(၁ဝ)နာရီလောက်ကတည်းက အဝတ်အစားလဲပြီး မိုးအတိတ်ကိုစောင့်လျက် ရှိသည်။ မိုးကားမစဲနိုင်။ သို့နှင့် စားပွဲတွင်ထိုင်ကာ အပြီးမသတ်သေးသော ကဗျာတစ်ပုဒ်ကို စပ်ရင်း (၁၁)နာရီ ထိုးသွားလေပြီ။ မိုးကား မတိတ်သေးပေ။ နောက်ဆုံးတွင် မိုးစဲလိမ့်မည် မဟုတ်ဟု စိတ်ချလိုက်ပြီး အပေါ်အင်္ကျီ ထပ်ဝတ်ကာ လမ်းမကြီးသို့ ထွက်ခဲ့သည်။ အဆင်သင့်တွေ့သော ဒေါင်းတံဆိပ် တာမွေ ဘတ်စ်ကားကို တက်စီးသည်။ ကားထဲတွင် ကြည့်မြင်တိုင်မှ လိုက်ပါလာသည် ထင်ရသော တောသား (၃)ယောက်နှင့် တရုတ်မ နှစ်ယောက်ကို တွေ့ရသည်။ ကားပြတင်းတံခါးများမှာ ပိတ်ထားသည်။ ခရီးသည်တို့ကား တိတ်ဆိတ်စွာ လိုက်ပါလာကြသည်။ အပြင်ဘက်တွင်ကား မိုးသည်ရွာလျက်ပင်။ ရွှံ့ဗွက်ချိုင့်ဝှမ်းတို့ဖြင့် ပြည့်ဝှမ်းသော ရန်ကုန်လမ်းကား စိုစွတ်လှသည်။ ကားသည် သိမ်ကြီးဈေးတွင် ခေတ္တရပ်ပြီး ဆက်လက်၍ တဟုန်တည်း မောင်းလာသည်။ ခရီးသည် အဆင်းအတက် သိပ်မရှိလှ။ သို့နှင့် စပတ်(ဗိုလ်အောင်ကျော်) လမ်းရောက်လျှင် ကျွန်ုပ်သည် ဆင်းလိုက်သည်။ ကျွန်ုပ်သည် ဒါလဟိုဇီ (မဟာဗန္ဓုလ) လမ်းဘက်မှ စပတ်(ဗိုလ်အောင်ကျော်) လမ်းကို ဖြတ်ကူးလိုက်သည်။ လမ်ဘေးတွင် မော်တော်ကားများသည် ဟိုတစ်စု၊ ဒီတစ်စု ရပ်လျက်ရှိသည်။ ကားတစ်ချို့ကား သွားလာလျက်၊ မိုးကာဝတ်လျက် လူများသည် သွားကြလာကြနှင့် ရှုပ်ယှက်ခတ်နေသည်။ သူရိယတိုက် ရှေ့ အဝင်တံခါးမပေါက်ကြီးတွင်ကား လူများသည်ရပ်ကာ အတွင်းသို့ မျှော်ကြည့်လိုက်၊ စကားပြောလိုက်နှင့် နေကြသည်ကို တွေ့မြင်ရသည်။ ကျွန်တော်ကား ရုံးဆင်းချိန်မို့ လူတွေရှုပ်နေတာ ထင်ပါရဲ့ ဟုသာ သာမန် အောက်မေ့မိသည်။ ကျွန်တော်သည် အင်မတန် အရိပ်အခြေကို မသိတတ်၊ မမြင်တတ်သူ ဖြစ်ချေသည်။ ခါတိုင်းကဲ့သို့ပင် ရဲရဲတင်းတင်း တံခါးပေါက်မှ အတွင်းသို့ဝင်သွားသည်။ လမ်းကူးတွင်ကား လက်နက်ကိုင်စစ်သားများ စောင့်ကြပ်လျက် ရှိသည်ကို တွေ့ရသည်။ ခါတိုင်းလည်း စောင့်နေကျပဲဟု ထင်လိုက်မိသည်။ ကျွန်တော်သည် အတွင်းဝန်ရုံးသို့ သွားခဲလှပေသည်။ ညှိုးလျော့သော မျက်နှာနှင့် လုံချည်အပြာ ဝတ်ထားသော စာရေးမနှစ်ဦးသည် သုတ်သုတ်သုတ်သုတ်နှင့် ရုံးထဲမှ ထွက်လာသည်။ သို့နှင့် အလယ်ဆင်ဝင်အောက် ကားဆိုက်သည့်နေရာသို့ ရောက်လာသည်။ ခါတိုင်းလို ရုံးစေများ၊ ချာပရာစီများ ရပ်ပြုနေသည်ကို အလျဉ်းမတွေ့ရ။ တိတ်ဆိတ်ငြိမ်သက်၍ နေသည်။ ဗိုလ်ထွန်းလှ အခန်းသို့ တက်ရန်လှေကား တစ်ထစ်နှစ်ထစ် တက်မိပြီးမှ တိတ်ဆိတ် ငြိမ်ချက်သား ကောင်းလှသည်ကို စိတ်ထင့်သွား၍ ဗိုလ်ထွန်းလှ ခေတ ရုံးဆင်းချိန် လက်ဖက်ရည် သောက်သွားနေလိမ့်မည်ဟု တွေးကာ မတက်တော့ဘဲ ဆင်ဝင်အောက်ကို ဖြတ်သန်းကာ တစ်ဖက်ရှိ တိုင်းပြုပြည်ပြု လွှတ်တော်ရုံးခန်းသို့ လာခဲ့လေသည်။ ဇော်ဂျီထံမှ အပြန်မှပဲ ဝင်တော့မည်လေ။ လွှတ်တော်ရုံး ဝင်ဝင်ချင်း သခင်နု၏ ရုံးခန်းတံခါးဝမှာ ပိတ်ထားသည် ကိုတွေ့ရသည်။ သက္ကလတ်ခန်းဆီး အစိမ်းပုတ်ကြီးမှာလည်း ဆွဲပိတ်၍ ထားသည်။ သခင်နု ရုံးခန်းကို ကျော်၍ ဇော်ဂျီ၏အခန်းသို့ ရောက်လေပြီ။ သူ့အခန်းမှာလည်း တံခါးပိတ်ထားပြီး ခန်းဆီးအစိမ်းပုတ်ကြီးသည် ဆွဲ၍စေ့ထားသည် ရုံးစေသုံးယောက်မှာ နံရံကိုမှီကာ ရပ်နေကြသည်။ ခါတိုင်းလို စကားပြောမနေကြ။ သူတို့သည် ငေးမှိုင်တွေဝေ၍ တစ်မျိုးကြီး ဖြစ်နေသည်ဟု အောက်မေ့လိုက်သည်။ ကျွန်တော်က ငိုင်တိုင်တိုင်နေသော ရုံးစေတစ်ဦအား 'ဦးသိန်းဟန်ရှိသလား'ဟု မေးသည်။ 'ရှိပါတယ်ခင်ဗျ'ဟု ခပ်တိုးတိုးသာ ခပ်အေးအေး ဖြေသည်။ သည်တော့မှ မျက်နှာပျက်နေကြောင်း အသေအချာ သိလိုက်တော့သည်။ စိတ်ထဲတွင်ကား မရှင်း။ တံခါးစေ့ထားသဖြင့် အတွင်းသို့ ရုတ်တရက် မဝင်သေးဘဲ ရပ်ကာ ရုံးစေဘက်သို့ တဖန်လှည့်၍ သူ၏စားပွဲတွင် ထိုင်နေသော ဇော်ဂျီကိုတွေ့မှ ထီးကိုထောင်ပြီး အတွင်းသို့ ဝင်လိုက်သည်။ ရုံးခန်းကား တိတ်ဆိတ်ငြိမ်သက်လျက် ရှိသည်။ စေ့ထားသော ပြတင်းတံခါးမှ ပြာစိမ်းစိမ်းမှန်ရောင်သည် ရိုက်ခတ်သဖြင့် အခန်းသည် စိမ်းပြာပြာ ဖြစ်နေသည်။ အခန်းထိပ်ရှိ စားပွဲကြီးတွင်ကား တိုင်းပြုပြည်ပြု လွှတ်တော် အကြံပေးအရာရှိ ဝတ်လုံ ဦးချစ်ထွန်းသည် ခေါင်းငိုက်ကာ ငေးမှိုင်နေလျက် ရှိသည်။ ဇော်ဂျီသည် ကျွန်တော်ဝင်လာသည်ကို မြင်သောအခါ ဆိတ်ဆိတ်ပင် စကားမျှ မမြွက်ဟဘဲ ထိုင်ရန် ကုလားထိုင်ကိုသာ လက်ဖြင့် ညွှန်ပြသည်။ သူသည် ငေးငိုင်၍ နေသည်။ အတန်ကြာ တိတ်ဆိတ်လျက်ရှိသည်။ ကျွန်တော်ကား ခါတိုင်း လှုပ်ရှားဆူညံ၍နေတတ်သော အတွင်းဝန်များရုံးသည် ဘာကြောင့် ယခုလို အုံ့မှိုင်းရီဝေ၍ နေသည်။ ဆိတ်ငြိမ်၍ နေသည်ကို အံ့သြလျက်ရှိသည်။ အတန်ကြာ ဆိတ်နေရာမှ 'အားလုံးတော့ ဒုက္ခဖြစ်ကုန်ပြီ' ဖြစ်ကုန်ပြီ'ဟု ဇော်ဂျီက တိုးတိုး ညည်းလေသည်။ ကျွန်တော်ကား ဘာမှန်းမသိသေးသဖြင့် ကြောင်နေရာ သူက အကဲခတ်မိ၍ လက်ပြ၍ အပြင်သို့ခေါ်ခဲ့သည်။ ကