည်မှုနန့် အယူအဆလမ်းစဉ်တိ (Chauvinistic beliefs and doctrines)၊ လူမျိုးရေးခွဲခြား မုန်းတီးမှုဝါဒ (Racialism) နန့်  ရက်စက်ကြမ်းတမ်းရေ စစ်စနစ်ပုံစံအမျိုးသားရေးဝါဒ (An aggressive and militaristic form of nationalism) တိ ပေါင်းစပ်ပနာ ဒေနိန့်  ဗမာတိကျင့်သုံးနိန်ရေ အမျိုးသားရေးဝါဒ ကို အင်္ဂလိပ်ပိုင် (Expansionist nationalism) လို့  ခေါ်ရေ။ အေ၀ါဒကို အခြီခံပနာ ဗမာမှုပြုရေးပေါ်လစီ(Burmanization Policy) ကို လက်တွီ့ ကျကျ အကောင်အထည်ဖော်ကျင့်သုံးနိန်ခြင်းပင်ဖြစ်တေ။ နိုင်ငံရေးလိမ်လည်မှုတိကို ကျူးလွန်ပနာ ဗမာအကျင့်စရိုက်ယိုင်ကျေးမှုအတွေးအခေါ်တိက ကျောရိုးခံထားရေ ဒေနိန့်  ကာလ နအဖဗမာစစ်စနစ်ရေ အနည်းဆုံးနောက်ထပ် နှစ်ပေါင်း (၃၀) လောက် အေပုံစံအတိုင်းလားနိန်ဖို့ စွာက တန်းလို့ လှမ်းမြင်နိန်ရရေ။ အစိမ်းရောင်ယူနီဖောင်းကနိန် ခေါင်းပေါင်းတိုက်ပုံပြောင်းလားနိုင်ရေ။ ယေကေလေ့ ကျိုင်းမြောင်းလူမဆန်ရေ ဗမာဝါဒက မပြောင်းလားနိုင်။ အခြီခံနိုင်ငံရေးအပြောင်းအလဲ (Fundamental Political Change) ဖြစ်လာဖို့ လမ်းစကလေ့ အ၀ီးကြီး။ ဒေနိန့် ဗမာတိကျင့်သုံးနိန်ရေ နိုင်ငံရေးပေါ်လစီက ဗမာအချင်းချင်း တီးလုံးတိုက်ပနာ နိုင်ငံရေးအာဏာကို ချူပ်ကိုင်လားရေး ပေါ်လစီပင်ဖြစ်တေ။ ကျိန်းသီနိန်စွာက ဗမာတိ၏ နိုင်ငံရေးအပြောင်းအလဲရေ ရခိုင်တိနန့် မဆိုင်။ ဗမာတိနောက်ကိုလိုက်ပနာ အမောင် တောင်မှန်း မြောက်မှန်း မသိလုပ်နိန်လို့ မဖြစ်။ အတိတ်သမိုင်းနန့် အေနိန့် ထိအောင် ဗမာဘားမှာ အလိမ်ခံနိန်ရခြင်းကို သင်ခန်းစာယူလို့  ရခိုင်တိလမ်းကိုရာ ရခိုင်တိလားပနာ ရခိုင့်နိုင်ငံရေးအဆင့်အတန်းကို မြှင့်တင်လားကတ်ရဖို့ ဖြစ်တေ။အငှားကားကို တခါလေ့ တယောက်လေ့မဆီး (No one ever washes a rented car) ဆိုရေ စကားပိုင် ရခိုင်ရို့ ကိစ္စကို တယောက် လေ့လာလုပ်ပီးဖိုမဟုတ်။ရခိုင်တိရာလုပ်ကတ်ရပါဖို။့ ။ နိုင်ငံရေးယိုင်ကျေးမှုကိုပြန်ပြင်ခြင်း ရခိုင်သားတိဇ၀ီဇ၀ါဖြစ်နိန်စွာတခုက ဒီမိုကရေစီလို့ ပြောကေ "ဗမာနောက်လိုက်" လို့ ထင်နိန်ကတ်တေ။ ကမ္ဘာကြီးမှာ ယိုင်ကျေးရေ လူမျိုးတိုင်းကျင့်သုံးနိန်ရေ လေဘရယ်ဒီမိုကရေစီစနစ်ကို ကျင့်သုံးလိုခြင်းရေ ဗမာနောက်ကိုလိုက်ခြင်း မဟုတ်လို့  ပြောချင်ရေ။ နောက်တခုက ဒီမိုကရေစီစနစ်စွာ ဗမာတိတီထွင်လိုက်တေ နိုင်ငံရေးစနစ်တခုမဟုတ်။ ယကေလေ့ဒေနိန့်  ဗမာတိပြောနိန်ရေ ဗမာ့နည်းဗမာ့ဒီမိုကရေစီနောက်ကိုလိုက်ကေတော့ သေချာရေ ဗမာ နောက်လိုက်ဖြစ်လားနိုင်ရေ။ အေနိန်ရာမှာ အဓိကထားပနာပြောချင်စွာက ရခိုင်နန့် ရခိုင်ကြားထဲမှာ ဒီမိုကရေစီ အတွေးအခေါ်ယုံကြည်မှုတိကိုလက်တွီ့ ကျကျကျင့်သုံးလားလို့  ရရေဆိုရေ စကားပင်ဖြစ်တေ။ယပြီးကေ လွတ်လပ်ရေးနန့်  ဖယ်ဒရယ်ဒီမိုကရေစီမှာ ဇာလမ်းကိုလားကတ်ရဖို့ လေးလို့  ၀ီခွဲမရဖြစ်ပနာ ငြင်းနိန်ကတ် စွာကိုတွီ့  ရရေ။ ဒီမိုကရေစီ သို့ မဟုတ် စီးပွါးရေးတိုးတက်မှုမဟိခင် တိုင်းပြည်တခုအရင်ဟိရဖို့  (Before you can have democracy or economic development, you have to have a state.) ဆိုရေ စကားတခုဟိရေ။ ကိုယ်ပိုင်တိုင်းပြည်နိုင်ငံတခုမဟိပဲနန့်  ယင်းလူမျိုးရေ ဒီမိုကရေစနစ်ကိုတည်ဆောက်လို့ မရနိုင်။ လွတ်လပ်ရေးနန့်  အချူပ်အချာအာဏာရေ နိုင်ငံရေး၏အမြင့်ဆုံးတန်ဖိုးဖြစ်ပြီးကေ အေတန်ဖိုးကို ပိုင်ဆိုင်ထားခါမှရာ ယင်းလူမျိုးရေ ကမ္ဘာ့လက်ဟိနိုင်ငံရေးစနစ်တခုဖြစ်တေ လေဘရယ်ဒီမိုကရေစီစနစ်ကို ကျင့်သုံးလို့ ရလာနိုင်ဖို့ ။ လူမျိုးတမျိုး ၏အမြင့် ဆုံးတန်ဖိုးဖြစ်တေ လွတ်လပ်ရေးနန့် အချူပ်အချာအာဏာကို ရခါမှရာ ကိုယ့်ကံကြမ္မာကိုယ်ဖန်တီးပိုင်ခွင့်ကိုရလာဖို့ ဖြစ် တေ။ အတိတ်ကာလမှာ အနုချေထွက်ခါစ ပင်လုံဖယ်ဒရယ်အိမ်မက်ကို ဗမာအမျိုးသားရေးဝါဒက နင်းခြွီဖျက်ပစ်လိုက်တေ။ ယင်းအတွက်နန့်  နိုင်ငံရေးအဖြေကောင်းတခုဖြစ်နိုင်ကေလေ့ ဖယ်ဒရယ်စနစ်စွာ ခေတ်သစ်မြန်မာနိုင်ငံအတွက် သီလားပြီးသား နိုင်ငံရေးအိုင်ဒီယာတခုဖြစ်ပါလတ်တေ (Although it can be a good political solution, the federal system is seen as an anachronism in the modern Burma). "ငြိမ်းချမ်းရေးနတ်သမီးရှိက စစ်ပွဲဆိုရေ တမန်တော် နတ်ဆိုးဟိရေ" ဆိုရေစကားပိုင် တန်းတူညီမျှရေ ငြိမ်းချမ်းရေးရဖို့  ထိုက်တန်ရေတန်ဖိုးတော့ ပီးကတ်ရဖို့ ။ ဖဲသာတစ်ယူရိုနန့်  မာစီးဒီးကားဝယ်စီးလို့ မရရေပိုင် ဗမာက စစ်ရေးနိုင်ငံရေးအင်အားတိသာနိန်ရေအချိန်မှာ လူမျိုး ပေါင်းစုံအတူတူလက်တွဲလို့ တန်းတူနိန်နိုင်ရေ ဖယ်ဒရယ်ဗဟုလူ့ ဘောင်ကိုထူထောင်ဖို့  အမျိုးသားဝါဒနန့်  စစ်သွီးကြွ နိန်ရေ ဗမာတိ စိုင်းစားဖို့ မဟုတ်စွာက လက်ဟိနိုင်ငံရေးဖြစ်စဉ်နန့် ပကတိအခြေအနေလို့ ပြောကတ်ရဖို့ ။ ဗမာတိ အများစုနိန်ရေ တိုင်းတိမှာ ပြည်တွင်းစစ်ပီသရေ ပြည်တွင်းစစ်ပွဲတိဖြစ်ကေတော့ ဗမာဖက်က ဖယ်ဒရယ်ဆိုရေ စကားလုံးကို အယင်ပိုင်လိမ်ဖို့  ပရိယာယ်တမျိုးနန့် ပြောလာနိုင်ရေ။ ရခိုင်ပြည်ကို ဗမာတိလက်ထဲက ပြန်ပနာ ဇာပိုင်ရအောင်ယူဖို့ လေး ဆိုရေ မဟာဗျူဟာအတွက် နည်းဗျူဟာ (၂) ခု တော့ဟိရေ။ပထမတခုက ရခိုင်လူထုကို အခြီခံပနာ ရခိုင့်လူထုလွတ်မြောက်ရေးတိုက်ပွဲကို ဆင်နွဲခြင်းပင်ဖြစ်တေ။ အေတိုက်ပွဲ အတွက် ရခိုင်ပြည်အထဲနန့် အပြင် ဟန်ချက်ညီညီ သွီးစည်းခိုင်မာစည်းလုံးညီညွတ်ဗျာယ် ဗမာစစ်ကိုလိုနီ ခေတ်သစ် ပဒေသရာဇ်ကို တော်လှန်ကတ်ရဖို့ ။ အနုနည်းအကြမ်းနည်းနှစ်ခုစလုံးနန့် ထိုးစစ်ဆင်ဗျာယ် လူစိတ်မဟိရေ ဗမာဒမြဂိုဏ်းစစ်သွီးကြွတိကို ရခိုင်ပြည်ကမောင်းထုတ်ကတ်ရဖို့ ။ အဂုဗမာစစ်တပ်မှာ စစ်သားအင်အား (၅) သိန်းဟိရေ။ ရခိုင်ပြည်မှာ တပ်ချ ထားစွာ အင်အား (၅) သောင်း ပတ်ဝန်းကျင်လောက်ရာဟိရေ။ ရခိုင်သား (၃) သန်းမှာ (၅) ရာခိုင်နှုန်း တစ်သိန်းခွဲ လောက် လူထုအင်အားစုနိုင်ကေတော့ ရခိုင်ပြည်ကို ဧကန်မုချပြန်ရလာနိုင်ရေ။ တော်လှန်ရေးအစ ငတ်ခြင်းက ဆိုရေ စကားပိုင် အားလုံးငတ်နိန်ကတ်တေအချိန်မှာ အေပိုင်တော်လှန်ရေးမျိုးဖြစ် လာတတ်စွာ ကမ္ဘာ့သမိုင်းမှာ မှတ်တမ်းတင်ထားကတ်စွာတိကို ဖတ်ရရေ။ ယကေလေ့ အေပိုင်တော်လှန်ရေး အထမြောက်အောင်မြင်ဖို့  ကျောထောက်နောက်ခံမဟာမိတ်နိုင်ငံတနိုင်ငံတော့လိုအပ်တေ။ ဒုတိယတခုက မီးစင်ကြည့်ကရေ နည်းဗျူဟာလို့ ပြောကတ်ရဖို့ ။ မင်းသီခေတ်ပြောင်းတတ်တေ ဗမာရာဇ၀င်နန့်  အညီ နအဖစစ်ခေါင်းဆောင်သန်းရွှေသီလို့  အလှည့်အပြောင်းကာလမှာ ရှစ်ဆယ့်ရှစ်ပိုင် တတိုင်းပြည်လုံး လူထုအုံကြွမှုဖြစ် လာကေ ရခိုင်ပြည်ကို ရခိုင်တိ အသာချေထိန်းယူပနာ လွတ်လပ်ရေးကြေညာဖို့ ပင်ဖြစ်တေ။ အေပိုင်လုပ်နိုင်ဖို့ အတွက် လူဦးရေ (၅) ထောင်လောက်ဟိရေ ကိုယ်ပျောက်စစ်တပ် (Invisible Army) ကိုကြိုတင်ဖွဲ့  စည်းထားဖို့ လိုအပ်တေ။ ကိုယ်ပျောက်စစ်တပ်ဆိုစွာ အရေးကြုံမှ လက်နက်ကိုင်ပနာ စစ်တပ်ချက်ချင်းဖွဲ့ နိုင်အောင် စစ်ပညာကိုလျှို့ ဝှက်သင်ယူ ထားခြင်းပင် ဖြစ်တေ။ အေပိုင် အထက်ကနည်းဗျူဟာနှစ်ခုစလုံးအတွက် ရခိုင်သားမှာ အင်အားတောင့်တင်းခိုင်မာရေ နိုင်ငံရေးမျိုးဆက်သစ် အုပ်စုတစုဟိဖို့ လိုအပ်နိန်ရေ။ ဒေပိုင်နိုင်ငံရေးမျိုးဆက်သစ်တရပ်ပေါ်လာဖို့  လက်ဟိရခိုင်ရို့ နိုင်ငံရေးယိုင်ကျေးမှုကို ပြန်ပြင်ရဖို့  ဖြစ်တေ။ အမျိုးသားရေးခံစားချက်ချေတခုဒေးနန့် နိုင်ငံရေးလုပ်စွာထက် နိုင်ငံရေးစနစ်အတွေးအခေါ် အယူအဆနန့်  ကမ္ဘာ့အခင်းအကျင်းအပြောင်းအလဲတိကို စနစ်တကျလေ့လာပနာ နိုင်ငံရေးတော်လှန်ရေးလောက ထဲမှာ ဘ၀မြုပ်ဇောက်ချလုပ်လားဖို့  စံမှီရေ ရခိုင်နိုင်ငံရေးသမားတိလိုအပ်တေ။ နိုင်ငံရေးပါတီအဖွဲ့ အစည်းတိလေ့ သာမန်သမရိုးကျ အဖွဲ့ ချေတိအဆင့်ကနိန် စွမ်းရည်ပြည့်ဝခေတ်မှီရေ ပရိုဖက်ရှင်းနယ်ပါတီအဖွဲ့ အစည်းတိ ဖြစ်လာအောင် ပြုပြင်ပြောင်းလဲဖွဲ့ စည်းလားကတ်ရဖို့ ။ ဗမာတိ ကနိန်ကတ်တေရာသီပေါ်နိုင်ငံရေးဇာတ်ကို ဆားမရ ရီမရအချိန်ကုန်ထိုင်ကြည့်နိန်ခြင်းထက် ရေရှည်အနာဂတ်ကို မျှော်မှန်းပနာ ကိုယ့်အင်အားကို ကိုယ်ရို့ တည်ဆောက်ဖို့  အလှည့်အပြောင်းကာလတခုကိုရောက်နိန်ဗျာယ်။ ဗမာတိက ပုံစံတကျမှိုင်းတိုက်ထားလို့  ပျက်စီးနိန်ကတ်ရရေ နိုင်ငံရေးစရိုက်ပျက်တိနန့်  သံသရာလည်နိန်ခြင်းကို အဆုံးသတ်ပနာ နိုင်ငံရေးအခင်းအကျင်းသစ်ကို ရခိုင်သားတိ ဖန်တီးကတ်ရဖို့ အချိန်ရောက်ပါလတ်ဗျာယ်လို့  ထင်ရေ။ အဂုလက်ဟိအခြေအနေထက်အဆင့်မြင့်ရေ နိုင်ငံရေး ယိုင်ကျေးမှုကိုတည်ဆောက်ကတ်ရဖို့  စွာက နိုင်ငံရေးမျိုးဆက်ဖြစ်ချင်ရေ ရခိုင်သားတိုင်း၏ တာဝန် ၀တ္တရား ပင်ဖြစ်တေ။ ရခိုင်ရို့ နိုင်ငံရေးယိုင်ကျေးမှုကို ပြုပြင်ပြောင်းလဲမှုလုပ်ဖို့  လေဘရယ် (Liberalism) အိုင်ဒီယာကို ကျင့်သုံးသင့်ရေလို့  အကြံပြုချင်ရေ။ လူတဦးချင်းစီ၏အခွင့်အရေး၊ အရည်အချင်း၊ ဖွံ့ ဖြိုးတိုးတက်ခြင်းကို ဇောင်းပီးရေ လေဘရယ် အယူအဆကို အားကောင်းအောင်လုပ်နိုင်ခါမှရာ ရခိုင်ရို့ နိုင်ငံရေးအခင်းအကျင်းပြောင်းလဲလာနိုင်ဖို့ ။ အေနိန်ရာမှာ ရှုပ်ထွီးမလားစီချင်စွာက လေဘရယ်ဒီမိုကရေစီစွာ နိုင်ငံရေးစနစ် (System) ဖြစ်ပြီးကေ လေဘရယ်လီဇင် (Liberalism)စွာ အိုင်ဒီယိုလိုဂျီ (Ideology) ဖြစ်တေ။ လေဘရယ်ဒီမိုကရေစီစနစ်ကို သီးခြားလွတ်လပ် တေတိုင်းပြည် နိုင်ငံဟိခါမှရာကျင့်သုံးလို့ ရနိုင်ကေလေ့ လေဘရယ်လီဇင် ကို လူတဦးတယောက်ချင်းစီ၏မွီးရာပါကိုယ်ပိုင်အခွင့်အရေး (Individual rights) အတွက်ကိုယ့်ဒူးကိုယ်ချွန်ပနာ ကိုယ်စွမ်းကိုယ်စဟိခြင်းကို လိုလားရေ လူပုဂ္ဂိုလ်တိုင်းက ကျင့်သုံးနိုင်ရေ။ အရေအတွက်နန့်  အရည်အချင်းပါ အားနည်းနိန်ရေ ရခိုင်ရို့ အတွက် အရေအတွက်အနည်းချေနန့်  အရည်အချင်းပြည့်ဝရေ နိုင်ငံရေးမျိုးဆက်သစ်တရပ်ကို ပြုစုပျိုးထောင်မွီးထုတ်နိုင်ခါမှရာ ရခိုင်ရို့  လူပီသလွတ်လပ် တေဘ၀ကို ရယူပိုင်ဆိုင်ဖို့  နိုင်ငံရေးတိုက်ပွဲကို ဆင်နွဲလာနိုင်ကတ်ဖို့ ။ နှစ်ပေါင်း (၂၅) နှစ်ကို အချိန်သတ်မှတ်ပနာ နိုင်ငံရေးယိုင်ကျေးမှုပြုပြင်ပြောင်းလဲရေးနန့်  မျိုးဆက်သစ်ပေါ်ထွန်းလာရေးကို အစီအစိုင်တကျ အကောင်အထည် ဖော်လားကေ ဗမာတိကျချိန်မှာ ရခိုင်တိတက်လာနိုင်ပနာ ရခိုင်ရို့ အနာဂတ်ခရီးသစ်ကို လှမ်းလားနိုင်ဖို့ စွာက အမှန်ပင်ဖြစ်ပါရေ။ ။ ။
Sunday, January 18, 2009
"ဒီမိုကရေစီကျကျ လူသားဝါဒ"
ခိုင်အောင်အောင်မတန့် တမ်းလားနိန်ရေ နိုင်ငံရေးဖြစ်စဉ်တိ နောက်မှာ နိုင်ငံရေးယုံကြည်ချက် အိုင်ဒီယာလော်ဂျီ တိဟိနိန်ရေ။မျက်စိနန့် ကြည့်မြင်တွီ့ နိန်ကတ်ရရေ နိုင်ငံရေးအခင်းအကျင်းပြကွက်တိကို ကြိုးကိုင်အကွက်ချ စီဇိုင်ညွန်ပြနိန်စွာက နိုင်ငံရေးဝါဒတိပင် ဖြစ်တေ။ ဥပမာပီးရဖို့ ဆိုကေ သီလားခပြီးသားဗမာစစ်အာဏာသျှင်နေ၀င်းရေ ဗီလိန်ဇာတ်ရုပ်နန့် အပီပြင်ဆုံး သရုပ်ဆောင်နိုင်ခအောင် မဟာဗမာအမျိုးသားရေးဝါဒက အသက်သွင်းဇာတ်တိုက် မောင်းနှင်ပီးပစ်ခရေ။ ဒေနိန့် ကာလ နအဖဗမာသန်းရွှေစစ်အုပ်စုကလေ့ မဟာဗမာအစွန်းရောက်အမျိုးသားရေး ၀ါဒသွီးနန့် ရှင်သန်နိန်ကတ်တေ စစ်ဝါဒီတိရာ ဖြစ်တေ။ ယင်းအတွက်နန့်  ကျိုင်းမြောင်းရေ အမျိုးသားရေးဝါဒ ဥခွံထဲက ဗမာတိရုန်းမထွက်နိုင်ရေ ကာလပတ်လုံး လူ့  ယိုင်ကျေးတိ လက်ခံကျင့်သုံးရေ ဒီမိုကရေစီစနစ်ဆိုစွာ မြန်မာနိုင်ငံမှာ ပေါက်ဖွားဖြစ်ထွန်းလာဖို့  မဟုတ်စွာက ကျိန်းသီနိန်ရေ။ ဒေမဟာဗမာ အမျိုးသားရေးဝါဒမြစ်မကြီးက ခွဲဖြာစီးဆင်းလား ရေ မြစ်ချေသုံးမြစ်ကို အေပိုင်တွီ့ လာရရေ။ ပထမမြစ်ချေက အင်္ဂလိပ်ပိုင် (Factionalism) လို့ ခေါ်ရေ ဂိုဏ်းဂနစွဲဝါဒ၊ ဒုတိယက (Cronyism)လိုခေါ်ရေကိုယ်နန့်သိရေလူတစုလောက်နန့် ရာဝီစားမျှစားလုပ်တေ၀ါဒနန့်  တတိယက (Nepotism) လို့ ခေါ်ရေ ဆွေမျိုးမိသားစု ကောင်းစားရေး ၀ါဒတိပင် ဖြစ်တေ။ ဒေအယူဝါဒတိကို နအဖဗမာစစ်အုပ်စု ထဲမှာ ထထင်ရှရှားတွီ့  ကတ်ရရေပိုင် ဗမာအတိုက်အခံနိုင်ငံရေးအင်အားစုထဲမှာလေ့အေအကျင့်တိကိုမြင်တွီ့နိန်ကတ်ရရေ။ ပိုပြီးကေ စိတ်ဝင်စားဖို့ ကောင်းစွာက ဗမာတိမှာ ရာဇ၀င်နန့် ချီပနာ ဥပဒေ ဆိုစွာကို လက်ကိုင်ထား မကျင့်သုံးခကတ်။ (Absolutism) သက်ဦးဆံပိုင်ဘုရင်စနစ်ရာ ဟိပြီးကေ စည်းမျဉ်းခံဘုရင်စနစ် (Constitutional Monarchy) ဆိုစွာ ဗမာသမိုင်းမှာ မဟိခ။ တရားမျှတရေ ဥပဒေတိမှာ အခြေမပြုရေ အေပိုင်နိုင်ငံရေးယိုင်ကျေးမှုက မြန်မာနိုင်ငံမှာ ဒီမိုကရေစီဖြစ်ထွန်းလာဖို့ စွာကို အကြီးအကျယ်ပိတ်ဆို့  တားဆီးနိန်ခြင်းပင်ဖြစ်တေလို့ သုံးသပ်ရပါဖို့ ။ အားလုံးသိကတ်တေ အတိုင်း ဒီမိုကရေစီစွာ လူတိ၏သဘောတူညီမှုဆန္ဒတ်ိနန့် ရွီးဆွဲထားရေ ဥပဒေဿတိကို လိုက်နာကျင့်သုံး အကောင်အထည် ဖော်ခြင်းပင်ဖြစ်လို့  လူတစုဘားမှာရာ နိုင်ငံရေးအာဏာတည်ဟိနိန်ချင်ရေ ဗမာတိ ဓလေ့စရိုက်နန့်  ဆန့် ကျင်ဖက်ဖြစ်နိန်ရေ။ နောက်တခုက ဗမာတိမှာ ကွဲပြားခြားနားခြင်းကို လက်ခံကျင့်သုံး နိုင်ရေ ဗဟုဝါဒနန့်  အတူယှဉ်တွဲ နိန်ထိုင်လိုစိတ် (Pluralism and integrated mind) ပျောက်နိန်စွာကို တွီ့ ရရေ။ ဒေယှင့်က မြန်မာနိုင်ငံမှာ ဗမာကလူအများစုဖြစ် ကေလေ့ နိုင်ငံကြီးသားစိတ်မဟိစွာကို ဖော်ပြနိန်ရေ။ စစ်စနစ်မွီးဖွား ရှင်သန် လာရခြင်းရေ လူတိ၏ဓလေ့စရိုက်တိနန့် ဆက်စပ်နိန် လို့  ဗမာတိအသိအမြင်ကျယ်လာခြင်းကရာ မြန်မာနိုင်ငံမှာ နိုင်ငံရေးအခင်းအကျင်း သစ်ကိုပြောင်းလဲလာနိုင်စီဖို့ ထင်ရေ။ ယကေလေ့ ရာစုနန့် ချီပနာ အမြစ်တွယ်လာလတ်တေ ဒေအကျင့်တိကို ပြုပြင်ဖို့ ဆိုစွာ လက်တွီ့  မှာ ထင်သလောက် မလွယ်ကူနိုင်။ အေနိန့် ထက်တိုင် နိုင်ငံရေးပင်မရီစီးကြောင်းကို ဗမာတိကရာ ချူပ်ကိုင်ထားလို့  အပြင်ပန်းနန့် အနှစ်သာရပါ တခုလေ့မပြောင်းလာခြင်းကို သတိချပ်သင့်ရေ။ ဗမာဗဟိုပြုရေချဉ်းကပ်မှု (Burman-based approach) နန့်  မြန်မာနိုင်ငံ ၏နိုင်ငံရေးပြဿနာကို လုံးဝမဖြေရှင်းနိုင်ကြောင်းကို ကုန်လွန်လားခရေ ကာလတိက သက်သီခံနိန်ရေ။ ဇာစနစ်နန့် ဇာသူပင် အုပ်ချူပ်ချူပ် ဗမာတိလက်ထဲမှာ နိုင်ငံရေးအာဏာဟိရေးက အဓိကမဟာဗျူဟာဖြစ်နိန်လို့  နအဖစစ်အုပ်စု သက်ဆိုးရှည်နိန် ရခြင်းပင် ဖြစ်တေ။ ယင်းပိုင်ဆိုကေတခုပိုင်လေ့ အဖြေမဟိဗျာယ်ဂါလို့  မိန်းခွန်းထုတ်ချင်စိတ်ပေါ်လာလီမေ။ ဇာပိုင်ဖြေရှင်းရဖို့ လဲ ဆိုရေ အဖြေကိုသိကေ လူတိ ဖန်တီးရေ နိုင်ငံရေးပြဿနာကို လူတိဖြေရှင်းနိုင်ရေ။ အရေးကြီးဆုံးက နိုင်ငံရေးအပြောင်းအလဲကို ဗမာတိလက်ထဲမှာ ပုံမအပ်ထားပဲ ကိုယ့်စံကိုယ့်ဟန်နန့်  ကိုယ့်အင်အားကို ကိုယ်တည်ဆောက်ခြင်း ကရာ နောင်တချိန်မှာ ကိုယ်လိုချင်ရေနိုင်ငံရေးအခွင့်အရေးကိုရယူပိုင်ဆိုင်လာနိုင်ပါဖို့။ဒေနိန်ရာမှာ ရခိုင်အများစုက ဒီမိုကရေစီလို့ ပြောကေ ဗမာနောက်လိုက်ဖြစ်လားဖို့ လို့့ ယူဆနိန်ကတ်တေ။ ဒေနိန့် ကာလ ဗမာတိပိုင် ပါးစပ်က ဒီမိုကရေစီလို့ ပြောပနာ လက်တွီ့ အလုပ်လုပ်တေခါ မဟာဗမာလူတစုဝါဒကို ကျင့်သုံးနိန်ကေတော့ခါ သေချာရေ ဗမာနောက်လိုက်ဖြစ်လားနိုင်ရေ။ သို့ သော် ဒီမိုကရေစီ၏ပင်မရင်းမြစ်နန့်အနှစ်သာရရေရခိုင်ရို့လူ့ဘောင်နန့် လိုက်လျောညီထွေမှုဟိရေ။ ရခိုင်ရို့ သမိုင်းမှာ စည်းမျဉ်းခံဘုရင်စနစ်ကို ကျင့်သုံးခရေ။ ရခိုင်ဘုရင်မင်းထီးရေ သူ ချထားရေ စည်းကမ်းကို သူ ချိုးဖောက်မိလို့  သူ့့လက်ညှိုးကို သူဖြတ်ပနာ တရားမျှတခြင်းဥပဒေဿ၏အရိပ်မှာ ခိုဝင်နိန်ထိုင်ခရေ။ ဗမာတိ ရခိုင်နိုင်ငံကို မသိမ်းခင်ကာလမှာ ရခိုင်ပြည်မှာ ရခိုင်ပြည်သူ့ သမ္မတနိုင်ငံ (People Republic of Arakan) ကို ထူထောင်ခကတ်တေ။ ကမ္ဘာ့နိုင်ငံရေးစီးကြောင်း အပြောင်းအလဲနန့်  ၁၇၇၆-ခုနှစ် အမေရိကန်လွတ်လပ်ရေးအကြောင်းကို ယင်းအချိန်က နိုင်ငံတကာနန့် ကူးသန်း ရောင်းဝယ်ရေးလုပ်နိန်ရေ ရခိုင်ခေါင်းဆောင်တိ မသိဘဲနိန်လီဖို့ မဟုတ်။ အတိုချူပ်ပြောရဖို့  ဆိုကေ လစ်ဘရယ် ဒီမိုကရေစီ၏ အနှစ်သာရကျင့်စဉ်တိကို ဒေနိန့် ကာလ ရခိုင်လူ့ အဖွဲ့ အစည်းအတွက် ကျင့်သုံးဖို့ ကြိုးစားခြင်းရေ ဗမာ နောက်လိုက်လုပ်ခြင်းမဟုတ်ကြောင်းပင် ဖြစ်တေ။ ဗမာနန့် ရခိုင်ကြားမှာ ဒီမိုကရေစီ မဖြစ်ထွန်း နိုင်ကေလေ့ ရခိုင်နန့်  ရခိုင်ကြားမှာ ဒီမိုကရေစီကျင့်သုံးလို့ ရနိုင်ရေ။ ထုံးစံအတိုင်း ဖျက်မြင်းတိကတော့ဟိဖို့ ။ ဗမာတိဘားမှာ နှစ်ပေါင်းရာနန့်  ချီပနာ ကျွန်ဖြစ်လာရရေအတွက်နန့်  ရခိုင်သားတိထဲမှာလေ့ ဗမာပိုင်ခေတ်နောက်ပြန်ဆွဲပနာ ပဒေသရာဇ်စိတ် ပေါက်နိန်ရေလူတိက တပုံကြီး။ ယကေလေ့ လူသားဝါဒနန့် တရားမျှတခြင်းကို တန်ဖိုးထားခရေ အစိုင်အလာက ရခိုင့်လူ့ ဘောင် မှာ ဒီမိုကရေစီဖြစ်ထွန်းနိုင်ရေ ရီခံမြီခံကောင်းပင်ဖြစ်တေ။ လူတဦးချင်းစီ၏ကိုယ်ပိုင်အခွင့်အရေးကို အာမခံပီးရေ ဒီမိုကရေစီကျကျ လူသားဝါဒကိုကျင့်သုံးခြင်းကရာ ရခိုင်လူ့ ဘောင်လွတ်လမ်းပင် ဖြစ်တေလို့ နိဂုံးချူပ် ပြောချင်ရေ။ ။ ။
Tuesday, January 6, 2009
"ယုံကြည်မှု လူမှုရင်းမြစ်နန့် ရက္ခိတရို့ အနာဂတ်"
ခိုင်အောင်အောင်နိုင်ငံရေး လူမှုရေးနယ်ပယ်ရပ်ဝန်းတိမှာ ဟိနိန်ကတ်တေ ရခိုင်သားရို့ ၏တိမ်းညွတ်မှုက "သွီးစည်းညီညွတ်ခြင်းရေ ရခိုင်ရို့ အတွက်အဓိကလိုအင်ဖြစ်တေ" ဆိုရေ ခံယူချက်ပင်ဖြစ်တေလို့  သုံးသပ်နိုင်ဖို့ ထင်ရေ။ အတိတ်ကာလမှာ အချင်းချင်းညီညွတ်မှုပြိုကွဲခြင်းကြောင့် အချူပ်အချာအာဏာကျဆုံးလားရခြင်းနန့် လူ့ အဖွဲ့ အစည်းကြီး တခုလုံး ဖျက်ဆီးခံနိန်ရခြင်းက ရခိုင်ရို့ အတွက် မမိန့် နိုင်ရေ သမိုင်းသင်ခန်းစာ ဖြစ်နိန်ရေ။ ညီညွတ်ခြင်းအင်အားကရာ ရခိုင်ရို့  ခေတ်ကို ပြန်ပနာဆန်းသစ်လာနိုင်စီဖို့ ဆိုရေ အတွေးအခေါ်ရေ မှန်ကန်ရေ အမြင်ချေတခုဖြစ်တေလို့  ပြောချင်ရေ။ ယကေလေ့ ယုံကြည်မှု ဆိုရေ "စင်" ခံထားခါမှရာ ညီညွတ်ခြင်းရွက်နုတိ ဖူးသစ်လန်းဆမ်းသီးပွင့်လာနိုင်ဖို့ လို့  ထင်မိ ရေ။ တယောက်ကိုတယောက် မယုံကေ တယောက်နန့်  တယောက်ညီညွတ်ဖို့ ဆိုစွာ လုံးဝမဖြစ်နိုင်ပါ။ ယင်းအတွက် နန့်  ညီညွတ်ရေးစကားလုံးကို သုံးကေ ယုံကြည်မှုဆိုရေ စကားလုံးကိုအရင် ပလ္လင်ခံပနာပြောကတ်ရဖို့  လို့  ယူဆမိပါ ရေ။ ယေမှရာ သွီးစစ်တေညီညွတ်ခြင်းနန့်  ပန်းဖူးကိုရောက်နိုင်ရေ အင်အားကို ရလာနိုင်ဖို့ ဖြစ်တေ။ ယုံကြည်မှုကို ခွဲခြမ်းစိတ်ဖြာကြည့်လိုက်ကေ အကောင်းမြင်ယုံကြည်ခြင်းနန့် အဆိုးမြင်ယုံကြည်ခြင်းတိကို တွီ့ ကတ် ရရေ။ အကောင်းမြင်ဝါဒကရာ အနာဂတ်ကောင်းတခုကို ဖန်တီးဖို့ အတွက် မဟာဗျူဟာတခုဖြစ်တေ (Optimism is a strategy for making a better future)။ ယင်းပိုင်မဟုတ်ပဲ အဆိုးမြင်မှိုင်းတိစွဲကပ်ဗျာယ် အနာဂတ်စွာ ကောင်းလာ နိုင်ဖို့ မဟုတ်လို့  ယုံကြည်လိုက်ကေအနာဂတ်ကိုရုပ်လုံးဖော်တည်ဆောက်ဖို့ အင်အားဇွဲလုံ့ လတိကို တခုလေ့မလုပ်ခင် အယင်ဖြုန်းတီးဖျက်ဆီးပစ်လိုက်ခြင်းပင် ဖြစ်တေလို့ ဆိုရပါဖို့ ။ မျှော်လင့်ချက်မဟိလို့  ထင်မြင်မိကေ မျှော်လင့်ချက်ဟိ လာဖို့ မဟုတ်လို့  အာမခံလိုက်ခြင်းပင် ဖြစ်တေ (If you assume that there is no hope, you guarantee that there will be no hope)။ "တခုလေ့ဖြစ်မလာနိုင်ဝေး" ဆိုပြီးကေ ကိုယ့်ဦးနှောဏ်ကို တန်းခါးပိတ်ပနာ ဖြစ်နိုင်ခြင်းတိ ကိုရှာဖို့ လမ်းတိကိုဖျောက်ပစ်လိုက်ခြင်းက ရခိုင်ရို့ ကြားထဲမှာ စိမ့်ဝင်ပျံ့ နှံ့ နိန်ရေ မိမိကိုယ်ကို ယုံကြည်မှုပျောက်နိန် ခြင်း အိုင်ဒီယာပိုင်းဆိုင်ရာအကျပ်အတည်း (Ideological crisis) တခုပင် ဖြစ်တေလို့  ပြောရဖို့ ထင်ရေ။ နာမေကြီး လူမှုသိပ္ပံပညာသျှင် ဖရန်စစ် ဖူကူယားမား(Francis Fukuyama) က ယုံကြည်မှုစွာ လူ့ ဘောင်တိုးတက်ဖွံ့ ဖြိုးဖို့  အခြေခံအကျဆုံး အလိုအပ်ဆုံးနန့် အကောင်းဆုံး လူမှုစံတန်ဖိုး (Social virtue) တခုပင်ဖြစ်တေလို့  ဆိုဖူးရေ။ ယုံကြည်မှုနန့် အယူအဆအားကောင်းလာခါမှရာ နိုင်ငံရေးယုံကြည်ချက်(Political conviction) ခိုင်မာတောက်ပလာဖို့့ ဖြစ်ပါရေ။ လူ့ အဖွဲ့ အစည်းညီညွတ်ရေးအတွက် ယုံကြည်မှုပိုင် အာရုံစိုက်အလေးထားသင့်ရေ နောက်တခုကတော့ကေ လူမှုရင်း မြစ် (Social capital) ပင်ဖြစ်ပါရေ။ လူမှုဗေဒပညာရှင် ဂျိမ်း(စ်)ကိုး(လ်)မန် (James Coleman) က လူမှုရင်းမြစ်ကို "အသင်းအဖွဲ့  အုပ်စုတိထဲမှာ အလုပ်အတူတူလုပ်နိုင်ရေ လူတိ၏စွမ်းရည်" လို့ အဓိပ္ပါယ်ဖွင့်ဆိုဖူးပါရေ။ ဖရန်စစ်ဖူကူ ယားမား ကတော့ကေ "မျှဝီထားကတ်တေ စံနန့် တန်ဖိုးတိဘားမှာ အခြေခံပနာ ဘုံရည်မှန်းချက်ပန်းတိုင်ကိုလား ကတ်ဖို့  ပေါင်းစပ်လက်တွဲအလုပ်လုပ်ခြင်း" လို့  လူမှုရင်းမြစ်ကို ရှုမြင်ပါရေ။ စီးပွါးရေးပညာသျှင်တိက တိုင်းပြည်လူ့  ဘောင်တိုးတက်ခြင်းရေ လူသားရင်းမြစ် (Human capital) ဖြစ်တေ အသိပညာနန့် စွမ်းရည် (Skills and Knowledge) တိဘားမှာရာ မူတည်နိန်ရေလို့  နားလည်လက်ခံထားကတ်ကေလေ့ ဒေ အသိပညာနန့် စွမ်းရည်ပြည့်ဝ ရေ လူတိအတူတူလက်တွဲအလုပ်လုပ်နိုင်ဖို့  လူမှုရင်းမြစ် လိုအပ်သိမ့်ရေ လို့  ဂျိမ်း(စ်)ကိုး(လ်)မန် က ထောက်ပြပြောဖူးခပါရေ။ ဒေနိန်ရာမှာ စီမံခန့်  ခွဲမှုနည်းပညာနန့်  လူမှုရင်းမြစ်ကို မှားပနာ မမြင်မိဖို့ အရေးကြီးပါရေ။ စီမံ ခန့် ခွဲမှုက နည်းပညာနန့်  အသင်းအဖွဲ့  တိ၏ ပြုမှုလုပ်ဆောင်ချက်သဘောဆန်ပနာ လူမှုရင်းမြစ်က ကျယ်ပြန့် ရေလူ့ အဖွဲ့  အစည်းအတွင်း ပိုင်းက ယုံကြည်မျှဝီနားလည်မှုတိ ဖြစ်ပါရေ။ ရခိုင်သားတိမှာ လူမှုရင်းမြစ်နန့် စီမံခန့်  ခွဲမှုနည်းပညာပိုင်းမှာပါ အား နည်းနိန်စွာကိုတွီ့ မြင်နိန်ကတ်ရရေ။အသိပညာနန့် စွမ်းရည်အားမကောင်းခြင်းကပါ ခိုင်မာရေအသင်းအဖွဲ့  အဆောက် အအုံကြီးတိ (Institutions) မတည်ဆောက်နိုင်အောင် ဟန့် တားထားရေလို့  ပြောကတ်ရပါဖို့ ။ ဘုံနိုင်ငံ ရေးအမြင်နန့်  သွီးစစ်တေ အမျိုးသားရေးစိတ်ဓါတ်တိ ရခိုင်သားတိုင်းမှာ ရှင်သန်နိန်ကတ်ကေလေ့ နိုင်ငံရေး တော်လှန် ရေးအဖွဲ့  အစည်းတိနန့် နိုင်ငံရေး သမားတော်လှန်ရေးသမားရို့ ၏ စည်းရုံးမှုနန့်  ခေါင်းဆောင်နိုင်မှုအရည် အချင်းညံ့ ဖျင်းနိန်ခြင်း ၏အကျိုးဆက်က နိုင်ငံရေးမှာ ရခိုင်လူထု၏ထဲထဲဝင်ဝင်လုပ်ဆောင်လာကတ်ခြင်းက ကျဆင်း နိန်ရေ။ ကိုယ်မယုံကြည် ရေ နိုင်ငံရေးသမားကို မထောက်ခံစွာက လူသားရို့ သဘာဝလို့ ပြောရဖို့ ထင်ရေ။ လူမှုရင်းမြစ် ကို အားကောင်းအောင် အရင်တည်ဆောက်ပြီးခါမှရာ ရခိုင်လူထု၏ပူးပေါင်းမှု မြင့်မားရေနိုင်ငံရေးနယ်ပယ်တခုကိုတည်ဆောက်နိုင်ဖို့လိုပြောချင်ရေ။ ယေကေ လူမှုရင်းမြစ်တိ အားကောင်းမောင်းသန်ဖြစ်လာအောင် ဇာပိုင်လုပ်ကတ်ရပါဖို့ လဲ။ အသိပညာကို တူးဖော် ခြင်းကရာ လူမှုရင်းမြစ်ကို အားကောင်းအောင်လုပ်ဖို့  အဓိကလမ်းကြောင်းမှန်ပင်ဖြစ်ပါရေ။ ယပြီးကေ ခေါင်းဆောင် မှုစွမ်းရည်ပြည့်ဝရေ နိုင်ငံရေးမျိုးဆက်သစ်တိမွီးထုတ်ပီးခြင်းနန့်  လူကိုအခြေမပြုပဲ မူဝါဒရေးရာဘားမှာ အခြေခံရေ လူမှုရေးနိုင်ငံရေးအဖွဲ့ အစည်းတိ (Principles based social and political organizations) ဖွဲ့  စည်းတည်ထောင် ခြင်းကရာ ရခိုင်ရို့ လူမှုအခင်းအကျင်းသစ်ကို ဖန်တီးလာနိုင်ဖို့ လို့  ယူဆမိပါရေ။ လူချင်းတူကေလေ့ လူစွမ်းလူစ ကွာခြားနိန်ခြင်းကြောင့် အနာဂတ်မှာ ကြုံတွီ့ လာနိုင်ရေ စိန်ခေါ်မှုတိကို ရင်ဆိုင်ဖြေ ယှင်းလားဖို့  ကမ္ဘာ့ရွာထက်မှာဟိရေ လူ့ အဖွဲ့ အစည်းတိုင်းအတွက် ခေါင်းဆောင်ဆိုစွာ ရက်ပြတ်လိုအပ်နိန်ရေအရာတခုဖြစ်နိန်ဖို့စွာကလူသားရို့၏သဘာဝနိယာမတရားတခုလို့ယူဆမိရေ။ စုပေါင်းခေါင်းဆောင်မှု၏အကျိုးရလဒ်ကရာလူ့အဖွဲအစည်းတခုလားနိန်ရေအနာဂတ်လမ်းကြောင်းကိုအကောင်းဆုံးလမ်းညွှန်ပြပီးနိုင်ရေထင်မိရေ။ သေချာနိန်စွာတခုက ရက္ခိတရို့  အနာဂတ်ကို လှမ်းမြင်ကြည့်နိုင်ဖို့ ပစ္စက္ခကာလမှာ ကြိုတင်ပြင်ဆင်တည်ဆောက်ကတ်ဖို့လိုနိန်စွာကအမှန်ပင်ဖြစ်တေ။လူမျိုးတမျိုး၏အနာဂတ်စွာယင်းလူမျိုး၏နိုင်ငံရေးဆိုင်ရာအခွင့်အရေးပြည့်ပြည့်၀၀ရဟိခြင်းမှာမူတည်နိန်ရေဖြစ်တေအတွက်အခြေခံနိုင်ငံရေးအဆောက်အအုံတိအားကောင်းလာရေးကိုဦးစားပီးလုပ်ဆောင်လားပနာလူစွမ်းလူစဟိရေနိုင်ငံရေးမျိုးဆက်သစ်ခေါင်းဆောင်တ်ိကို ပြုစုပျိုးထောင်ပီးခြင်းကရာ နောင်တချိန်မှာ ရခိုင်ရို့ အနာဂတ်ကို ရခိုင်တိရာ ပိုင်ဆိုင်လာနိုင်ဖို့ လို့  ယုံကြည်မိလိုက်ပါယင့်။ ။ ။
Thursday, December 25, 2008
"ရခိုင်ရို့ လွတ်လမ်းကို မှန်းမျှော်ကြည့်ခြင်း"
ခိုင်အောင်အောင် အချိန်ကာလဆိုရေအသက်သွီးနန့်လည်ပတ်ပနာအသက်ရှင်နိန်ရေရာစုသစ်ပင်ကပြက္ခတိန်ရွက်ဟောင်းချေတရွက်ကြွီကျလားခြင်းပဂျီကားချပ်ချေတခုကိုခင်းကျင်းပြသနိန်ရေအချိန်မှာနောက် ထပ်ရွက်နုချေတရွက်က အဆင်သင့်ဖူးသစ်ဗျာလ် ထွက်လာလတ်ဖို့  တာစူနိန်ရေ။ ရာသီ သဘာဝ က မျိုးဆက်မပြတ်လက်ဆင့်ကမ်းလားခြင်းကို တာဝန်မပျက်လုပ်ဆောင်ပီးနိန်ရေလို့  ပြောကတ်ရဖို့ ထင်ရေ။ ဒေပိုင် ရာစုသစ်ပင်ကရွက်နုပြန်ရေအချိန်မှာ ရခိုင်ရို့ အတွက်က သွီးမတိတ်သိမ့်ရေ သမိုင်းအနာကို ပျောက်အောင်ကုသဖို့  ဆီးရှာလို့ မတွီ့ နိုင်သိမ့်ရေ ဘ၀ကို ရောက်နိန်ကတ်ရရေ။ ဇာပင်ဖြစ်ဖြစ် လူတိဖန်တီးရေ ပြဿနာအားလုံးကို လူတိဖြေရှင်းနိုင်ရေဆိုရိုးစကားအတိုင်းအတိတ်ကအရှုံးကိုပြောင်းပြန်လှန်ပနာအောင်မြင်ခြင်းအနာဂတ်သစ်ကိုတည်ဆောက်လားနိုင်ဖိုကပစ္စက္ခမှာကျင့်သုံးသင့်ရေအကောင်းဆုံးမဟာဗျူဟာနည်းဗျူဟာပင် ဖြစ်တေလို့ ထင်မြင်မိရေ။ကမ္ဘာ့လူ့ သမိုင်းမှာ အရပ် ၅ ပေ ရာဟိရေ ကျွန်သားချေတယောက်က ဥရောပတိုက်ကြီးတခုလုံး ကို သိမ်းပနာ ပြင်သစ်အင်ပါယာကို ထူထောင်နိုင်ခရေ။ ယင်း ကျွန်သားချေ နပိုလီယံ ဘိုနာဘတ် (Napoleon Bonaparte) ၏ စိတ်ကူးအိမ်မက်က တခုတည်းရာဟိရေ ဥရောပကို ဖွဲ့  စည်းတည် ဆောက်ရေးပင် ဖြစ်တေ။ ဒုတိယကမ္ဘာစစ်အလွန်မှာ ဖြစ်တည်လာရေ ဒေနိန့် ကာလ ဥရောပ သမဂ္ဂရေ နပိုလီယံ မက်ခရေ အိမ်မက်အပိုင်းအစကောက်ကြောင်းတိကို ချဉ်းကပ်မှုပုံစံသစ်နန့်  ဆက်စပ်ထားခြင်းပင် ဖြစ်တေလို့  ပြောကေလွန်လီဖို့ မထင်မိပါ။ နပိုလီယံက "တော်လှန်ရေးကို တည်ဆောက်လို့ မရရေပိုင် ရပ်ထားလို့ လေ့မရနိုင်ပါ။ အနိုင်ရဟိခြင်းလုံ့  လစွမ်းအားတိနန့်  လမ်းညွှန်ပြခြင်းကို မျိုးဆက်သစ်အချေတိပါးကို လက်ဆင့်ကမ်းပနာ ပီးခြင်း တခုတည်းကရာ တော်လှန်ရေးကို အောင်မြင်နိုင်စီရေ" လို့ ပြောခဖူးပါရေ။ တထပ်စာ အတွေးအခေါ်နန့် ရေရှည်ကို မကြည့်ပဲ တော်လှန်ရေး တော်လှန်ရေးလို့ ထိုင်အော်နိန်ခြင်းက တော်လှန်ရေး၏အောင်မြင်မှု ပန်းတိုင်ပန်းဖူးကို မဆွတ်ခူးနိုင်လို့ ပြောခြင်းပင် ဖြစ်တေ။ နောက်ပြီးကေ သူပြောခရေ စကားချေ တခွန်းက "ခေါင်းဆောင်ဆိုစွာ မျှော်လင့်ချက်တိကို မျှဝီပီးရေ လူတယောက်ဖြစ်တေ" လို့  ဆိုပါရေ။ သေချာနိန်စွာတခုက အနာဂတ်အတွက်လားရာအမြင် (vision for future) တခုမဟိပဲ ခေါင်းဆောင်မဖြစ်လာနိုင်လို့ ပြောကတ်ရဖို့ ထင်ရေ။
နောက်ထပ် အရပ် ၅ ပေ နန့်  ၂ လက်မရာဟိရေ လူတယောက်က လူဦးရေသန်းပေါင်းနှစ်ရာ ကျော်လောက်ကို ဆင်းရဲမွဲတေခြင်းနွံထဲက ဆွဲထုတ်ပီးနိုင်ခရေလို့ ပြောကေယုံကတ်ဖို့ လား။ သူ့  ၏ရေရှည်အမြင်ဖြစ်တေ ဖွံ့ ဖြိုးတိုးတက်ရေးနန့် ခေတ်မှီခြင်းအတွက် တန်းခါးဖွင့်ပေါ်လစီက အဂေါင်ဂေါင့် နှစ်ပေါင်း ၃၀ အတွင်းမှာ သန်းပေါင်းရာချီရေ ဆင်းရဲသားနင်းပြားတိ ဘ၀ကို ပြောင်းလဲစီပနာ စီးပွါးရေးဖွံ့ ဖြိုးတိုးတက်တေ ဒေနိန့် ကာလတရုတ်ပြည် ဖြစ်လာအောင် လမ်းညွှန်ပြပီး ခရေ။ သူ့ နာမေက တိန့် ရှောင်ဖိန့်  (Deng Xiaoping)။ သူက "ကြောင်တကောင် မဲခြင်းဖြူခြင်းထက် ကြွက်ဖမ်းတတ်ကေ ယင်းကြောင်ရေ ကြောင်ကောင်းဖြစ်တေ" လို့ ပြောခဖူးရေ။ တရုတ်ကွန်မြူနစ်ပါတီက အုပ်ချူပ်ထားကေလေ့ ဆိုရှယ်လစ်တန်းခါးပိတ် စီးပွါးရေး စနစ်တခု တည်းကို တရားသီဆုပ်ကိုင်မကျင့်သုံးပဲ ပြင်ပကမ္ဘာနန့် ဆက်သွယ်ပနာ ဈီးကွက် စီးပွါးရေးစနစ်နန့်  တိုင်းပြည်က ထိန်းချူပ်မောင်းနှင်ရေအရင်းရှင်စနစ် (State Capitalism) ကို အကောင်အထည် ဖော်ဗျာလ် ခေတ်မှီဖွံ့ ဖြိုးတိုးတက်ရေးကို ချီတက်လားကတ်ဖို့  ပြုပြင်ပြောင်းလဲရေး မဟာဗျူဟာ သစ်ကို ချမှတ်ခရေ တိန့် ရှောင်ဖိန့် ၏ စီးပွါးရေးတန်းခါးဖွင့်မူဝါဒသစ်က တရုတ်ပြည်ကို ခေတ်သစ်တခုပါးကိုရောက်လားအောင်ပို့ ပီးလိုက်တေလို့  ဆိုကေမှားလီဖို့ မထင်မိပါ။
လူ့ အဖွဲ့ အစည်းနိုင်ငံတခုပြောင်းဖို့  လားရာအမြင်သစ် (new vision) ကို စိုင်းစားတွေးခေါ် ဦးဆောင်ချမှတ်နိုင်စွမ်းဟိရေ ခေါင်းဆောင်တိလိုရေပိုင် ထိုချမှတ်လိုက်တေ မဟာဗျူဟာတိကလေ့ လူတိ၏အခြေခံဘ၀နန့် သဟဇာတဖြစ်ပနာထပ်တူကျဖို့ တော့ လိုရေလို့ ထင်မိရေ။ ဖြစ်နိုင်ခြေ (possibility) ကို အရင်းတည်ထားရေ လမ်းညွှန်မှုကရာ ဖြစ်နိုင်ခွင့် (opportunity) ကို သယ် ဆောင် ယူလာပီးနိုင်ဖို့ စွာက ကျိန်းသီနိန်ရေ။ ဟားဗတ်တက္ကသိုလ်ပါမောက္ခ ဂျိုးဇက်ညီး (Joseph Nye) ၏ ခေါင်းဆောင်ဖို့ ပါဝါတိ (Powers to lead) ဆိုရေ စာအုပ်မှာ ပါဝါမာ (Hard power)နန့်  ပါဝါပျော့(Soft power) ပေါင်းထားရေ လိမ္မာပါးနပ်တေပါဝါ (Smart power) ကရာ သတင်း နည်းပညာခေတ်နန့် ရက်ပြတ်ပြောင်းလဲနိန်ရေ နိုင်ငံရေး၊ စီးပွါးရေး၊ လူမှုရေးနယ်ပယ်မှာ အခရာ ကျအဓိကဖြစ်တေ ခေါင်းဆောင်နိုင်မှုအရည်အချင်းတခုဖြစ်လာဖို့ လို့  လေ့လာသုံးသပ် ထောက်ပြ ထားရေ။
အနှစ်ချူပ်ပြောရဖို့ ဆိုကေ ရခိုင်ရို့ လွတ်လမ်းက ခေါင်းဆောင်နိုင်စွမ်းဟိရေ နိုင်ငံရေးမျိုးဆက်သစ် တိလက်ထဲမှာရာ ဟိနိန်ရေလို့ ပြောကတ်ရပါဖို့ ။ ဒေနိန့် ကာလ နိုင်ငံရေးမျိုးဆက်ဖြစ်ချင်နိန် ကတ်တေ ရခိုင်တိ အနာဂတ်ကို ဇာလောက်ထိအ၀ီးကြီး ကြည့်နိုင် မြင်နိုင်စွမ်းဟိလေ ဆိုရေ လားရာအမြင်မှာ အခြေတည်ပနာ နိုင်ငံရေးအခင်းအကျင်းသစ်က ဖြစ်ပေါ်လာနိုင်ရေ။ အနာဂတ်စွာ ပစ္စက္ခက မွီးထုတ်ပီးလိုက်တေ ရလဒ်ကိုခင်းကျင်းပြသခြင်းရာ ဖြစ်လို့  လက်ဟိအခြေအနေမှာ ဇာလောက်ထိပြင်ဆင်ထားကတ်ဗျာလ်လေ ဇာပိုင်နိုင်ငံရေးအမြင် နန့် နှစ်ပေါင်းရာချီနိန်ရေ ရခိုင်ရို့  လူ့ ဘောင်အဖျက်ခံနိန်ရခြင်းကို ပြုပြင်တည်ဆောက်လားကတ်ဖို့  လဲ ဆိုရေ မိန်းခွန်းကို အဖြေရှာ နိုင်ကေ ရခိုင်ရို့ ၏ခေတ်ဆန်းချိန်ကို ပိုင်ဆိုင်လာကတ်ရဖို့ စွာက မလွဲပါ။ ။ ။
Read more...
Posted by Free4A
ကထွက်တေပိုင် မိုးဦးကျဖားပြုတ်ကေတိ ဖဲသာမပီးရတိုင်းအော်ကတ်တေပိုင် ဖတ်လို့မကုန်နိုင်ရေစတိတ်မန့်တိ ကြားလို့ မဆုံးနိုင်ရေအသံတိ ရွီးလိုက်ကတ်တေ သတင်းတိ လုပ်လိုက်ကတ်တေ ဆန္ဒပြပွဲတိ ထိုနိုင်ငံဒေနိုင်ငံက ဂေါင်းဆောင်တိ ထိုအဖွဲ့ဒေအဖွဲ့က အတွင်းရေးမှူး ဥက္ကဌတိ နိုင်ငံတကာဆက်ဆံရေးဒီပလိုမေစီစာအုပ်ကြီးတိကို မျိုချထားကတ်တေ သံတမန်ကြီးတိ ကိုယ်စားလှယ် တော်တိ လားကတ်လာကတ် ပြောကတ်ဆိုကတ် ငြင်းကတ်ခုန်ကတ် တောင်းဆိုကတ်ကန့် ကွက်ကတ် ဝေဖန်ကတ် အပြစ်တင်ကတ် အဆုံးသတ်နိဂုံးမှာ ဗမာစစ်ဂေါင်းဆောင်သန်းရွှေဆင်ထားရေ ထောင်ချောက်ကြီးထဲမှာ လက်ကားရား ခြီကားရား ပြောနိန်ကျစကားတိနန့် ခေါက်ရိုးကျိုးနိန်ရေ တိုက်တွန်းသုံးသပ်မှုတိကိုကိုင်ပနာ ဖြေသိမ့်ကျေနပ် အဆုံး အဖြတ်ရလဒ်က အယင်အတိုင်းလားနိန်လီဖို့စွာပါရာ။တွိဆုံဆွေးနွေးစေ့စပ်ညှိနှိုင်းအဖြေရှာကတ်။သူမနာကိုယ်မနာဝါဒကိုကျင့်သုံးကတ်။ယကေအားလုံးစာရင်းအင်းသိမ်းလို့အိမ်ပြန်ဖို့ကြည့်လိုက်တေခါဗမာတိလက်ထဲမှာနိုင်ငံရေးအာဏာကျန်ရေလူတိကကျွန်ဘ၀နန့်ကုန်းရီတိစုတ်လို့။ကောင်းကတ်သိမ့်ယင့်လား။တချက်ချေလောက်ကြည့်ကတ်ပါဖိ်။ လွန်ခရေ ဆယ်နှစ်ကျော်လောက်ကဆိုကေ ဒေပိုင်အချိန်တိစွာ နိုင်ငံရေးယစ်လို့ အကောင်းဆုံးအချိန်။ တောင်မသိ မြောက်မသိပန်းတိုင်မဟိကေလေ့လားလို့ကောင်းခရေ။အော်လို့ခြီခရေ။ပဇ(ပါးစပ်)ကအမြှပ်ထွက်အောင်ဖယ်ဒရယ်နန့်လွတ်လပ်ရေးကိုငြင်း၊တပြားလေ့မရကေလေ့တလုံးလေ့မတတ်ကေလေ့သွီးနထင်ရောက်ပနာနိုင်ငံရေးဘိုးတော်ယောင် ယောင်တော်လှန်ရေးဂုရုယောင်ယောင်အေနိန့်လားတိုက်ကေအေနိန့်ရခိုင်ပြည်ကိုပြန်ရဖို့စွာပိုင်စိတ်ကူးယိုင်အိမ်မက် တိနန့်ရူးခဖူးရေ။ နိုင်ငံရေးအယစ်ပြေလို့ နိုးပါလတ်တေခါ ဂေါင်းကိုက်တေဝေဒနာက သံပုရာသီးလေ့ မကယ်နိုင် လှော်စာသောက်ကေလေ့မပျောက်။ နောက်ကုန်းကို တုတ်ကျခါမှ သိရေ။ အော် ငါရို့  ရခိုင်သားတိမှာ လက်နန့်  ဖ၀ါး ရာ ဟိရေ။ ၀မဟိပဲ ၀ိလုပ်ဖို့  ကြိုးစားဖူးခရေ အချိန်တိ နှမြောဖို့ ကောင်းလိုက်တေပင်။ လွတ်တေငါးအကြီးသန် လတ်။ အဂုလေ့ ကုန်လားခရေ အချိန်တိစွာဂေါ်ဇီလာလောက်ဟိဖို့လို့ထင်မိယင့်။ လူ့ဘ၀စွာ တိုရေ လတ်။ ဇာလောက်တိုလေလို့ မိန်းကေ အဖြေတိထွက်ကျလာဖို့မထင်။ တိုရေလို့ ရာ မှတ်ထားလိုက် ကတ်မေဖိ။ မငြင်းချင်ဗျာယ်။ ယကေလေ့ အေချင့်နန့် ဆန့်ကျင်ဖက် ရခိုင်ရို့  ရက္ခိတရို့  မဟာအာရိယန်ရို့  ဗမာကျွန် ဖြစ်နိန်ကတ်ရရေ ဘ၀က ရှည်ရေလို့ ပြောကေလွန်လားလီဖို့ လားချင့်။ ဇာလောက်ထိ ရှည်ဖို့ သိမ့်လေး ဆိုစွာကို ရခိုင် သားတိအားလုံးရာတိုင်းကြည့်ကတ်လီပါဖိ။ မရှည်ချင်ကေတော့ခါ အားလုံးသူဆုံးဖြတ်ပနာ အဆုံးသတ်လီကတ်ပါဖိ။ ယကေဒေစာစုချေ ဂေါင်းစိုဉ်မှာပါရေအတိုင်း ဗမာစစ်အုပ်စုပရိယာယ်ကို ခြီရာခံကြည့်ရဖို့ဆိုကေ ဒေသူရို့ စစ်စနစ် ကို ဇာဝါဒအတွေးအခေါ်နန့် နိုင်ငံရေးယုံကြည်ချက်မှာ အခြီခံပနာ တည်ဆောက်ထားပြီးကေ ဒေနိန့်ကာလထိ ဇာဖြစ်လို့ ခြီတလှမ်းချေ မပျက်အောင်လားနိုင်ကတ်လေဆိုစွာကိုအယင်ဆုံးဆန်းစစ်ကြည့်ကတ်ရဖို့ထင်ယင့်။ကမ္ဘာသမိုင်းနန့်ချီပနာ ပြောရဖို့ ဆိုကေ ဒုတိယကမ္ဘာစစ်မှာ လူဦးရေပေါင်း ၅၅ သန်း သီဆုံးလားခရခြင်း၏ အဓိက စစ်ရာဇ၀တ်ကောင်တိနန့်တရားခံတိဖြစ်တေ ဟစ်တလာဦးဆောင်ခရေဂျာမန်နာဇီဝါဒ၊မူဆိုလီနီဦးဆောင်ခရေအီတလီဖက်ဆစ်နန့်ဂျပန်ပဒေသရာဇ်တိဦးဆောင်ခရေဂျပန်ဖက်ဆစ်၀၀ါဒတိအားလုံးစွာအမျိုးသားရေးအစွန်းရောက်ဝါဒနန့်နိုင်ငံရေးယုံကြည်ချက်မှာသန္ဓေတည်ပနာမွီးဖွါးလာကတ်ခြင်းပင်ဖြစ်တေ။အဂုခေတ်နအဖဗမာပဒေသရာဇ်စစ်စနစ်လည်းဗမာအမျိုးသားရေးအစွန်းရောက်ဝါဒနန့်နိုင်ငံရေးခံယူချက်ဖြစ်တေဗမာအမျိုးသားနိုင်ငံထူထောင်ရေးနန့် နိုင်ငံရေး အာဏာကို ဗမာတိကရာထိန်းချူပ်ထားနိုင်ရေး ဥခွံထဲက ပေါက်ဖွါးရှင်သန်လာခြင်းပင် ဖြစ်တေ။ ဒေပိုင် အမျိုးသားရေး အစွန်းရောက်မှိုင်းနန့်အဆိပ်တိမိနိန်ရေ ဗမာစစ်အုပ်စုကို နာဇီဖက်ဆစ်ဝါဒအတွေးအခေါ်တိ နိဂုံးချူပ်လားကတ်တေပိုင် မလုပ်နိုင်ရေ ကာလပတ်လုံး တခြားတခုချဉ်းကပ်နည်းနန့်လေ့ ဒေနိန့်ကာလဖြစ်နိန်ရေ နိုင်ငံရေးပြဿနာကို အဖြေရှာ လို့ ရနိုင်လ်ီဖို့ မဟုတ်ပါ။ ၁၉၅၉ ခုနှစ် ဂျူလိုင်လမှာ ပုံနှိပ်ဖော်ပြခရေ နိုင်ငံရေးဆိုင်ရာ ပညာသျှင်စာတမ်းတစောင်မှာ ဆောင်းပါးသျှင် ဂျိုးဆဖ်ဆေလဗာစတိုင်း (Josef Silverstine) က ဗမာအမျိုးသားရေးဝါဒရေ ၁၉၃၀ ကာလမှာ "ဒို့ဗမာ အစည်းအရုံး" ကိုထူထောင်ပြီးကေ "ဗမာစာသည် ဒို့စာ ဗမာစကားသည် ဒို့စကား" ဆိုရေ ဆောင်ပုဒ်နန့် စတင်လှုပ်ရှား အသက်ဝင် ပါလတ်တေ လို့ ရွီးထားစွာကို ဖတ်ရရေ။ ဒေ အစည်းအရုံးက ဗမာတက္ကသိုလ် ကျောင်းသား လူငယ်တိကို စည်းရုံး သိမ်းသွင်းနိုင်ပနာ ဗမာတိနိုင်ငံရေးအချူပ်အချာအာဏာပိုင်ဆိုင်ရေးနန့် ဗမာမှုပြုရေးပေါ်လစီ (Burmanization Policy) ကိုပါ ကျင့်သုံးပါလတ်ကတ်တေ။ ဗမာအမျိုးသားနိုင်ငံရေးလမ်းကြောင်းကို ဖောင်ဒေးရှန်း ချပနာ တဖဲ့ချေလေ့ အစောင်းမခံပဲ ပါလတ်စွာ နောက်ဆုံးဗမာစစ်တပ်ကို ထူထောင်ရေ အဆင့်ကိုရောက်လို့ ပါလတ်တေ။ စစ်ကြိုခေတ် ကာလက ရန်ကုန်တက္ကသိုလ်မှာ သမိုင်းပါမောက္ခလုပ်ခရေ ဂေါ်ဒွန် အိတ်ခ်ျ လူးစ် ( Gordon H Luce) က "ဒို့ဗမာ အစည်းအရုံးဝင် သခင်တိဦးဆောင်ပါဝင်ရေ ရဲဘော်သုံးကျိပ်က စတုတ္ထဗမာနိုင်ငံတော်ကို ထူထောင်နိုင်ခရေ လို့ ကောက်ချက်ချခစွာကို ဖတ်ရရေ။ အင်္ဂလိပ်မအုပ်ချူပ်ခင်ကာလက နိုင်ငံရေးအရ တခုပိုင်လေ့ဆက်စပ်မှုမဟိပဲတသီးတခြားစီနိန်ခကတ်တေတိုင်းပြည်နိုင်ငံတိစွာအင်္ဂလိပ်ကိုလိုနီစနစ်အောက်မှာနယ်မြေတခုတည်းဖြစ်လာလတ်ပြီး ကေ လွတ်လပ်ရေးရရေခါ ဗမာတိ၏နိုင်ငံရေးအရ လိမ်မာပါးနပ်မှုနန့် ဗမာအမျိုးသားရေးဝါဒကို တစိုက်မတ်မတ် ဆုပ်ကိုင်ထားနိုင်ခလို့ အေနိန့်ကာလ မြန်မာနိုင်ငံ ဆိုရေ ဧရိယာအကျယ်အ၀န်းကို ထိန်းချူပ်ထားနိုင်ခြင်းဖြစ်တေလို့ သုံးသပ်ရပါဖို့။ယင်းအတွက်နန့် အဂုကာလစွာ စတုတ္ထဗမာနိုင်ငံတော်ကို နအဖစစ်အုပ်စုက ဦးဆောင်ပနာ ခရီးနှင်နိန်ကတ်တေ အချိန်လို့ သတ်မှတ်ကတ်ရဖို့ ထင်ယင့်။ အေနိန်ရာမှာ ထူးခြားနိန်စွာတခုက "အမျိုးသား" ဆိုရေ စကားလုံးပင် ဖြစ်ပါရေ။ နိုင်ငံရေးသိပ္ပံအဘိဓါန်မှာ အမျိုးသား ဆိုရေ စကားလုံးစွာ လူမျိုးတမျိုးတည်းကိုရာကိုယ်စားပြုကြောင်း အဓိပ္ပါယ်ဖွင့်ဆိုထားရေ။ န၀တဗမာစစ်အုပ်စုအာဏာသိမ်းပြီးကေထုတ်ပြန်ကျေညာထားရေယင်းသူရို့မူဝါဒနိုင်ငံရေးဦးတည်ချက်(၄)ရပ်မှာ ဒုတိယစာကြောင်းက "အမျိုးသားပြန်လည်စည်းလုံးညီညွတ်ရေး"ပင်ဖြစ်ပါရေ။ယကေဒေနိန့်  ကာလ အတိုက်အခံပါတီတခုဖြစ်တေအမျိုးသားဒီမိုကရေစီအဖွဲ့ ချူပ်ကတောင်းဆိုနိန်ရေ"အမျိုးသားရင်ကြားစေ့ရေး"စွာလည်းအထက်ကပြောခရေဗမာစစ်အုပ်စုနိုင်ငံရေးမူဝါဒနန့်တထပ်တည်းကျနိန်စွာကိုတွိရရေ။နောက်ပြီးကေ ဒေအမျိုး သားဒီမိုကရေစီအဖွဲ့ ချူပ်မှာ ပါရေ စကားလုံး "အမျိုးသား" စွာ ဗမာလူမျိုးတမျိုးတည်းကိုရာ ကိုယ်စားပြုနိန်ရေ ပြောကတ်ရဖို့ ထင်ရေ။ အမျိုးသားများ (Nationalities) နိန်ထိုင်ရေ ဗဟုလူ့ ဘောင်တိုင်းပြည်ကြီး၏နိုင်ငံရေးပဋိပက္ခ ကို ဖြေ ရှင်းဖို့ တောင်းဆိုတိုက်ပွဲဝင်ကတ်စွာမှာ "အမျိုးသားများရင်ကြားစေ့ရေး" လို့ မူဝါဒ မချခြင်းက ဗမာအမျိုးသားရေးလမ်းကြောင်းတခုတည်းကိုရာဦးတည်ပြီးကေလားနိန်ကြောင်းမီးမှောင်းထိုးပြနိန်ရေ။
ကမ္ဘာ့နိုင်ငံရေးသမိုင်းကို လေ့လာမှတ်တမ်းတင်စာတမ်းပြုစုနိန်ကတ်တေ အဖွဲ့ အစည်းကြီးတိက ဗမာစစ်အာဏာသျှင်စနစ်စွာ ကမ္ဘာမှာသက်တမ်းအရှည်ဆုံးစစ်အာဏာသျှင်စနစ်လို့ မှတ်တမ်းတင်ထားကတ်တေ။ ၁၉၉၇ ခုနှစ်မှာ ရွီးခရေ "လက်ဟိခေတ်ကာလအခြေအနေကို ဆန့်ကျင်လို့ ဗမာပြည်မှာ အာဏာသျှင်စနစ်သက်ဆိုးရှည်နိန်ခြင်း" (Against the current: The Survival of Authoritarianism in Burma) ဆိုရေ သုတေသနစာတမ်းမှာ ပညာသျှင် ဂျာလာ အလမ်ဂီးယာ (Jalal Alamgir) က ဗမာအမျိုးသားရေးဝါဒ ရေ လက်ဟိဗမာစစ်စနစ်ကို ကျားကန်ပီးနိန်ရေ အဓိက အိုင်ဒီယာတခုဖြစ်ကြောင်းကို ထောက်ပြထားရေ။ ယပြီးကေ သူက "အန်အယ်လ်ဒီ၏ရပ်တည်မှုက န၀တ (အဂုနအဖ) သက်ဆိုးရှည်ဖို့အတွက်အကျိုးဖြစ်ထွန်းနိန်စီရေ၊ တဖဲ့ချေအကျယ်ချဲ့ ပြောရဖို့ဆိုကေ စစ်အုပ်စုက စုကြည်၏နိုင်ငံရေးကို ကြိုတင်ခန့်မှန်းထားနိုင်ရေ" (The stance of NLD has been beneficial to SLORC’s survival, at least to the extent that Suu Kyi’s politics are predictable to the junta.) လို့ ဝေဖန်ထားစွာကို ဖတ်ရရေ။ အန်အယ်လ်ဒီ စီအီးစီထဲမှာ ဗမာအမျိုးသားရေးဝါဒကို ဆုပ်ကိုင်ထားရေ နအဖအလံရှူး ဖျက်မြင်းတိကို ထည့်ထားပနာ နိုင်ငံရေးကဇတ်ပါလတ် ကတ်စွာ အဂုဆိုကေ ဆယ်စုနှစ် နှစ်စုကိုကျော်လွန်ပါလတ်လို့ အချိန်သစ်ကာလကိုရောက်လာနိန်ကြောင်းကို အားလုံး သူရို့ မျက်မြင်ကိုယ်တွိလို့  ဆိုကတ်ရပါဖို့။ အဂုလေ့ ပြောလို့ ဆိုလို့ ခံစားလို့ကောင်းရေ ဒရမ်မာနိုင်ငံရေး (Drama Politics) ပြကွက်တိက လူတိစိတ်ကို ဖမ်းစားထားရေလို့ပြောရဖို့ထင်ယင့်။ ယကေလေ့ အပြောင်းအလဲကတော့ တခုထောင့်ကြားကလေ့ ထွက်ကျလာဖို့ မဟုတ်။ ကြိုပနာစီစိုင်ထားရေအတိုင်း ၂၀၁၀ မှာ ရွီးကောက်ပွဲကျင်းပလို့ ဗမာနည်းဗမာဟန် မကျက်တကျက် ဒီမိုကရေစီနန့် စတုတ္ထဗမာနိုင်ငံတော်ကြီးကို ခြီလှမ်းမပျက်လားကတ်ဖို့ စွာက တန်းလို့ မြင်နိန်ရရေ။ ၂၀၀၈ ခုနှစ် ဖွဲ့  စည်းအုပ်ပုံ အခြေခံဥပဒေမှာ ပြဌါန်းထားရေပိုင်စစ်ရေးအမြင်ဟိရေ ဗမာစစ်သားက သမ္မတဖြစ်လာပနာ(၅)နှစ် သက်တမ်း (၂) ကြိမ် အုပ်ချူပ်လားကေ ဒီမိုကရေစီနှမ်းဖြူးထားရေဗမာအမျိုးသားရေးစစ်ဝါဒက၂၀၂၀ထိဇိမ်ခံပနာလားနိန်လီဖို့စွာကဗေဒင်မိန်းစရာမလိုပါ။ဒေပိုင်ဗမာစစ်အုပ်စုဇိမ်ခံနိုင်ဖို့အတွက် ရုပ်ဝတ္ထုရင်းမြစ်ပိုင်းဆိုင်ရာ ဖဲသာတိကို ရခိုင်ပြည်က ထောက်ပံ့ပီးနိန်ရေ။ နအဖစစ်ယန္တရားလည်ပတ်ဖို့ လိုအပ်တေ ဖဲသာကို ရခိုင်ပြည်ကထွက်တေ ရခိုင်သားတိပိုင်ရေ သဘာဝဓါတ်ငွေ့ က ကျောထောက်နောက်ခံလုပ်ပီးထားရေ။ ယကေ အမောင်ရခိုင်သားဝံလက်ရို့ မှာ ဗျရာကျန်ရေ။ ဟုတ်ဖို့ လားနင်းခံခီကေ တဘော်စီလျော့လားရေ။ အိတ်ပေါက် နန့်ဖားကောက်တေပိုင်လမ်းလျှောက်လို့လမ်းပျောက်နိန်ရရေ။"ရခိုင်သားကိုတိုက်စရာမလိုအချင်းချင်းတိုက်ပြီးကေ ဘ၀ပျက်နိန်လီကတ်ဖို့စွာရာ" လို့ ဗမာစစ်ထောက်လှမ်းရေး ခင်ညွန့် ပြောခပိုင် ရခိုင်သားတိကလေ့ အတိအကျ လိုက်နာကျင့်သုံးကတ်တေ။ ဥာဏ်ကောင်းလိုက်တေပင်။ ယင်းပိုင်နန့် အယင်ပိုင် ပဒေသရာဇ် လက်ကျန် အိမ်မက်နန့် ပွဲမတိုးရေ ရခိုင်သားတိနိုင်ငံရေးက၂၁ရာစုမှာစိန်ခေါ်မှုတိကိုရင်ဆိုင်လာကတ်ရရေ။ရှိဆက်ပြီးကေဇာပိုင်လုပ်လားကတ်ဖို့လဲဆိုရေမိန်းခွန်းကထွက်ကျပါလတ်တေ။ကျိန်းသီနိန်စွာ တခုက ရာစုနန့်ချီပနာ ဖြစ်ပါလတ်တေ နိုင်ငံရေးရောဂါကို အဂုချက်ချင်းပျောက်အောင် ဥုံဖွလို့မန်း ပနာကူးပစ်လိုက်နိုင်ရေဆီးကြိမ်လုံးတယောက်ဘားမှာလေ့မဟိ။ရေရှည်အမြင်(Long-term perspective)နန့် ကြိုတင် ပြင်ဆင်တည်ဆောက်လားနိုင်ခြင်းကရာ အနာဂတ်မှာ မျှော်မှန်းထားရေ ရလဒ်ကောင်းကို ရလာနိုင်ဖို့ ယုံကြည်မိယင့်။ နည်းဗျူဟာ မဟာဗျူဟာသစ်နန့် နိုင်ငံရေးသမားအသစ် မျိုးဆက်သစ် သွီးသစ်တိပါ ကွက်လပ်တိဖြည့်ပီးဖို့ လိုအပ်နိန် စွာက ရခိုင်နိုင်ငံရေး၏ လက်ဟိတောင်းဆိုနိန်မှုပင်ဖြစ်ပါရေ။ ။ ။ ခိုင်အောင်အောင်၂၃၊၀၅၊၂၀၀၉
"ရခိုင်ပြည်အတွက် ငါရို့ တိတာဝန်"
မျက်နှာကို မှန်ထဲမှာ ကြည့်မိရေအချိန်တိုင်း ငါစွာ ကျွန်တယောက်ရာမနှန်းဂုလို့ ရက်ပြတ်အတွက်ပေါ်သတိရနီမိရေ။ ငါ့မှာတိုင်းပြည်မဟိ။ ငါ့မှာ ကိုယ့်ကံကြမ္မာကို ကိုယ်ဖန်တီးပိုင်ခွင့်မဟိ။ ငါ့အမင်ဘာသာစကားနန့်  စာသင်ပီးရေ ကျောင်း မဟိ။ ငါ့မှာ ငါ့ကို အကာအကွယ်ပီးဖို့  အစိုးရမဟိ။ ရခိုင်ပစပို့တ်ကို ကိုင်ပြီးကေ ရခိုင်နိုင်ငံသားဝေးလို့  လက်မထောင် ပနာ ရခိုင်အောင်လံတော်ကိုလွှင့်ထူလို့  ကမ္ဘာကြီးကို ပတ်လားခွင့် ငါ့မှာမဟိ။ ကမ္ဘာ့ရွာထက်မှာ ငါတခုခု ဖြစ်ကေ ဒုက္ခရောက်ကေ ချက်ချင်းအကူအညီပီးနိုင်ရေ ရခိုင်သံရုံး မဟိ။ ကုလသမဂ္ဂ ကမ္ဘာ့အိုလံပစ် အေပိုင် နိုင်ငံတကာအဖွဲ့  အစည်းတိ အားကစားပြိုင်ပွဲတိမှာ ရခိုင်ဆိုရေ ဆိုင်းဘုတ်ကို ကိုင်ပနာ ရခိုင်ကို ကိုယ်စားပြုလို့  ပြောခွင့်ဆိုခွင့် ရခိုင့် အရည်အချင်းကို ပြခွင့် ငါ့မှာ မဟိ။ ရခိုင်တံဆိပ်ခတ်ထားရေ ဖေးသာကိုကိုင်ပနာ ကမ္ဘာကြီးနန့်  အယင်ခါပိုင် ကူးသန်း ရောင်းဝယ်ရေး လုပ်ခွင့် ငါ့မှာမဟိ။ ငါ့ဘ၀က မျောက်နှင်ခံထားရရေ ယာသျှင်ဘ၀။ သူတောင်းစားပိုင် မျှော်လင့်ချက်ပန်းဖူးမဟိရေ လမ်းမထက်မှာ အလားအပြန် တယောက်ကလေ့ ငါ့ကို လူလို့ မသတ်မှတ် မလေးစား။ ငါ့သီကျလားခကေတောင် ခွီးတကောင်ပိုင် မြီမြှပ်ခံလားရဖို့  အဖြစ်မျိုး တယောက်ကလေ့ ငါ့ကို သတိရလီကတ်ဖို့ မဟုတ်။ မော်ကွန်းထိုး သမိုင်းတင်ကတ်ဖို့  မဟုတ်။ ဇာဖြစ်လို့ လေးဆိုကေ ငါ့မှာတိုင်းပြည်ကမဟိ နိုင်ငံမဟိ။ ငါ ဇာပင်လုပ်လုပ် ဇာလောက်ပင်ထူးချွန်ချွန် ငါ့မှာ ကိုယ်ပိုင်တိုင်းပြည်မဟိရေအတွက် ငါ့ကြိုးစားမှုကို ငါ့ရင်ဖတ်နှလုံးသားနန့် ပြည့်ပြည့်၀၀ ဂုဏ်ယူကျေနပ်တေ ခံစား ချက်ပီတိ တခါလေ့ဖြစ်လာဖို့ မဟုတ်။ ကိုယ့်ထမင်းကို ကိုယ်စားပနာ လူများနွားကို လားကျောင်းပီးရရေ အဖြစ်မျိုးရာ ဖြစ်နီလီဖို့ ။ ငါ့နှာခေါင်းနန့် ငါ အသက်မရှုမရရေဘ၀ လူတယောက်ဖြစ်ခြင်း၏အနှစ်သာရနန့်  လုံးဝမညီညွတ်။ ငါစွာ လူနန့်  တူကေလေ့ လူကားမဟုတ်။ လူ့ ဘောင်လောကကြီးထဲမှာ ငါကခေတ်သစ်ကျွန်တယောက်ရာ။ ငါ့အမိ ငါ့အဖ ငါ့အဘိုးငါ့အဘောင်ငါ့အဖီးငါ့အဇူမျိုးရိုးစိုဉ်ဆက် တသက်လုံးပိုင်ဆိုင်လာကတ်တေမြီ အဂုငါ့မပိုင်ဗျာယ်။ ငါ့ညီမ ငါ့အေးမ တိလေ့ တခုပိုင်လည်း လုံခြုံမှုမဟိ။ ငါ့ဆွေမျိုး သူငယ်ချင်း အသိုင်းအ၀ိုင်းတိ အားလုံးလေ့ အဂုဆိုကေ နိုင်ငံတကာ ကျွန်ဘ၀နန့်  ကုန်းရီစုတ်ပါအောင် အလုပ်လုပ်ပနာ ရလာရေ တပြားတချပ်ကို မ၀ရီစာစားလို့  အသက်ရှင် နီကတ်ရရေ ဘ၀။ တခုအာမခံချက်လေ့ မဟိ။ နွားပြီးရာမှာ ဖျာဆိုးရွင့်ရေပိုင် အမောင် တောင်မှန်း မြောက်မှန်း မသိရေ ဘ၀။ အဓိက ကငါရို့မှာတိုင်းပြည်မဟိလို့အေပိုင်ဖြစ်နီကတ်ရစွာ။ ကိုယ်ပိုင်တိုင်းပြည်နိုင်ငံ ဟိခါမှရာ ရခိုင်ဆိုစွာ လွတ်လပ်တေ လူမျိုး၊ ကြီးကျယ်မြင့်မြတ်တေ သမိုင်းကြောင်းနန့်  ကမ္ဘာ့အလယ်မှာ လူရာဝင်ခရေ လူမျိုး၊ စာပီယိုင်ကျေးမှုထွန်းကားပနာ တရားမျှတခြင်းနန့် ငြိမ်းချမ်းရေးကို တန်ဖိုးထား ခရေလူမျိုး လို့  လက်မထောင်ပနာ ပြောခွင့်ဟိလာဖို့ ။ အေနိကာလမှာ ဒေစကားလုံးတိကို လားပြောခီကေ ရီစရာ ဟာသ၀ထုချေတပုဒ်ကို လားပြောရေပိုင် လူတိဘားမှာ အဟားခံနိန်ရရေ အဖြစ်မျိုး မြီကြီးလက်ခတ်မလွဲ ကြုံလာရကတ်ဖို့ စွာဗျာယ်။ အေချင့်ထက် လူ့ ဂုဏ်သိက္ခာကျ လူ့ တန်ဖိုးမဟိလူဖြစ်ခြင်းအနှစ်သာရမဲ့စွာ မဟိဗျာယ်လို့  ထင်ရေ။ ရခိုင်ပြည်က တနှစ်ကို အမေရိကန်ဒေါ်လာ သန်းထောင်နန့် ချီပနာ ရနိန်ရေ အချိန်မှာ စားစရာမဟိလို့ ကိုယ့်ကိုယ်ကို သတ်သီလားခကတ်တေ ရခိုင်မိသားစုတိ၊ စာမသင်နိုင်ရေ အချေတိ ဘုန်းကြီးကျောင်းတိမှာ တပုံကြီး၊ လယ်တိကို အသိမ်းခံရလို့  နိုင်ငံခြားတိုင်းပြည်တိမှာ ကျွန်ဖြစ်နိန်ကတ်ရရေ ရခိုင်လယ်သမားတိ၊ ဘုရားကအောက်က မျောက်က အထက်မှာ ဆိုရေပိုင် ရခိုင်စာတတ်ဝန်ထမ်းတိ အထက်မှာ တလုံးလေ့မတတ် လူစိတ်မဟိရေ ဗမာစစ်ဗိုလ်တိက ထိုင်လို့ ၊ အရက်ဝယ် ကြက်ဖမ်း ရှိတန်းထွက်ကေ သီ ဆိုရေနိန်ရာမှာ အလုပ်မဟိလို့  ဗမာစစ်တပ်ထဲကိုဝင်ခါမှ ကျွန်ဖြစ်နိန်ကတ်ရရေ ရခိုင်စစ်သားတိ၊ ဒေပိုင် ထောင့်ပေါင်းစုံက စနစ်တကျသွီးစုပ်နှိပ်စက်ခံနိန်ရရေ ငရဲဘုံဘ၀က ရခိုင်တိလွတ်မြောက်ဖို့ နန့်  ဒေပြဿနာတိအားလုံးကို ဖြေရှင်းပီးနိုင်ဖို့ တခုတည်းရာဟိရေ အဖြေက သီးခြား လွတ်လပ်တေရခိုင်ရို့ ပြည်ကို ပြန်ပနာထူထောင်ရေး ပင်ဖြစ်တေ။ ဒေပိုင်သီးခြားလွတ်လပ်တေ ရခိုင်ပြည်ကို ပြန်ပနာ ထူထောင်ဖို့ဇာချင့်တိလိုအပ်ဖို့ လဲ။ အရင်ဆုံးလိုအပ်ချက်က "ရခိုင်ပြည် ဒေ ၂၁ ရာစုမှာ သီးခြားလွတ်လပ်တေတိုင်းပြည်ဖြစ်လာရဖိုဆိုရေ ယုံကြည်မှုပန်းတိုင်ဟိရဖို့။" အေ ယုံကြည်မှုကို အမျိုးသားရေးတာဝန်တခုလို့ သတ်မှတ်ပနာအသက်မသီသိမ့်ရေကာလပတ်လုံးနှလုံးသားထဲမှာစွဲစွဲမြဲမြဲမှတ်ပနာ အကောင်အထည်ဖော်ထမ်းဆောင်လားကတ်ရဖို့။ အေချင့်စွာ အင်္ဂလိပ်ပိုင် ပြောရဖို့ဆိုကေ Goal တခုဖြစ် တေ။ ယင်းအတွက်နန့် ဒေယုံကြည်ခြင်းပန်းဖူးကို အရောက်လားဖို့ အင်္ဂလိပ်ပိုင် Means လုပ်ဆောင်ချက် လိုအပ်တေ။ သီအိုရီနန့် လက်တွိ ထပ်တူကျခါမှရာ ပန်းဖူးကို ရောက်နိုင်ဖို့။ စနစ်ကျရေ အလုပ်နန့်  အင်အားဖြစ်လာဖို့  ရခိုင် သားလူဦးရေပေါင်း ၄ သန်းလောက်ဟိစွာထဲက တစ်ရာခိုင်နှိုင်းဖြစ်တေ လေးသောင်း (၄၀၀၀၀) လောက်ရာ နိုင်ငံရေးကို စိတ်ဝင်စားပနာ တိုင်းပြည်နန့် လူမျိုးအတွက် အသက်ပီးစွန့် လွှတ်ဝံ့ကေ ရခိုင်ပြည်ကို ထူထောင်လို့  ရပါ ဗျာယ်။ ဒေလေးသောင်းထဲကရခိုင်သူရဲကောင်းတိစွာပထမဆုံးအမျိုးသားနိုင်ငံရေးဦးသျှောင်အဖွဲ့ ချူပ်ကိုထူထောင်ရပါဖို့။ Institutionalization လို့ ခေါ်ရေလူမှုအဆောက်အအုံတည်ဆောက်ရေးအပိုင်းကို ဦးစားပီးပနာ ပရိုဖက်ရှင်းနယ် နိုင်ငံရေးကွန်ကရက်ကြီးဖြစ်လာအောင် လုပ်လားကတ်ရပါဖို့။ ဒေအဖွဲ့ ချူပ်ကြီးကို အခြီခံပနာ ရခိုင်အစိုးရကို ဖွဲ့  စည်း လားကတ်ရပါဖို့။ ဒေနိန်ရာမှာ ရခိုင်အစိုးရကိုဖွဲ့ဖို့ ၀န်ကြီးအမတ်အရည်အချင်းနန့်ပြည့်စုံရေအနည်းဆုံးအယောက်၁၅၀လိုအပ်လာပါဖို့။အောက်လွှတ်တော်အတွက်ဥပဒေပြုအမတ်အယောက် ၁၀၀ ဖြစ်ပြီးကေ အထက်လွှတ်တော်အတွက် အယောက် ၅၀ ဖြစ်ပါရေ။ ယပြီးကေ ဒေရခိုင်အစိုးရလက်အောက်မှာ ရခိုင်စစ်တပ်ကို ထူထောင်လားကတ်ရပါဖို့။ ရခိုင်စာပီကို မသုံးမနိန်ရဆိုရေ မူကိုချပနာ စာပီ ဖွံ့ ဖြိုးလာရေးကိုလုပ်ဆောင်လားရပါဖို့။ ရခိုင်အစိုးရတရားဝင်ရုံးသုံးစာရေရခိုင်စာဖြစ်ရပါဖို့။အရေးကြီးဆုံးကအေရခိုင်ကယ်တင်ရှင်လေးသောင်းစွာအချင်းချင်းတယောက်ကိုတယောက်နစ်နာအောင်အမျိုးသား အကျိုးစီးပွါးပျက်စီးစီရေ တခုလုပ်ရပ်ကိုလေ့ မကျူးလွန်ရ ဆိုရေ ဂတိသစ္စာစာချူပ်ကို လိုက်နာကျင့်သုံးကတ်ရပါဖို့။အေလေးသောင်းစွာကိုယ်ပိုင်အသိစိတ်နန့်ဇာဘ၀ဇာအဆင့်အတန်းဇာပတ်ဝန်းကျင်နန့် ဇာနိန်ရာကိုပင်ရောက်ရောက် မိမိကိုယ်ကိုတော်လှန်ရေး ဆိုရေ ကိုယ့်ဘ၀တိုးတက်ရာတိုးတက်ကြောင်းကို ရှာဖွေစိုင်းစားကတ်ရဖို့။ တရက်မှာ အနည်းဆုံး စာ လေးနာရီဖတ်ရဖို့။ ငါ့ဘ၀နန့် ငါ့ခန္ဓာကို ငါ့တိုင်းပြည်ထူထောင်ရေး နိုင်ငံရေးဖြစ်စဉ်က ပိုင်ရေလို့ စိတ်မှာ မှတ်ပနာ အခြီခံနိုင်ငံရေးအသိတရားနန့် ခြီလှမ်းမှန်မှန်လားကေ ဒေ ၂၁ ရာစုမှာ ရခိုင်သားတိချစ်တေ ရခိုင်လူမျိုး အတွက် ရခိုင်ပြည်ရေသီးခြားလွတ်လပ်တေတိုင်းပြည်တခုဖြစ်လာဖို့စွာကျိန်းသီနိန်ပါရေ။ ။ ။ခိုင်အောင်အောင်၁၈၊၀၅၊၂၀၀၉
"ရခိုင်ရို့ ပြဿနာ အဖြေရှာ"
ဒေနိကာလ ရခိုင့်နိုင်ငံရေးလူမှုရေးနယ်ပယ်တိမှာ ဖြစ်ပျက်နိန်ကတ်တေ ရခိုင်အချင်းချင်းကြားက မညီညွတ်မှုအတွင်းပြဿနာတိရေ ၁၇၈၄ခုနှစ်ဗမာပဒေသရာဇ်ဘုရင်ဘိုးတော်မောင်ဝိုင်းရခိုင်ပြည်ကိုကျူးကျော်ဝင်ရောက်မသိမ်းပိုက်ခင်ကာလကရခိုင်အချင်းချင်းကြားမှာ ဖြစ်ပျက်ခရေ ပဋိပက္ခတိနန့် လားပနာ ဆင်တူနိန်စွာကိုတွိရရေ။ ပြဿနာအစပြုလာခြင်း၊ ပြဿနာကို ဖြေရှင်းဖို့ ကြိုးပမ်းကတ်ခြင်း၊ ပြဿနာကပီးလာရေ ဆိုးကျိုး၊ နောက်ဆုံး ရခိုင်ရို့ ၏အချူပ်အချာအာဏာနန့် ထီးနန်း ဆုံးရှုံးလားရခြင်းတိနန့်  ပတ်သက်လို့  လေ့လာသုံးသပ်ကြည့်ရဖို့ဆိုကေအရေးကြီးရေအချက်အလက်တိကိုအဂုပိုင်တွိရရေ။နိုင်ငံရေးဦးဆောင်မှုစွမ်းရည်အပြည့်အ၀ဟိပနာ ဂေါင်းဆောင်မှုအရည်အချင်းနန့် ပြည့်စုံခရေ သီရိသုဓမ္မဘုရင် (၁၆၂၂-၁၆၃၈) ကွယ်လွန်လားခပြီးရေနောက်ပိုင်း ရခိုင်ရို့ လူ့ အဖွဲ့ အစည်းရေ စည်းလုံးညီညွတ်ရေးအင်အား ကျဆင်းလာပနာ ပြည်တွင်းနိုင်ငံရေး မငြိမ်မသက်ဖြစ်ပါလတ်တေ။ အုပ်စုဖွဲ့ အားပြိုင်မှုတိပေါ်ပါလတ်တေ။ ပြဿနာရေ အစုလိုက်အပြုံလိုက်လာတတ်တေဆိုရေ စကားအတိုင်း တဆက်တည်းမှာ စီးပွါးရေးအကျပ်အတည်းတိနန့် ကြုံတွိပါလတ်ရရေ။ နှစ်ပေါင်းရှစ်ဆယ်လောက် ရခိုင်ဘုရင့်နိုင်ငံ၏ စစ်ရေးနန့် စီးပွါးရေးအခြေခံအုတ်မြစ် တခုအဖြစ်ရပ်တည်နိန်ခရေ စစ်တကောင်းဆိပ်ကမ်းကိုလက်လွှတ်ဆုံးရှုံးလိုက်ရရေနောက်ပိုင်း ကူးသန်းရောင်းဝယ်ရေးနန့် ကုန်သွယ်ရေးတိပါ ကျဆင်းပါလတ်တေ။ နောက်ဆုံး ကိုယ်ရို့ အထဲက ပြဿနာကို အဖြေရှာဖို့ မစိုင်းစားပဲ လူမျိုးခြားဖြစ်တေ ဗမာကိုလားပနာ အားကိုးမိခြင်းကြောင့် ဘီစီ ၃၃၂၅ ကပင်စပနာထူထောင်တည်တံ့ပါလတ်တေ ရခိုင်ပြည်ရေ အေဒီ ၁၇၈၄ ခုနှစ် ဒီဇင်ဘာလ ၃၁ ရက်နိမှာ ဗမာပဒေသရာဇ်နယ်ချဲ့  ရို့ ၏ မတရားကျူးကျော်သိမ်းပိုက်ခြင်းကို ခံလိုက်ရပနာ သီးခြားလွတ်လပ်တေတိုင်းပြည်ဘ၀ကိုလက်လွှတ်ဆုံးရှုံးလိုက်ရရေ။အထက်က အချက်အလက်တိကို ခွဲခြမ်းစိတ်ဖြာကြည့်ကေ ရခိုင်ရို့ လူ့ အဖွဲ့ အစည်းကြီးတခုလုံးကို လွှမ်းမိုးချူပ်ကိုင်ထိန်းထားနိန်ရေ အမျိုးသားဂေါင်းဆောင်တိ စိုင်ဆက်မပြတ် မပေါ်ထွန်းလာခြင်း၊ အုပ်စုအားပြိုင်မှုကို ကြားဝင်စေ့စပ်ဖြေရှင်းပီးနိုင်ရေ အုပ်စုနှစ်ခုလုံးက ယုံကြည်အားထားကတ်ပြီးကေ သမာသမတ်ကျရေ အလယ်အလတ်လမ်းစိုင်နန့် တတိယအုပ်စုတစုမဟိခခြင်း နန့်  သူတင်းကိုယ်တင်းသူငြင်းကိုယ်ငြင်းကိုသူလျှော့ကိုယ်လျှော့ပြောင်းပနာအရေးကြုံလာကေအမြင်ကျယ်ရေအမျိုးသားတရပ်လုံးအကျိုးစီးပွါးကိုဦးတည်ပနာလက်တွဲလားနိုင်ရေးလမ်းကြောင်းကိုမရွီးချယ်ခကတ်ခြင်းတိကိုတွိရရေ။ဒေနိထက်ထိ နိုင်ငံရေးပါတီအဖွဲ့ အစည်းတိကြားမှာ ပြဿနာတိဖြစ်ကေ ကြားဝင်ညှိနှိုင်းအဖြေရှာဆုံးဖြတ်ပီးနိုင်ရေ အလယ်အလတ်အုပ်စုတစု ရခိုင်ရို့ လူ့ အဖွဲ့ အစည်းမှာ မပေါ်ထွန်းသိမ့်စွာကို တွိမြင်နိန်ရရေ။ ရခိုင်တမျိုးသားလုံးက ယုံကြည်အားထားရရေရခိုင်ရိုလူဘောင်တခုလုံးကိုလွှမ်းမိုးနိုင်မှုဟိရေအမျိုးသားဂေါင်းဆောင်သစ်တိကိုလေ့ပြုစုပျိုးထောင်ပီးနိုင်မှုအားနည်းပနာ ပေါ်ထွန်းမလာနိုင်သိမ့်လို့ ပြောကတ်ရပါဖို့ ။ နောက်ထပ်အားနည်းချက်တခုက အေနိကာလရခိုင်သားတိရေ ပြဿနာကို ထိုင်ပြောခြင်းမှာ ပိုလို့ အားသန်ပနာ အဖြေရှာဖို့ အပိုင်းကို ဦးစားပီးခြင်းနည်းနိန်သိမ့်ရေလို့  ဝေဖန်ရဖို့ ထင်ပါရေ။ အကျိုးဆက်က ပြဿနာတိရေ ပိုလို့ ကြီးလာပနာ ရခိုင်သားတိရေ ပြဿနာ၏သံသရာထဲမှာ လည်နိန်ကတ်ရခြင်းပင်ဖြစ်ပါရေ။ကျိန်းသီနိန်စွာတခုက ကမ္ဘာ့ရွာထက်က လူ့ အဖွဲ့ အစည်းတိုင်းမှာ ပြဿနာကိုယ်စီကိုယ်ငှ ဟိကတ်တေ။ အရာအားလုံးပြည့်စုံနိန်ရေ လူ့ ဘောင်စွာ မဟိ။ ဖြေရှင်းဖို့ လိုအပ်တေအကြောင်းအရာတခုခုနန့်  ရက်ပြတ်ရင်ဆိုင်နိန်ကတ်ရရေ။ အေပိုင်ကြုံတွိနိန်ကတ်ရခြင်းကို အရင်းတည်ပနာ အဖြေထုတ်ဖို့ ကြိုးစားယင်းနန့်  လူ့  ဘောင်လောကကို တဆင့်ပြီးကေတဆင့်ဖွံ့ ဖြိုးတိုးတက်လာစီရေ။ အရေးကြီးဆုံးက ဖြစ်လာရေ ပြဿနာကို ဥပက္ခာပြုရှောင်ဖယ်ပနာ မျက်စိကိုစုံမှိတ်ပြီးကေ လစ်လျူမရှုမိစီဖို့ ပင်ဖြစ်တေ။ လူတိ ဇာအတွက်ငြင်းခုန် ရန်ဖြစ်နိန်ကတ်လေ။ ဇာအကြောင်းအရာကို ပဓါနထားပနာ ပြောနိန်ကတ်စွာလေ။ လူတိအဖြေရှာဖို့ ကြိုးစား နိန်ကတ်တေ ပြဿနာ၏ရင်းမြစ်က ဇာချင့်လဲ။ အေပိုင် ပြဿနာကို ခွဲခြမ်းစိတ်ဖြာဆန်းစစ်ကြည့်ပနာ အကောင်းဆုံးအဖြေထုတ်နိုင်ခြင်းကရာ လူတိကို ပြဿနာ၏အရှင်သခင်ဘ၀ကို ပိုင်ဆိုင်လာနိုင်အောင် ဖန်တီးပီးရေ။ ဖြစ်လာရေ ပြဿနာကိုကြောက်ပနာရင်မဆိုင်ဝံ့ခြင်းကပြဿနာ၏ကျေးကျွန်ဘ၀ကိုရောက်လားနိုင်စီရေ။လူမျိုးတူညီမှု၊ ကိုးကွယ်ရေ ဘာသာတူညီမှု၊ ဖြတ်သန်းလာရေ သမိုင်းကြောင်းတူညီမှု၊ ယိုင်ကျေးမှု ဘာသာစကားဓလေ့ထုံးတမ်းစိုင်လာတိတူညီမှုတိ ပေါင်းစပ်မျှဝီထားရေ ဘုံအမျိုးသားရေးလက္ခဏာနန့် ညီညွတ်မှုတိ ဟိကေလေ့ ပြဿနာဖြစ်လာကေ ရခိုင်သားတိုင်းလိုက်နာကျင့်သုံးဖို့  အားလုံးသဘောတူညီချက်နန့် စံပြုပြဌါန်းထားရေ စည်းမျဉ်းဥပဒေတရပ်မဟိခြင်းကလေ့ အားနည်းချက်တခုလို့ ဆိုကတ်ရဖို့ ။ လူဆိုစွာ ဘက်လိုက်တတ်တေသဘောဟိလို့  အားလုံး၏ဆန္ဒနန့် အတည်ပြုထားရေ ဘုံယုံကြည်အားကိုးလောက်တေ တရားစီရင်ရေးမဏ္ဍိုင်တခုဟိခြင်းက အယင်ကထက် ပြဿနာတိဖြေရှင်းရေးအပိုင်းကိုချဉ်းကပ်ရေခါ ပိုပြီးကေလွယ်ကူလာစီဖို့ လို့ ထင်ရေ။ အမှန်တရားကို ဒေလူတိမပိုင် အမှန်တရားကို အမှန်တရားကရာ ပိုင်ဆိုင်ရေအတွက်နန့်  အမှန်တရားကိုသီးခြားနိန်ရာတခုပီးပနာ လူတိမှာဖြစ်လာရေ ပြဿနာတိကို ဆုံးဖြတ်ပီးခိုင်းခြင်းက ပဋိပက္ခဖြေရှင်းရေးအတွက် ပိုလို့ အထောက်အကူဖြစ်စီနိုင်ဖို့ လို့ ယူဆမိရေ။ ဥပမာ- ရခိုင်အမျိုးသားထုတရပ်လုံးကိုယ်စားပြုတက်ရောက်တေ ညီလာခံမှာ လူထုပဋိဥာဉ်စာချူပ်တခုချူပ်ဆိုပနာ အမျိုးသားညီညွတ်ရေးနန့် အတွင်းပြဿနာဖြေရှင်းရေးအတွက် အတည်ပြုပြဌါန်းထားလိုက်ကေ ရခိုင်အချင်းချင်းကြားမှာ တရားမျှတတန်းတူညီမှုနန့် ငြိမ်းချမ်းရေးကို တည်ဆောက်လာနိုင်ဖို့ လို့ ထင်ရေ။ ယေမှရာ တစုတစည်းတည်းဟိရေ အမျိုးသားအင်အားကိုတည်ဆောက်လာနိုင်ပနာ လိုချင်ရေပန်းဖူးကို ဆွတ်ခူးလာနိုင်ဖို့ လို့  ယုံကြည်လိုက်ပါယင့်။ ။ ။ခိုင်အောင်အောင်Friday, February 6, 2009
"ရခိုင်ရို့ အတွက် အနာဂတ်ခရီး"
ခိုင်အောင်အောင်သမိုင်းမှတ်တမ်းတိအရ ဘီစီ ၃၃၂၅ ခုနှစ်ကပင် သီးခြားလွတ်လပ်ပြီးကေ အချူပ်အချာအာဏာပိုင်ဆိုင်ရေ တိုင်းပြည် တပြည်အဖြစ် ကမ္ဘာ့မျက်နှာပြင်ထက်မှာ ကိုယ့်စံ ကိုယ်ဟန် ကိုယ့်အားမာန်နန့်  ရပ်တည်ပါလတ်တေ ရခိုင်ပြည်ရေ အေဒီ ၁၇၈၄ ဒီဇင်ဘာလ ၃၁ ရက်နိန့် မှာ မောင်ဝိုင်းဦးဆောင်ရေဗမာပဒေသရာဇ်တိ မတရားကျူးကျော် နယ်ချဲ့ ပနာ သိမ်းပိုက်ခြင်းကို ခံလိုက်ရရေ။ ယင်းအချိန်ကပင် ရခိုင်ရို့ ၏နိုင်ငံရေးပါဝါ (Arakanese Political Power)၊ မွီးရာပါလူ့  အခွင့်အရေး (Fundamental Human Rights)၊ ကိုယ့်ကံကြမ္မာ ကိုယ်ဖန်တီးပြဌါန်းပိုင်ခွင့် (Self-determination) နန့်  လူမှုစီးပွါးဖွံဖြိုးတိုးတက်မှုတိ (Socio-economic growths and developments) အားလုံးဆုံးရှုံးလားခရရေ။ "လူမျိုး တမျိုးကိုတခြားလူမျိုးတမျိုးက ကိုလိုနီပြုဖိနှိပ်အုပ်ချူပ်ထားကေ အအုပ်ချူပ်ခံ လူမျိုးရေ တခါလေ့ဖွံဖြိုးတိုးတက်လီဖို့  မဟုတ် " ဆိုရေ စကားက လုံးဝမှန်ကန်ကြောင်းကို ဗမာစစ်ပဒေသရာဇ်တိ သွီးစုပ်နှိပ်စက်အုပ်ချူပ်နိန်ရေ အဂုခေတ် ကာလရခိုင်ပြည် အခြေအနေက သက်သီခံပြနိန်ရေ။ နှစ်ပေါင်းရာနန့် ချီပနာ သက်တမ်းရှည်လာနိန်ရေ ရခိုင်ရို့ အဖြစ်ဆိုး (The tragedy of Arakan)၊ အစုလိုက်အပြုံလိုက် ဒုက္ခရောက်ရခြင်း (Mass of tormented)၊ စိတ်သောကဖိစီးမှု (Careworn)၊ အကြောက်တရား (Fear) နန့်  ၀ီခွဲမရ လမ်းစပျောက်နိန်ရရေလူတိ (Bewildered human beings) ဒေပိုင်ဘ၀အနိဋ္ဌါရုံတိက လွတ်မြောက်အောင် ရုန်းကန်ကြိုး ပမ်းကတ်ရဖို့ စွာရေ သွီးစစ်တေအမျိုးသားရေးတာဝန်နန့်  လူသားဖြစ်ခြင်း၏ ဂုဏ်သိက္ခာကို ရယူလိုခြင်း ၀တ္တရားပင်ဖြစ်တေ။ လူစိတ်ပျောက်နိန်ရေ ဗမာစစ်ဝါဒီတိနန့် ယင်းသူရို့ စစ်အုပ်ချူပ်ရေး ယန္တရားအောက်က ဖောက် ထွက်ပနာ ရခိုင်ရို့  ကိုယ်ပိုင် အနာဂတ်ခရီးသစ်ကိုလားနိုင်ခါမှရာ ရခိုင်ရို့  လူ့ ဘောင်နန့်  မျိုးဆက်တိကို ထိန်းသိမ်း လာနိုင်ဖို့ ။ဒေနိန်ရာမှာ အရေးကြီးဆုံးက ရခိုင်တိအားလုံးဘက်ပေါင်းစုံက အောက်ကျနောက်ကျ လူလုံးမ လှဖြစ်နိန် ကတ်တေအချိန်မှာ ဇာပိုင်အင်အားနန့် ဗမာစစ်အုပ်စုလက်အောက်က ရုန်းထွက်ပနာ လွတ်လမ်း ရှာနိုင်ဖို့ လဲ ဆိုရေ မိန်းခွန်းပင် ဖြစ်တေ။ ဒေမိန်းခွန်းကို အဖြေရှာဖို့  သမိုင်းကပီးရေ သင်ခန်းစာတိကို လေ့လာခြင်း နန့်  နိုင်ငံရေး ယိုင်ကျေးမှုကိုပြန်ပြင်ခြင်း ဆိုရေ အပိုင်းချေ (၂) ခု ခွဲပနာ သုံးသပ်တင်ပြချင်ရေ။ သမိုင်းကပီးရေသင်ခန်းစာတိကို လေ့လာခြင်း ရခိုင်ရို့ သမိုင်းကို လှန်ကြည့်လိုက်ကေ အလိမ်ခံရခြင်းစာမျက်နှာတိနန့်  ပြည့်နိန်ရေ။ စီးပွါးရေးပျက်ကိန်းဆိုက်ပြီးကေ နန်းတွင်းအရှုပ်အထွီးနန့်  အချင်းချင်းသွီးကွဲပနာ ရခိုင်ပြည်ထိန်းမနိုင်သိမ်းမရဖြစ်နိန်ရေ အချိန်မှာ မဟာသမ္မတရာဇာကို နန်းချပြီးကေ မင်းသားဟရီကို နန်းတင်ဖို့  အေမင်းသားကို ထောက်ခံရေ ရွာစားမြို့ စားတိက ဗမာပဒေသရာဇ်မင်း ဘိုးတော်မောင်ဝိုင်းနန့် လားပြီးကေ မဟာမိတ်ဖွဲ့ ခကတ်တေ။ သူခိုးကို ဓါးရိုးကမ်း ဒမြကို အိမ်တန်းခါးဖွင့်ဗျာယ်ကြိုမိ ခရေ အကျိုးဆက်ကြောင့် မြောက်ဦးမြို့ ထီးနန်းကျပနာ ဗမာတိသိမ်းခြင်းကိုခံလိုက်ရရေ။ "နောက်မြီးဆွဲစိတ်နန့်  သူတပါးကိုအားကိုးရေစိတ်ဟိရေ လူတိုင်း ဒေပိုင်အမှားမျိုးကို ကျူးလွန်တတ်တေ။ အဂုခေတ် ရခိုင်ရို့  သတိထားစရာ ပင်ဖြစ်တေ" လို့  ရခိုင်အမျိုးသားခေါင်းဆောင်ဆရာစံကျော်ထွန်းက သူရီးထားခရေ "ဇာလုပ်ကတ်ဖို့  လေး" စာအုပ်မှာ သတိပီးပြောထားခစွာကို ဖတ်ရရေ။ ရခိုင်အမျိုးသားတော်လှန်ရေးခေါင်းဆောင်တယောက်ဖြစ်တေ ဗုံပေါက်သာကျော် ကလေ့ သူရီးခရေ "တော်လှန်ရေးခရီးဝယ်" စာအုပ်မှာ "ဂျပန်ကိုတော်လှန်ဖို့  အင်္ဂလိပ်ကိုဆက်သွယ်ပနာ ပူးပေါင်း ဆောင်ရွက်နိုင်ဖို့ အတွက် ရခိုင်ပြည်ကခေါင်းဆောင်တိနန့်  ဗမာတိလာလို့ တွီ့  ဆုံဆွေးနွေးကတ်တေခါ ရခိုင်ခေါင်း ဆောင်ရို့ က "ဗြိတိသျှဗားမား လွတ်လပ်ကေ ရခိုင်ပြည်ကို သီးခြားလွတ်လပ်ရေးပီးရဖို့ လို့ တောင်းဆိုရေခါ ဗမာကိုယ် စားလှယ်တိက အလွယ်တကူသဘောတူကတ်တေ။ ယင်းလောက်နန့် မလုံလောက်သိမ့်လို့  ဗုံပေါက်သာကျော် ကိုယ်တိုင် ရန်ကုန်ဖဆပလဌါနချူပ်မှာ ဆွေးနွေးခါလေ့ ယင်းအတိုင်းသဘောတူချက်ရခရေ။ ယင်းအတွက်နန့်  ဘုံရန်သူဖက်ဆစ်ဂျပန်ကို တော်လှန်ရေးအတွက် ရခိုင်ခေါင်းဆောင်ရို့  ဗမာခေါင်းဆောင်တိနန့် ပူးပေါင်းခကတ်တေ" လို့  မှတ်တမ်းတင်ရီးထားခရေ။ ၁၉၄၈ အင်္ဂလိပ်ဘားက လွတ်လပ်ရေးရရေခါ ရခိုင်သားစွာ လွတ်လပ်တေစာရင်း မှာမပါ။ ဗမာဘားမှာ အလိမ်ခံရပနာ ဗမာကိုလိုနီစစ်ကျွန်ဖြစ်ပါလတ်စွာ အေနိန့် ထက်ထိပင်ဖြစ်တေ။ အထဲလားကောက်ကျစ်တေ ဗမာပရိယာယ်မာယာနန့်  မဟာဗမာအမျိုးသားရေးဝါဒက ကမ္ဘာ့နိုင်ငံရေးရာသီ ခေတ်စနစ် တိလိုက်လို့  အပြင်က သကာလူးထားပနာ ချိုချင်စွာပိုင်အကွန်ဆောင်နိန်ကေလေ့ အထဲမှာအတွင်းအနှစ်သား တမာအခါးတုံးက တခါလေ့နိန်ရာမပြောင်းလမ်းမစောင်းခ။ ဖားတပိုင်းငါးတပိုင်း ပါလီမန်ဗမာဒီမိုကရေစီ၊ ဗမာ့နည်း ဗမာ့ဟန်ဆိုရှယ်လစ်ဝါဒ နန့်  အဂု နအဖဗမာစစ်အုပ်စုပြောနိန်ရေ သိပ္ပံနည်းကျအမျိုးသားရေးဝါဒ အေယှင့်တိ အားလုံးကို ခြုံကြည့်လိုက်ကေ အဖြေက ဗမာတိကရာ နိုင်ငံရေးအာဏာကိုလက်ဝါးကြီးအုပ်ချူပ်ကိုင်ပနာ ဗမာမဟုတ်တေလူမျိုးတိကို ဗမာစစ်ကိုလိုနီကျွန်ပြုလားရေပင် ဖြစ်တေ။ မဟာဗမာကျိုင်းမြောင်း လူမဆန်ရေ အမျိုးရေးဝါဒကို အကောင်အထည်ဖော်လားရေးပင်ဖြစ်တေ။ "ပြည်ထောင်စုမပြိုကွဲရေး" ဆိုရေ စကားလုံးကို တကျာကျာအော်နိန်စွာကို ကြည့်ကေ ဗမာတိ ဇာနိုင်ငံရေးခြီလှမ်းနန့်  လားနိန်ကတ်လေဆိုစွာကို ခန့်  မှန်းသိနိုင်ရေ။ လူမျိုးကြီးဝါဒယုံကြည်မှုနန့် အယူအဆလမ်းစဉ်တိ (Chauvinistic beliefs and doctrines)၊ လူမျိုးရေးခွဲခြား မုန်းတီးမှုဝါဒ (Racialism) နန့်  ရက်စက်ကြမ်းတမ်းရေ စစ်စနစ်ပုံစံအမျိုးသားရေးဝါဒ (An aggressive and militaristic form of nationalism) တိ ပေါင်းစပ်ပနာ ဒေနိန့်  ဗမာတိကျင့်သုံးနိန်ရေ အမျိုးသားရေးဝါဒ ကို အင်္ဂလိပ်ပိုင် (Expansionist nationalism) လို့  ခေါ်ရေ။ အေ၀ါဒကို အခြီခံပနာ ဗမာမှုပြုရေးပေါ်လစီ(Burmanization Policy) ကို လက်တွီ့ ကျကျ အကောင်အထည်ဖော်ကျင့်သုံးနိန်ခြင်းပင်ဖြစ်တေ။ နိုင်ငံရေးလိမ်လည်မှုတိကို ကျူးလွန်ပနာ ဗမာအကျင့်စရိုက်ယိုင်ကျေးမှုအတွေးအခေါ်တိက ကျောရိုးခံထားရေ ဒေနိန့်  ကာလ နအဖဗမာစစ်စနစ်ရေ အနည်းဆုံးနောက်ထပ် နှစ်ပေါင်း (၃၀) လောက် အေပုံစံအတိုင်းလားနိန်ဖို့ စွာက တန်းလို့ လှမ်းမြင်နိန်ရရေ။ အစိမ်းရောင်ယူနီဖောင်းကနိန် ခေါင်းပေါင်းတိုက်ပုံပြောင်းလားနိုင်ရေ။ ယေကေလေ့ ကျိုင်းမြောင်းလူမဆန်ရေ ဗမာဝါဒက မပြောင်းလားနိုင်။ အခြီခံနိုင်ငံရေးအပြောင်းအလဲ (Fundamental Political Change) ဖြစ်လာဖို့ လမ်းစကလေ့ အ၀ီးကြီး။ ဒေနိန့် ဗမာတိကျင့်သုံးနိန်ရေ နိုင်ငံရေးပေါ်လစီက ဗမာအချင်းချင်း တီးလုံးတိုက်ပနာ နိုင်ငံရေးအာဏာကို ချူပ်ကိုင်လားရေး ပေါ်လစီပင်ဖြစ်တေ။ ကျိန်းသီနိန်စွာက ဗမာတိ၏ နိုင်ငံရေးအပြောင်းအလဲရေ ရခိုင်တိနန့် မဆိုင်။ ဗမာတိနောက်ကိုလိုက်ပနာ အမောင် တောင်မှန်း မြောက်မှန်း မသိလုပ်နိန်လို့ မဖြစ်။ အတိတ်သမိုင်းနန့် အေနိန့် ထိအောင် ဗမာဘားမှာ အလိမ်ခံနိန်ရခြင်းကို သင်ခန်းစာယူလို့  ရခိုင်တိလမ်းကိုရာ ရခိုင်တိလားပနာ ရခိုင့်နိုင်ငံရေးအဆင့်အတန်းကို မြှင့်တင်လားကတ်ရဖို့ ဖြစ်တေ။အငှားကားကို တခါလေ့ တယောက်လေ့မဆီး (No one ever washes a rented car) ဆိုရေ စကားပိုင် ရခိုင်ရို့ ကိစ္စကို တယောက် လေ့လာလုပ်ပီးဖိုမဟုတ်။ရခိုင်တိရာလုပ်ကတ်ရပါဖို။့ ။ နိုင်ငံရေးယိုင်ကျေးမှုကိုပြန်ပြင်ခြင်း ရခိုင်သားတိဇ၀ီဇ၀ါဖြစ်နိန်စွာတခုက ဒီမိုကရေစီလို့ ပြောကေ "ဗမာနောက်လိုက်" လို့ ထင်နိန်ကတ်တေ။ ကမ္ဘာကြီးမှာ ယိုင်ကျေးရေ လူမျိုးတိုင်းကျင့်သုံးနိန်ရေ လေဘရယ်ဒီမိုကရေစီစနစ်ကို ကျင့်သုံးလိုခြင်းရေ ဗမာနောက်ကိုလိုက်ခြင်း မဟုတ်လို့  ပြောချင်ရေ။ နောက်တခုက ဒီမိုကရေစီစနစ်စွာ ဗမာတိတီထွင်လိုက်တေ နိုင်ငံရေးစနစ်တခုမဟုတ်။ ယကေလေ့ဒေနိန့်  ဗမာတိပြောနိန်ရေ ဗမာ့နည်းဗမာ့ဒီမိုကရေစီနောက်ကိုလိုက်ကေတော့ သေချာရေ ဗမာ နောက်လိုက်ဖြစ်လားနိုင်ရေ။ အေနိန်ရာမှာ အဓိကထားပနာပြောချင်စွာက ရခိုင်နန့် ရခိုင်ကြားထဲမှာ ဒီမိုကရေစီ အတွေးအခေါ်ယုံကြည်မှုတိကိုလက်တွီ့ ကျကျကျင့်သုံးလားလို့  ရရေဆိုရေ စကားပင်ဖြစ်တေ။ယပြီးကေ လွတ်လပ်ရေးနန့်  ဖယ်ဒရယ်ဒီမိုကရေစီမှာ ဇာလမ်းကိုလားကတ်ရဖို့ လေးလို့  ၀ီခွဲမရဖြစ်ပနာ ငြင်းနိန်ကတ် စွာကိုတွီ့  ရရေ။ ဒီမိုကရေစီ သို့ မဟုတ် စီးပွါးရေးတိုးတက်မှုမဟိခင် တိုင်းပြည်တခုအရင်ဟိရဖို့  (Before you can have democracy or economic development, you have to have a state.) ဆိုရေ စကားတခုဟိရေ။ ကိုယ်ပိုင်တိုင်းပြည်နိုင်ငံတခုမဟိပဲနန့်  ယင်းလူမျိုးရေ ဒီမိုကရေစနစ်ကိုတည်ဆောက်လို့ မရနိုင်။ လွတ်လပ်ရေးနန့်  အချူပ်အချာအာဏာရေ နိုင်ငံရေး၏အမြင့်ဆုံးတန်ဖိုးဖြစ်ပြီးကေ အေတန်ဖိုးကို ပိုင်ဆိုင်ထားခါမှရာ ယင်းလူမျိုးရေ ကမ္ဘာ့လက်ဟိနိုင်ငံရေးစနစ်တခုဖြစ်တေ လေဘရယ်ဒီမိုကရေစီစနစ်ကို ကျင့်သုံးလို့ ရလာနိုင်ဖို့ ။ လူမျိုးတမျိုး ၏အမြင့် ဆုံးတန်ဖိုးဖြစ်တေ လွတ်လပ်ရေးနန့် အချူပ်အချာအာဏာကို ရခါမှရာ ကိုယ့်ကံကြမ္မာကိုယ်ဖန်တီးပိုင်ခွင့်ကိုရလာဖို့ ဖြစ် တေ။ အတိတ်ကာလမှာ အနုချေထွက်ခါစ ပင်လုံဖယ်ဒရယ်အိမ်မက်ကို ဗမာအမျိုးသားရေးဝါဒက နင်းခြွီဖျက်ပစ်လိုက်တေ။ ယင်းအတွက်နန့်  နိုင်ငံရေးအဖြေကောင်းတခုဖြစ်နိုင်ကေလေ့ ဖယ်ဒရယ်စနစ်စွာ ခေတ်သစ်မြန်မာနိုင်ငံအတွက် သီလားပြီးသား နိုင်ငံရေးအိုင်ဒီယာတခုဖြစ်ပါလတ်တေ (Although it can be a good political solution, the federal system is seen as an anachronism in the modern Burma). "ငြိမ်းချမ်းရေးနတ်သမီးရှိက စစ်ပွဲဆိုရေ တမန်တော် နတ်ဆိုးဟိရေ" ဆိုရေစကားပိုင် တန်းတူညီမျှရေ ငြိမ်းချမ်းရေးရဖို့  ထိုက်တန်ရေတန်ဖိုးတော့ ပီးကတ်ရဖို့ ။ ဖဲသာတစ်ယူရိုနန့်  မာစီးဒီးကားဝယ်စီးလို့ မရရေပိုင် ဗမာက စစ်ရေးနိုင်ငံရေးအင်အားတိသာနိန်ရေအချိန်မှာ လူမျိုး ပေါင်းစုံအတူတူလက်တွဲလို့ တန်းတူနိန်နိုင်ရေ ဖယ်ဒရယ်ဗဟုလူ့ ဘောင်ကိုထူထောင်ဖို့  အမျိုးသားဝါဒနန့်  စစ်သွီးကြွ နိန်ရေ ဗမာတိ စိုင်းစားဖို့ မဟုတ်စွာက လက်ဟိနိုင်ငံရေးဖြစ်စဉ်နန့် ပကတိအခြေအနေလို့ ပြောကတ်ရဖို့ ။ ဗမာတိ အများစုနိန်ရေ တိုင်းတိမှာ ပြည်တွင်းစစ်ပီသရေ ပြည်တွင်းစစ်ပွဲတိဖြစ်ကေတော့ ဗမာဖက်က ဖယ်ဒရယ်ဆိုရေ စကားလုံးကို အယင်ပိုင်လိမ်ဖို့  ပရိယာယ်တမျိုးနန့် ပြောလာနိုင်ရေ။ ရခိုင်ပြည်ကို ဗမာတိလက်ထဲက ပြန်ပနာ ဇာပိုင်ရအောင်ယူဖို့ လေး ဆိုရေ မဟာဗျူဟာအတွက် နည်းဗျူဟာ (၂) ခု တော့ဟိရေ။ပထမတခုက ရခိုင်လူထုကို အခြီခံပနာ ရခိုင့်လူထုလွတ်မြောက်ရေးတိုက်ပွဲကို ဆင်နွဲခြင်းပင်ဖြစ်တေ။ အေတိုက်ပွဲ အတွက် ရခိုင်ပြည်အထဲနန့် အပြင် ဟန်ချက်ညီညီ သွီးစည်းခိုင်မာစည်းလုံးညီညွတ်ဗျာယ် ဗမာစစ်ကိုလိုနီ ခေတ်သစ် ပဒေသရာဇ်ကို တော်လှန်ကတ်ရဖို့ ။ အနုနည်းအကြမ်းနည်းနှစ်ခုစလုံးနန့် ထိုးစစ်ဆင်ဗျာယ် လူစိတ်မဟိရေ ဗမာဒမြဂိုဏ်းစစ်သွီးကြွတိကို ရခိုင်ပြည်ကမောင်းထုတ်ကတ်ရဖို့ ။ အဂုဗမာစစ်တပ်မှာ စစ်သားအင်အား (၅) သိန်းဟိရေ။ ရခိုင်ပြည်မှာ တပ်ချ ထားစွာ အင်အား (၅) သောင်း ပတ်ဝန်းကျင်လောက်ရာဟိရေ။ ရခိုင်သား (၃) သန်းမှာ (၅) ရာခိုင်နှုန်း တစ်သိန်းခွဲ လောက် လူထုအင်အားစုနိုင်ကေတော့ ရခိုင်ပြည်ကို ဧကန်မုချပြန်ရလာနိုင်ရေ။ တော်လှန်ရေးအစ ငတ်ခြင်းက ဆိုရေ စကားပိုင် အားလုံးငတ်နိန်ကတ်တေအချိန်မှာ အေပိုင်တော်လှန်ရေးမျိုးဖြစ် လာတတ်စွာ ကမ္ဘာ့သမိုင်းမှာ မှတ်တမ်းတင်ထားကတ်စွာတိကို ဖတ်ရရေ။ ယကေလေ့ အေပိုင်တော်လှန်ရေး အထမြောက်အောင်မြင်ဖို့  ကျောထောက်နောက်ခံမဟာမိတ်နိုင်ငံတနိုင်ငံတော့လိုအပ်တေ။ ဒုတိယတခုက မီးစင်ကြည့်ကရေ နည်းဗျူဟာလို့ ပြောကတ်ရဖို့ ။ မင်းသီခေတ်ပြောင်းတတ်တေ ဗမာရာဇ၀င်နန့်  အညီ နအဖစစ်ခေါင်းဆောင်သန်းရွှေသီလို့  အလှည့်အပြောင်းကာလမှာ ရှစ်ဆယ့်ရှစ်ပိုင် တတိုင်းပြည်လုံး လူထုအုံကြွမှုဖြစ် လာကေ ရခိုင်ပြည်ကို ရခိုင်တိ အသာချေထိန်းယူပနာ လွတ်လပ်ရေးကြေညာဖို့ ပင်ဖြစ်တေ။ အေပိုင်လုပ်နိုင်ဖို့ အတွက် လူဦးရေ (၅) ထောင်လောက်ဟိရေ ကိုယ်ပျောက်စစ်တပ် (Invisible Army) ကိုကြိုတင်ဖွဲ့  စည်းထားဖို့ လိုအပ်တေ။ ကိုယ်ပျောက်စစ်တပ်ဆိုစွာ အရေးကြုံမှ လက်နက်ကိုင်ပနာ စစ်တပ်ချက်ချင်းဖွဲ့ နိုင်အောင် စစ်ပညာကိုလျှို့ ဝှက်သင်ယူ ထားခြင်းပင် ဖြစ်တေ။ အေပိုင် အထက်ကနည်းဗျူဟာနှစ်ခုစလုံးအတွက် ရခိုင်သားမှာ အင်အားတောင့်တင်းခိုင်မာရေ နိုင်ငံရေးမျိုးဆက်သစ် အုပ်စုတစုဟိဖို့ လိုအပ်နိန်ရေ။ ဒေပိုင်နိုင်ငံရေးမျိုးဆက်သစ်တရပ်ပေါ်လာဖို့  လက်ဟိရခိုင်ရို့ နိုင်ငံရေးယိုင်ကျေးမှုကို ပြန်ပြင်ရဖို့  ဖြစ်တေ။ အမျိုးသားရေးခံစားချက်ချေတခုဒေးနန့် နိုင်ငံရေးလုပ်စွာထက် နိုင်ငံရေးစနစ်အတွေးအခေါ် အယူအဆနန့်  ကမ္ဘာ့အခင်းအကျင်းအပြောင်းအလဲတိကို စနစ်တကျလေ့လာပနာ နိုင်ငံရေးတော်လှန်ရေးလောက ထဲမှာ ဘ၀မြုပ်ဇောက်ချလုပ်လားဖို့  စံမှီရေ ရခိုင်နိုင်ငံရေးသမားတိလိုအပ်တေ။ နိုင်ငံရေးပါတီအဖွဲ့ အစည်းတိလေ့ သာမန်သမရိုးကျ အဖွဲ့ ချေတိအဆင့်ကနိန် စွမ်းရည်ပြည့်ဝခေတ်မှီရေ ပရိုဖက်ရှင်းနယ်ပါတီအဖွဲ့ အစည်းတိ ဖြစ်လာအောင် ပြုပြင်ပြောင်းလဲဖွဲ့ စည်းလားကတ်ရဖို့ ။ ဗမာတိ ကနိန်ကတ်တေရာသီပေါ်နိုင်ငံရေးဇာတ်ကို ဆားမရ ရီမရအချိန်ကုန်ထိုင်ကြည့်နိန်ခြင်းထက် ရေရှည်အနာဂတ်ကို မျှော်မှန်းပနာ ကိုယ့်အင်အားကို ကိုယ်ရို့ တည်ဆောက်ဖို့  အလှည့်အပြောင်းကာလတခုကိုရောက်နိန်ဗျာယ်။ ဗမာတိက ပုံစံတကျမှိုင်းတိုက်ထားလို့  ပျက်စီးနိန်ကတ်ရရေ နိုင်ငံရေးစရိုက်ပျက်တိနန့်  သံသရာလည်နိန်ခြင်းကို အဆုံးသတ်ပနာ နိုင်ငံရေးအခင်းအကျင်းသစ်ကို ရခိုင်သားတိ ဖန်တီးကတ်ရဖို့ အချိန်ရောက်ပါလတ်ဗျာယ်လို့  ထင်ရေ။ အဂုလက်ဟိအခြေအနေထက်အဆင့်မြင့်ရေ နိုင်ငံရေး ယိုင်ကျေးမှုကိုတည်ဆောက်ကတ်ရဖို့  စွာက နိုင်ငံရေးမျိုးဆက်ဖြစ်ချင်ရေ ရခိုင်သားတိုင်း၏ တာဝန် ၀တ္တရား ပင်ဖြစ်တေ။ ရခိုင်ရို့ နိုင်ငံရေးယိုင်ကျေးမှုကို ပြုပြင်ပြောင်းလဲမှုလုပ်ဖို့  လေဘရယ် (Liberalism) အိုင်ဒီယာကို ကျင့်သုံးသင့်ရေလို့  အကြံပြုချင်ရေ။ လူတဦးချင်းစီ၏အခွင့်အရေး၊ အရည်အချင်း၊ ဖွံ့ ဖြိုးတိုးတက်ခြင်းကို ဇောင်းပီးရေ လေဘရယ် အယူအဆကို အားကောင်းအောင်လုပ်နိုင်ခါမှရာ ရခိုင်ရို့ နိုင်ငံရေးအခင်းအကျင်းပြောင်းလဲလာနိုင်ဖို့ ။ အေနိန်ရာမှာ ရှုပ်ထွီးမလားစီချင်စွာက လေဘရယ်ဒီမိုကရေစီစွာ နိုင်ငံရေးစနစ် (System) ဖြစ်ပြီးကေ လေဘရယ်လီဇင် (Liberalism)စွာ အိုင်ဒီယိုလိုဂျီ (Ideology) ဖြစ်တေ။ လေဘရယ်ဒီမိုကရေစီစနစ်ကို သီးခြားလွတ်လပ် တေတိုင်းပြည် နိုင်ငံဟိခါမှရာကျင့်သုံးလို့ ရနိုင်ကေလေ့ လေဘရယ်လီဇင် ကို လူတဦးတယောက်ချင်းစီ၏မွီးရာပါကိုယ်ပိုင်အခွင့်အရေး (Individual rights) အတွက်ကိုယ့်ဒူးကိုယ်ချွန်ပနာ ကိုယ်စွမ်းကိုယ်စဟိခြင်းကို လိုလားရေ လူပုဂ္ဂိုလ်တိုင်းက ကျင့်သုံးနိုင်ရေ။ အရေအတွက်နန့်  အရည်အချင်းပါ အားနည်းနိန်ရေ ရခိုင်ရို့ အတွက် အရေအတွက်အနည်းချေနန့်  အရည်အချင်းပြည့်ဝရေ နိုင်ငံရေးမျိုးဆက်သစ်တရပ်ကို ပြုစုပျိုးထောင်မွီးထုတ်နိုင်ခါမှရာ ရခိုင်ရို့  လူပီသလွတ်လပ် တေဘ၀ကို ရယူပိုင်ဆိုင်ဖို့  နိုင်ငံရေးတိုက်ပွဲကို ဆင်နွဲလာနိုင်ကတ်ဖို့ ။ နှစ်ပေါင်း (၂၅) နှစ်ကို အချိန်သတ်မှတ်ပနာ နိုင်ငံရေးယိုင်ကျေးမှုပြုပြင်ပြောင်းလဲရေးနန့်  မျိုးဆက်သစ်ပေါ်ထွန်းလာရေးကို အစီအစိုင်တကျ အကောင်အထည် ဖော်လားကေ ဗမာတိကျချိန်မှာ ရခိုင်တိတက်လာနိုင်ပနာ ရခိုင်ရို့ အနာဂတ်ခရီးသစ်ကို လှမ်းလားနိုင်ဖို့ စွာက အမှန်ပင်ဖြစ်ပါရေ။ ။ ။
Sunday, January 18, 2009
"ဒီမိုကရေစီကျကျ လူသားဝါဒ"
ခိုင်အောင်အောင်မတန့် တမ်းလားနိန်ရေ နိုင်ငံရေးဖြစ်စဉ်တိ နောက်မှာ နိုင်ငံရေးယုံကြည်ချက် အိုင်ဒီယာလော်ဂျီ တိဟိနိန်ရေ။မျက်စိနန့် ကြည့်မြင်တွီ့ နိန်ကတ်ရရေ နိုင်ငံရေးအခင်းအကျင်းပြကွက်တိကို ကြိုးကိုင်အကွက်ချ စီဇိုင်ညွန်ပြနိန်စွာက နိုင်ငံရေးဝါဒတိပင် ဖြစ်တေ။ ဥပမာပီးရဖို့ ဆိုကေ သီလားခပြီးသားဗမာစစ်အာဏာသျှင်နေ၀င်းရေ ဗီလိန်ဇာတ်ရုပ်နန့် အပီပြင်ဆုံး သရုပ်ဆောင်နိုင်ခအောင် မဟာဗမာအမျိုးသားရေးဝါဒက အသက်သွင်းဇာတ်တိုက် မောင်းနှင်ပီးပစ်ခရေ။ ဒေနိန့် ကာလ နအဖဗမာသန်းရွှေစစ်အုပ်စုကလေ့ မဟာဗမာအစွန်းရောက်အမျိုးသားရေး ၀ါဒသွီးနန့် ရှင်သန်နိန်ကတ်တေ စစ်ဝါဒီတိရာ ဖြစ်တေ။ ယင်းအတွက်နန့်  ကျိုင်းမြောင်းရေ အမျိုးသားရေးဝါဒ ဥခွံထဲက ဗမာတိရုန်းမထွက်နိုင်ရေ ကာလပတ်လုံး လူ့  ယိုင်ကျေးတိ လက်ခံကျင့်သုံးရေ ဒီမိုကရေစီစနစ်ဆိုစွာ မြန်မာနိုင်ငံမှာ ပေါက်ဖွားဖြစ်ထွန်းလာဖို့  မဟုတ်စွာက ကျိန်းသီနိန်ရေ။ ဒေမဟာဗမာ အမျိုးသားရေးဝါဒမြစ်မကြီးက ခွဲဖြာစီးဆင်းလား ရေ မြစ်ချေသုံးမြစ်ကို အေပိုင်တွီ့ လာရရေ။ ပထမမြစ်ချေက အင်္ဂလိပ်ပိုင် (Factionalism) လို့ ခေါ်ရေ ဂိုဏ်းဂနစွဲဝါဒ၊ ဒုတိယက (Cronyism)လိုခေါ်ရေကိုယ်နန့်သိရေလူတစုလောက်နန့် ရာဝီစားမျှစားလုပ်တေ၀ါဒနန့်  တတိယက (Nepotism) လို့ ခေါ်ရေ ဆွေမျိုးမိသားစု ကောင်းစားရေး ၀ါဒတိပင် ဖြစ်တေ။ ဒေအယူဝါဒတိကို နအဖဗမာစစ်အုပ်စု ထဲမှာ ထထင်ရှရှားတွီ့  ကတ်ရရေပိုင် ဗမာအတိုက်အခံနိုင်ငံရေးအင်အားစုထဲမှာလေ့အေအကျင့်တိကိုမြင်တွီ့နိန်ကတ်ရရေ။ ပိုပြီးကေ စိတ်ဝင်စားဖို့ ကောင်းစွာက ဗမာတိမှာ ရာဇ၀င်နန့် ချီပနာ ဥပဒေ ဆိုစွာကို လက်ကိုင်ထား မကျင့်သုံးခကတ်။ (Absolutism) သက်ဦးဆံပိုင်ဘုရင်စနစ်ရာ ဟိပြီးကေ စည်းမျဉ်းခံဘုရင်စနစ် (Constitutional Monarchy) ဆိုစွာ ဗမာသမိုင်းမှာ မဟိခ။ တရားမျှတရေ ဥပဒေတိမှာ အခြေမပြုရေ အေပိုင်နိုင်ငံရေးယိုင်ကျေးမှုက မြန်မာနိုင်ငံမှာ ဒီမိုကရေစီဖြစ်ထွန်းလာဖို့ စွာကို အကြီးအကျယ်ပိတ်ဆို့  တားဆီးနိန်ခြင်းပင်ဖြစ်တေလို့ သုံးသပ်ရပါဖို့ ။ အားလုံးသိကတ်တေ အတိုင်း ဒီမိုကရေစီစွာ လူတိ၏သဘောတူညီမှုဆန္ဒတ်ိနန့် ရွီးဆွဲထားရေ ဥပဒေဿတိကို လိုက်နာကျင့်သုံး အကောင်အထည် ဖော်ခြင်းပင်ဖြစ်လို့  လူတစုဘားမှာရာ နိုင်ငံရေးအာဏာတည်ဟိနိန်ချင်ရေ ဗမာတိ ဓလေ့စရိုက်နန့်  ဆန့် ကျင်ဖက်ဖြစ်နိန်ရေ။ နောက်တခုက ဗမာတိမှာ ကွဲပြားခြားနားခြင်းကို လက်ခံကျင့်သုံး နိုင်ရေ ဗဟုဝါဒနန့်  အတူယှဉ်တွဲ နိန်ထိုင်လိုစိတ် (Pluralism and integrated mind) ပျောက်နိန်စွာကို တွီ့ ရရေ။ ဒေယှင့်က မြန်မာနိုင်ငံမှာ ဗမာကလူအများစုဖြစ် ကေလေ့ နိုင်ငံကြီးသားစိတ်မဟိစွာကို ဖော်ပြနိန်ရေ။ စစ်စနစ်မွီးဖွား ရှင်သန် လာရခြင်းရေ လူတိ၏ဓလေ့စရိုက်တိနန့် ဆက်စပ်နိန် လို့  ဗမာတိအသိအမြင်ကျယ်လာခြင်းကရာ မြန်မာနိုင်ငံမှာ နိုင်ငံရေးအခင်းအကျင်း သစ်ကိုပြောင်းလဲလာနိုင်စီဖို့ ထင်ရေ။ ယကေလေ့ ရာစုနန့် ချီပနာ အမြစ်တွယ်လာလတ်တေ ဒေအကျင့်တိကို ပြုပြင်ဖို့ ဆိုစွာ လက်တွီ့  မှာ ထင်သလောက် မလွယ်ကူနိုင်။ အေနိန့် ထက်တိုင် နိုင်ငံရေးပင်မရီစီးကြောင်းကို ဗမာတိကရာ ချူပ်ကိုင်ထားလို့  အပြင်ပန်းနန့် အနှစ်သာရပါ တခုလေ့မပြောင်းလာခြင်းကို သတိချပ်သင့်ရေ။ ဗမာဗဟိုပြုရေချဉ်းကပ်မှု (Burman-based approach) နန့်  မြန်မာနိုင်ငံ ၏နိုင်ငံရေးပြဿနာကို လုံးဝမဖြေရှင်းနိုင်ကြောင်းကို ကုန်လွန်လားခရေ ကာလတိက သက်သီခံနိန်ရေ။ ဇာစနစ်နန့် ဇာသူပင် အုပ်ချူပ်ချူပ် ဗမာတိလက်ထဲမှာ နိုင်ငံရေးအာဏာဟိရေးက အဓိကမဟာဗျူဟာဖြစ်နိန်လို့  နအဖစစ်အုပ်စု သက်ဆိုးရှည်နိန် ရခြင်းပင် ဖြစ်တေ။ ယင်းပိုင်ဆိုကေတခုပိုင်လေ့ အဖြေမဟိဗျာယ်ဂါလို့  မိန်းခွန်းထုတ်ချင်စိတ်ပေါ်လာလီမေ။ ဇာပိုင်ဖြေရှင်းရဖို့ လဲ ဆိုရေ အဖြေကိုသိကေ လူတိ ဖန်တီးရေ နိုင်ငံရေးပြဿနာကို လူတိဖြေရှင်းနိုင်ရေ။ အရေးကြီးဆုံးက နိုင်ငံရေးအပြောင်းအလဲကို ဗမာတိလက်ထဲမှာ ပုံမအပ်ထားပဲ ကိုယ့်စံကိုယ့်ဟန်နန့်  ကိုယ့်အင်အားကို ကိုယ်တည်ဆောက်ခြင်း ကရာ နောင်တချိန်မှာ ကိုယ်လိုချင်ရေနိုင်ငံရေးအခွင့်အရေးကိုရယူပိုင်ဆိုင်လာနိုင်ပါဖို့။ဒေနိန်ရာမှာ ရခိုင်အများစုက ဒီမိုကရေစီလို့ ပြောကေ ဗမာနောက်လိုက်ဖြစ်လားဖို့ လို့့ ယူဆနိန်ကတ်တေ။ ဒေနိန့် ကာလ ဗမာတိပိုင် ပါးစပ်က ဒီမိုကရေစီလို့ ပြောပနာ လက်တွီ့ အလုပ်လုပ်တေခါ မဟာဗမာလူတစုဝါဒကို ကျင့်သုံးနိန်ကေတော့ခါ သေချာရေ ဗမာနောက်လိုက်ဖြစ်လားနိုင်ရေ။ သို့ သော် ဒီမိုကရေစီ၏ပင်မရင်းမြစ်နန့်အနှစ်သာရရေရခိုင်ရို့လူ့ဘောင်နန့် လိုက်လျောညီထွေမှုဟိရေ။ ရခိုင်ရို့ သမိုင်းမှာ စည်းမျဉ်းခံဘုရင်စနစ်ကို ကျင့်သုံးခရေ။ ရခိုင်ဘုရင်မင်းထီးရေ သူ ချထားရေ စည်းကမ်းကို သူ ချိုးဖောက်မိလို့  သူ့့လက်ညှိုးကို သူဖြတ်ပနာ တရားမျှတခြင်းဥပဒေဿ၏အရိပ်မှာ ခိုဝင်နိန်ထိုင်ခရေ။ ဗမာတိ ရခိုင်နိုင်ငံကို မသိမ်းခင်ကာလမှာ ရခိုင်ပြည်မှာ ရခိုင်ပြည်သူ့ သမ္မတနိုင်ငံ (People Republic of Arakan) ကို ထူထောင်ခကတ်တေ။ ကမ္ဘာ့နိုင်ငံရေးစီးကြောင်း အပြောင်းအလဲနန့်  ၁၇၇၆-ခုနှစ် အမေရိကန်လွတ်လပ်ရေးအကြောင်းကို ယင်းအချိန်က နိုင်ငံတကာနန့် ကူးသန်း ရောင်းဝယ်ရေးလုပ်နိန်ရေ ရခိုင်ခေါင်းဆောင်တိ မသိဘဲနိန်လီဖို့ မဟုတ်။ အတိုချူပ်ပြောရဖို့  ဆိုကေ လစ်ဘရယ် ဒီမိုကရေစီ၏ အနှစ်သာရကျင့်စဉ်တိကို ဒေနိန့် ကာလ ရခိုင်လူ့ အဖွဲ့ အစည်းအတွက် ကျင့်သုံးဖို့ ကြိုးစားခြင်းရေ ဗမာ နောက်လိုက်လုပ်ခြင်းမဟုတ်ကြောင်းပင် ဖြစ်တေ။ ဗမာနန့် ရခိုင်ကြားမှာ ဒီမိုကရေစီ မဖြစ်ထွန်း နိုင်ကေလေ့ ရခိုင်နန့်  ရခိုင်ကြားမှာ ဒီမိုကရေစီကျင့်သုံးလို့ ရနိုင်ရေ။ ထုံးစံအတိုင်း ဖျက်မြင်းတိကတော့ဟိဖို့ ။ ဗမာတိဘားမှာ နှစ်ပေါင်းရာနန့်  ချီပနာ ကျွန်ဖြစ်လာရရေအတွက်နန့်  ရခိုင်သားတိထဲမှာလေ့ ဗမာပိုင်ခေတ်နောက်ပြန်ဆွဲပနာ ပဒေသရာဇ်စိတ် ပေါက်နိန်ရေလူတိက တပုံကြီး။ ယကေလေ့ လူသားဝါဒနန့် တရားမျှတခြင်းကို တန်ဖိုးထားခရေ အစိုင်အလာက ရခိုင့်လူ့ ဘောင် မှာ ဒီမိုကရေစီဖြစ်ထွန်းနိုင်ရေ ရီခံမြီခံကောင်းပင်ဖြစ်တေ။ လူတဦးချင်းစီ၏ကိုယ်ပိုင်အခွင့်အရေးကို အာမခံပီးရေ ဒီမိုကရေစီကျကျ လူသားဝါဒကိုကျင့်သုံးခြင်းကရာ ရခိုင်လူ့ ဘောင်လွတ်လမ်းပင် ဖြစ်တေလို့ နိဂုံးချူပ် ပြောချင်ရေ။ ။ ။
Tuesday, January 6, 2009
"ယုံကြည်မှု လူမှုရင်းမြစ်နန့် ရက္ခိတရို့ အနာဂတ်"
ခိုင်အောင်အောင်နိုင်ငံရေး လူမှုရေးနယ်ပယ်ရပ်ဝန်းတိမှာ ဟိနိန်ကတ်တေ ရခိုင်သားရို့ ၏တိမ်းညွတ်မှုက "သွီးစည်းညီညွတ်ခြင်းရေ ရခိုင်ရို့ အတွက်အဓိကလိုအင်ဖြစ်တေ" ဆိုရေ ခံယူချက်ပင်ဖြစ်တေလို့  သုံးသပ်နိုင်ဖို့ ထင်ရေ။ အတိတ်ကာလမှာ အချင်းချင်းညီညွတ်မှုပြိုကွဲခြင်းကြောင့် အချူပ်အချာအာဏာကျဆုံးလားရခြင်းနန့် လူ့ အဖွဲ့ အစည်းကြီး တခုလုံး ဖျက်ဆီးခံနိန်ရခြင်းက ရခိုင်ရို့ အတွက် မမိန့် နိုင်ရေ သမိုင်းသင်ခန်းစာ ဖြစ်နိန်ရေ။ ညီညွတ်ခြင်းအင်အားကရာ ရခိုင်ရို့  ခေတ်ကို ပြန်ပနာဆန်းသစ်လာနိုင်စီဖို့ ဆိုရေ အတွေးအခေါ်ရေ မှန်ကန်ရေ အမြင်ချေတခုဖြစ်တေလို့  ပြောချင်ရေ။ ယကေလေ့ ယုံကြည်မှု ဆိုရေ "စင်" ခံထားခါမှရာ ညီညွတ်ခြင်းရွက်နုတိ ဖူးသစ်လန်းဆမ်းသီးပွင့်လာနိုင်ဖို့ လို့  ထင်မိ ရေ။ တယောက်ကိုတယောက် မယုံကေ တယောက်နန့်  တယောက်ညီညွတ်ဖို့ ဆိုစွာ လုံးဝမဖြစ်နိုင်ပါ။ ယင်းအတွက် နန့်  ညီညွတ်ရေးစကားလုံးကို သုံးကေ ယုံကြည်မှုဆိုရေ စကားလုံးကိုအရင် ပလ္လင်ခံပနာပြောကတ်ရဖို့  လို့  ယူဆမိပါ ရေ။ ယေမှရာ သွီးစစ်တေညီညွတ်ခြင်းနန့်  ပန်းဖူးကိုရောက်နိုင်ရေ အင်အားကို ရလာနိုင်ဖို့ ဖြစ်တေ။ ယုံကြည်မှုကို ခွဲခြမ်းစိတ်ဖြာကြည့်လိုက်ကေ အကောင်းမြင်ယုံကြည်ခြင်းနန့် အဆိုးမြင်ယုံကြည်ခြင်းတိကို တွီ့ ကတ် ရရေ။ အကောင်းမြင်ဝါဒကရာ အနာဂတ်ကောင်းတခုကို ဖန်တီးဖို့ အတွက် မဟာဗျူဟာတခုဖြစ်တေ (Optimism is a strategy for making a better future)။ ယင်းပိုင်မဟုတ်ပဲ အဆိုးမြင်မှိုင်းတိစွဲကပ်ဗျာယ် အနာဂတ်စွာ ကောင်းလာ နိုင်ဖို့ မဟုတ်လို့  ယုံကြည်လိုက်ကေအနာဂတ်ကိုရုပ်လုံးဖော်တည်ဆောက်ဖို့ အင်အားဇွဲလုံ့ လတိကို တခုလေ့မလုပ်ခင် အယင်ဖြုန်းတီးဖျက်ဆီးပစ်လိုက်ခြင်းပင် ဖြစ်တေလို့ ဆိုရပါဖို့ ။ မျှော်လင့်ချက်မဟိလို့  ထင်မြင်မိကေ မျှော်လင့်ချက်ဟိ လာဖို့ မဟုတ်လို့  အာမခံလိုက်ခြင်းပင် ဖြစ်တေ (If you assume that there is no hope, you guarantee that there will be no hope)။ "တခုလေ့ဖြစ်မလာနိုင်ဝေး" ဆိုပြီးကေ ကိုယ့်ဦးနှောဏ်ကို တန်းခါးပိတ်ပနာ ဖြစ်နိုင်ခြင်းတိ ကိုရှာဖို့ လမ်းတိကိုဖျောက်ပစ်လိုက်ခြင်းက ရခိုင်ရို့ ကြားထဲမှာ စိမ့်ဝင်ပျံ့ နှံ့ နိန်ရေ မိမိကိုယ်ကို ယုံကြည်မှုပျောက်နိန် ခြင်း အိုင်ဒီယာပိုင်းဆိုင်ရာအကျပ်အတည်း (Ideological crisis) တခုပင် ဖြစ်တေလို့  ပြောရဖို့ ထင်ရေ။ နာမေကြီး လူမှုသိပ္ပံပညာသျှင် ဖရန်စစ် ဖူကူယားမား(Francis Fukuyama) က ယုံကြည်မှုစွာ လူ့ ဘောင်တိုးတက်ဖွံ့ ဖြိုးဖို့  အခြေခံအကျဆုံး အလိုအပ်ဆုံးနန့် အကောင်းဆုံး လူမှုစံတန်ဖိုး (Social virtue) တခုပင်ဖြစ်တေလို့  ဆိုဖူးရေ။ ယုံကြည်မှုနန့် အယူအဆအားကောင်းလာခါမှရာ နိုင်ငံရေးယုံကြည်ချက်(Political conviction) ခိုင်မာတောက်ပလာဖို့့ ဖြစ်ပါရေ။ လူ့ အဖွဲ့ အစည်းညီညွတ်ရေးအတွက် ယုံကြည်မှုပိုင် အာရုံစိုက်အလေးထားသင့်ရေ နောက်တခုကတော့ကေ လူမှုရင်း မြစ် (Social capital) ပင်ဖြစ်ပါရေ။ လူမှုဗေဒပညာရှင် ဂျိမ်း(စ်)ကိုး(လ်)မန် (James Coleman) က လူမှုရင်းမြစ်ကို "အသင်းအဖွဲ့  အုပ်စုတိထဲမှာ အလုပ်အတူတူလုပ်နိုင်ရေ လူတိ၏စွမ်းရည်" လို့ အဓိပ္ပါယ်ဖွင့်ဆိုဖူးပါရေ။ ဖရန်စစ်ဖူကူ ယားမား ကတော့ကေ "မျှဝီထားကတ်တေ စံနန့် တန်ဖိုးတိဘားမှာ အခြေခံပနာ ဘုံရည်မှန်းချက်ပန်းတိုင်ကိုလား ကတ်ဖို့  ပေါင်းစပ်လက်တွဲအလုပ်လုပ်ခြင်း" လို့  လူမှုရင်းမြစ်ကို ရှုမြင်ပါရေ။ စီးပွါးရေးပညာသျှင်တိက တိုင်းပြည်လူ့  ဘောင်တိုးတက်ခြင်းရေ လူသားရင်းမြစ် (Human capital) ဖြစ်တေ အသိပညာနန့် စွမ်းရည် (Skills and Knowledge) တိဘားမှာရာ မူတည်နိန်ရေလို့  နားလည်လက်ခံထားကတ်ကေလေ့ ဒေ အသိပညာနန့် စွမ်းရည်ပြည့်ဝ ရေ လူတိအတူတူလက်တွဲအလုပ်လုပ်နိုင်ဖို့  လူမှုရင်းမြစ် လိုအပ်သိမ့်ရေ လို့  ဂျိမ်း(စ်)ကိုး(လ်)မန် က ထောက်ပြပြောဖူးခပါရေ။ ဒေနိန်ရာမှာ စီမံခန့်  ခွဲမှုနည်းပညာနန့်  လူမှုရင်းမြစ်ကို မှားပနာ မမြင်မိဖို့ အရေးကြီးပါရေ။ စီမံ ခန့် ခွဲမှုက နည်းပညာနန့်  အသင်းအဖွဲ့  တိ၏ ပြုမှုလုပ်ဆောင်ချက်သဘောဆန်ပနာ လူမှုရင်းမြစ်က ကျယ်ပြန့် ရေလူ့ အဖွဲ့  အစည်းအတွင်း ပိုင်းက ယုံကြည်မျှဝီနားလည်မှုတိ ဖြစ်ပါရေ။ ရခိုင်သားတိမှာ လူမှုရင်းမြစ်နန့် စီမံခန့်  ခွဲမှုနည်းပညာပိုင်းမှာပါ အား နည်းနိန်စွာကိုတွီ့ မြင်နိန်ကတ်ရရေ။အသိပညာနန့် စွမ်းရည်အားမကောင်းခြင်းကပါ ခိုင်မာရေအသင်းအဖွဲ့  အဆောက် အအုံကြီးတိ (Institutions) မတည်ဆောက်နိုင်အောင် ဟန့် တားထားရေလို့  ပြောကတ်ရပါဖို့ ။ ဘုံနိုင်ငံ ရေးအမြင်နန့်  သွီးစစ်တေ အမျိုးသားရေးစိတ်ဓါတ်တိ ရခိုင်သားတိုင်းမှာ ရှင်သန်နိန်ကတ်ကေလေ့ နိုင်ငံရေး တော်လှန် ရေးအဖွဲ့  အစည်းတိနန့် နိုင်ငံရေး သမားတော်လှန်ရေးသမားရို့ ၏ စည်းရုံးမှုနန့်  ခေါင်းဆောင်နိုင်မှုအရည် အချင်းညံ့ ဖျင်းနိန်ခြင်း ၏အကျိုးဆက်က နိုင်ငံရေးမှာ ရခိုင်လူထု၏ထဲထဲဝင်ဝင်လုပ်ဆောင်လာကတ်ခြင်းက ကျဆင်း နိန်ရေ။ ကိုယ်မယုံကြည် ရေ နိုင်ငံရေးသမားကို မထောက်ခံစွာက လူသားရို့ သဘာဝလို့ ပြောရဖို့ ထင်ရေ။ လူမှုရင်းမြစ် ကို အားကောင်းအောင် အရင်တည်ဆောက်ပြီးခါမှရာ ရခိုင်လူထု၏ပူးပေါင်းမှု မြင့်မားရေနိုင်ငံရေးနယ်ပယ်တခုကိုတည်ဆောက်နိုင်ဖို့လိုပြောချင်ရေ။ ယေကေ လူမှုရင်းမြစ်တိ အားကောင်းမောင်းသန်ဖြစ်လာအောင် ဇာပိုင်လုပ်ကတ်ရပါဖို့ လဲ။ အသိပညာကို တူးဖော် ခြင်းကရာ လူမှုရင်းမြစ်ကို အားကောင်းအောင်လုပ်ဖို့  အဓိကလမ်းကြောင်းမှန်ပင်ဖြစ်ပါရေ။ ယပြီးကေ ခေါင်းဆောင် မှုစွမ်းရည်ပြည့်ဝရေ နိုင်ငံရေးမျိုးဆက်သစ်တိမွီးထုတ်ပီးခြင်းနန့်  လူကိုအခြေမပြုပဲ မူဝါဒရေးရာဘားမှာ အခြေခံရေ လူမှုရေးနိုင်ငံရေးအဖွဲ့ အစည်းတိ (Principles based social and political organizations) ဖွဲ့  စည်းတည်ထောင် ခြင်းကရာ ရခိုင်ရို့ လူမှုအခင်းအကျင်းသစ်ကို ဖန်တီးလာနိုင်ဖို့ လို့  ယူဆမိပါရေ။ လူချင်းတူကေလေ့ လူစွမ်းလူစ ကွာခြားနိန်ခြင်းကြောင့် အနာဂတ်မှာ ကြုံတွီ့ လာနိုင်ရေ စိန်ခေါ်မှုတိကို ရင်ဆိုင်ဖြေ ယှင်းလားဖို့  ကမ္ဘာ့ရွာထက်မှာဟိရေ လူ့ အဖွဲ့ အစည်းတိုင်းအတွက် ခေါင်းဆောင်ဆိုစွာ ရက်ပြတ်လိုအပ်နိန်ရေအရာတခုဖြစ်နိန်ဖို့စွာကလူသားရို့၏သဘာဝနိယာမတရားတခုလို့ယူဆမိရေ။ စုပေါင်းခေါင်းဆောင်မှု၏အကျိုးရလဒ်ကရာလူ့အဖွဲအစည်းတခုလားနိန်ရေအနာဂတ်လမ်းကြောင်းကိုအကောင်းဆုံးလမ်းညွှန်ပြပီးနိုင်ရေထင်မိရေ။ သေချာနိန်စွာတခုက ရက္ခိတရို့  အနာဂတ်ကို လှမ်းမြင်ကြည့်နိုင်ဖို့ ပစ္စက္ခကာလမှာ ကြိုတင်ပြင်ဆင်တည်ဆောက်ကတ်ဖို့လိုနိန်စွာကအမှန်ပင်ဖြစ်တေ။လူမျိုးတမျိုး၏အနာဂတ်စွာယင်းလူမျိုး၏နိုင်ငံရေးဆိုင်ရာအခွင့်အရေးပြည့်ပြည့်၀၀ရဟိခြင်းမှာမူတည်နိန်ရေဖြစ်တေအတွက်အခြေခံနိုင်ငံရေးအဆောက်အအုံတိအားကောင်းလာရေးကိုဦးစားပီးလုပ်ဆောင်လားပနာလူစွမ်းလူစဟိရေနိုင်ငံရေးမျိုးဆက်သစ်ခေါင်းဆောင်တ်ိကို ပြုစုပျိုးထောင်ပီးခြင်းကရာ နောင်တချိန်မှာ ရခိုင်ရို့ အနာဂတ်ကို ရခိုင်တိရာ ပိုင်ဆိုင်လာနိုင်ဖို့ လို့  ယုံကြည်မိလိုက်ပါယင့်။ ။ ။
Thursday, December 25, 2008
"ရခိုင်ရို့ လွတ်လမ်းကို မှန်းမျှော်ကြည့်ခြင်း"
ခိုင်အောင်အောင် အချိန်ကာလဆိုရေအသက်သွီးနန့်လည်ပတ်ပနာအသက်ရှင်နိန်ရေရာစုသစ်ပင်ကပြက္ခတိန်ရွက်ဟောင်းချေတရွက်ကြွီကျလားခြင်းပဂျီကားချပ်ချေတခုကိုခင်းကျင်းပြသနိန်ရေအချိန်မှာနောက် ထပ်ရွက်နုချေတရွက်က အဆင်သင့်ဖူးသစ်ဗျာလ် ထွက်လာလတ်ဖို့  တာစူနိန်ရေ။ ရာသီ သဘာဝ က မျိုးဆက်မပြတ်လက်ဆင့်ကမ်းလားခြင်းကို တာဝန်မပျက်လုပ်ဆောင်ပီးနိန်ရေလို့  ပြောကတ်ရဖို့ ထင်ရေ။ ဒေပိုင် ရာစုသစ်ပင်ကရွက်နုပြန်ရေအချိန်မှာ ရခိုင်ရို့ အတွက်က သွီးမတိတ်သိမ့်ရေ သမိုင်းအနာကို ပျောက်အောင်ကုသဖို့  ဆီးရှာလို့ မတွီ့ နိုင်သိမ့်ရေ ဘ၀ကို ရောက်နိန်ကတ်ရရေ။ ဇာပင်ဖြစ်ဖြစ် လူတိဖန်တီးရေ ပြဿနာအားလုံးကို လူတိဖြေရှင်းနိုင်ရေဆိုရိုးစကားအတိုင်းအတိတ်ကအရှုံးကိုပြောင်းပြန်လှန်ပနာအောင်မြင်ခြင်းအနာဂတ်သစ်ကိုတည်ဆောက်လားနိုင်ဖိုကပစ္စက္ခမှာကျင့်သုံးသင့်ရေအကောင်းဆုံးမဟာဗျူဟာနည်းဗျူဟာပင် ဖြစ်တေလို့ ထင်မြင်မိရေ။ကမ္ဘာ့လူ့ သမိုင်းမှာ အရပ် ၅ ပေ ရာဟိရေ ကျွန်သားချေတယောက်က ဥရောပတိုက်ကြီးတခုလုံး ကို သိမ်းပနာ ပြင်သစ်အင်ပါယာကို ထူထောင်နိုင်ခရေ။ ယင်း ကျွန်သားချေ နပိုလီယံ ဘိုနာဘတ် (Napoleon Bonaparte) ၏ စိတ်ကူးအိမ်မက်က တခုတည်းရာဟိရေ ဥရောပကို ဖွဲ့  စည်းတည် ဆောက်ရေးပင် ဖြစ်တေ။ ဒုတိယကမ္ဘာစစ်အလွန်မှာ ဖြစ်တည်လာရေ ဒေနိန့် ကာလ ဥရောပ သမဂ္ဂရေ နပိုလီယံ မက်ခရေ အိမ်မက်အပိုင်းအစကောက်ကြောင်းတိကို ချဉ်းကပ်မှုပုံစံသစ်နန့်  ဆက်စပ်ထားခြင်းပင် ဖြစ်တေလို့  ပြောကေလွန်လီဖို့ မထင်မိပါ။ နပိုလီယံက "တော်လှန်ရေးကို တည်ဆောက်လို့ မရရေပိုင် ရပ်ထားလို့ လေ့မရနိုင်ပါ။ အနိုင်ရဟိခြင်းလုံ့  လစွမ်းအားတိနန့်  လမ်းညွှန်ပြခြင်းကို မျိုးဆက်သစ်အချေတိပါးကို လက်ဆင့်ကမ်းပနာ ပီးခြင်း တခုတည်းကရာ တော်လှန်ရေးကို အောင်မြင်နိုင်စီရေ" လို့ ပြောခဖူးပါရေ။ တထပ်စာ အတွေးအခေါ်နန့် ရေရှည်ကို မကြည့်ပဲ တော်လှန်ရေး တော်လှန်ရေးလို့ ထိုင်အော်နိန်ခြင်းက တော်လှန်ရေး၏အောင်မြင်မှု ပန်းတိုင်ပန်းဖူးကို မဆွတ်ခူးနိုင်လို့ ပြောခြင်းပင် ဖြစ်တေ။ နောက်ပြီးကေ သူပြောခရေ စကားချေ တခွန်းက "ခေါင်းဆောင်ဆိုစွာ မျှော်လင့်ချက်တိကို မျှဝီပီးရေ လူတယောက်ဖြစ်တေ" လို့  ဆိုပါရေ။ သေချာနိန်စွာတခုက အနာဂတ်အတွက်လားရာအမြင် (vision for future) တခုမဟိပဲ ခေါင်းဆောင်မဖြစ်လာနိုင်လို့ ပြောကတ်ရဖို့ ထင်ရေ။
နောက်ထပ် အရပ် ၅ ပေ နန့်  ၂ လက်မရာဟိရေ လူတယောက်က လူဦးရေသန်းပေါင်းနှစ်ရာ ကျော်လောက်ကို ဆင်းရဲမွဲတေခြင်းနွံထဲက ဆွဲထုတ်ပီးနိုင်ခရေလို့ ပြောကေယုံကတ်ဖို့ လား။ သူ့  ၏ရေရှည်အမြင်ဖြစ်တေ ဖွံ့ ဖြိုးတိုးတက်ရေးနန့် ခေတ်မှီခြင်းအတွက် တန်းခါးဖွင့်ပေါ်လစီက အဂေါင်ဂေါင့် နှစ်ပေါင်း ၃၀ အတွင်းမှာ သန်းပေါင်းရာချီရေ ဆင်းရဲသားနင်းပြားတိ ဘ၀ကို ပြောင်းလဲစီပနာ စီးပွါးရေးဖွံ့ ဖြိုးတိုးတက်တေ ဒေနိန့် ကာလတရုတ်ပြည် ဖြစ်လာအောင် လမ်းညွှန်ပြပီး ခရေ။ သူ့ နာမေက တိန့် ရှောင်ဖိန့်  (Deng Xiaoping)။ သူက "ကြောင်တကောင် မဲခြင်းဖြူခြင်းထက် ကြွက်ဖမ်းတတ်ကေ ယင်းကြောင်ရေ ကြောင်ကောင်းဖြစ်တေ" လို့ ပြောခဖူးရေ။ တရုတ်ကွန်မြူနစ်ပါတီက အုပ်ချူပ်ထားကေလေ့ ဆိုရှယ်လစ်တန်းခါးပိတ် စီးပွါးရေး စနစ်တခု တည်းကို တရားသီဆုပ်ကိုင်မကျင့်သုံးပဲ ပြင်ပကမ္ဘာနန့် ဆက်သွယ်ပနာ ဈီးကွက် စီးပွါးရေးစနစ်နန့်  တိုင်းပြည်က ထိန်းချူပ်မောင်းနှင်ရေအရင်းရှင်စနစ် (State Capitalism) ကို အကောင်အထည် ဖော်ဗျာလ် ခေတ်မှီဖွံ့ ဖြိုးတိုးတက်ရေးကို ချီတက်လားကတ်ဖို့  ပြုပြင်ပြောင်းလဲရေး မဟာဗျူဟာ သစ်ကို ချမှတ်ခရေ တိန့် ရှောင်ဖိန့် ၏ စီးပွါးရေးတန်းခါးဖွင့်မူဝါဒသစ်က တရုတ်ပြည်ကို ခေတ်သစ်တခုပါးကိုရောက်လားအောင်ပို့ ပီးလိုက်တေလို့  ဆိုကေမှားလီဖို့ မထင်မိပါ။
လူ့ အဖွဲ့ အစည်းနိုင်ငံတခုပြောင်းဖို့  လားရာအမြင်သစ် (new vision) ကို စိုင်းစားတွေးခေါ် ဦးဆောင်ချမှတ်နိုင်စွမ်းဟိရေ ခေါင်းဆောင်တိလိုရေပိုင် ထိုချမှတ်လိုက်တေ မဟာဗျူဟာတိကလေ့ လူတိ၏အခြေခံဘ၀နန့် သဟဇာတဖြစ်ပနာထပ်တူကျဖို့ တော့ လိုရေလို့ ထင်မိရေ။ ဖြစ်နိုင်ခြေ (possibility) ကို အရင်းတည်ထားရေ လမ်းညွှန်မှုကရာ ဖြစ်နိုင်ခွင့် (opportunity) ကို သယ် ဆောင် ယူလာပီးနိုင်ဖို့ စွာက ကျိန်းသီနိန်ရေ။ ဟားဗတ်တက္ကသိုလ်ပါမောက္ခ ဂျိုးဇက်ညီး (Joseph Nye) ၏ ခေါင်းဆောင်ဖို့ ပါဝါတိ (Powers to lead) ဆိုရေ စာအုပ်မှာ ပါဝါမာ (Hard power)နန့်  ပါဝါပျော့(Soft power) ပေါင်းထားရေ လိမ္မာပါးနပ်တေပါဝါ (Smart power) ကရာ သတင်း နည်းပညာခေတ်နန့် ရက်ပြတ်ပြောင်းလဲနိန်ရေ နိုင်ငံရေး၊ စီးပွါးရေး၊ လူမှုရေးနယ်ပယ်မှာ အခရာ ကျအဓိကဖြစ်တေ ခေါင်းဆောင်နိုင်မှုအရည်အချင်းတခုဖြစ်လာဖို့ လို့  လေ့လာသုံးသပ် ထောက်ပြ ထားရေ။
အနှစ်ချူပ်ပြောရဖို့ ဆိုကေ ရခိုင်ရို့ လွတ်လမ်းက ခေါင်းဆောင်နိုင်စွမ်းဟိရေ နိုင်ငံရေးမျိုးဆက်သစ် တိလက်ထဲမှာရာ ဟိနိန်ရေလို့ ပြောကတ်ရပါဖို့ ။ ဒေနိန့် ကာလ နိုင်ငံရေးမျိုးဆက်ဖြစ်ချင်နိန် ကတ်တေ ရခိုင်တိ အနာဂတ်ကို ဇာလောက်ထိအ၀ီးကြီး ကြည့်နိုင် မြင်နိုင်စွမ်းဟိလေ ဆိုရေ လားရာအမြင်မှာ အခြေတည်ပနာ နိုင်ငံရေးအခင်းအကျင်းသစ်က ဖြစ်ပေါ်လာနိုင်ရေ။ အနာဂတ်စွာ ပစ္စက္ခက မွီးထုတ်ပီးလိုက်တေ ရလဒ်ကိုခင်းကျင်းပြသခြင်းရာ ဖြစ်လို့  လက်ဟိအခြေအနေမှာ ဇာလောက်ထိပြင်ဆင်ထားကတ်ဗျာလ်လေ ဇာပိုင်နိုင်ငံရေးအမြင် နန့် နှစ်ပေါင်းရာချီနိန်ရေ ရခိုင်ရို့  လူ့ ဘောင်အဖျက်ခံနိန်ရခြင်းကို ပြုပြင်တည်ဆောက်လားကတ်ဖို့  လဲ ဆိုရေ မိန်းခွန်းကို အဖြေရှာ နိုင်ကေ ရခိုင်ရို့ ၏ခေတ်ဆန်းချိန်ကို ပိုင်ဆိုင်လာကတ်ရဖို့ စွာက မလွဲပါ။ ။ ။
Read more...
Posted by Free4A
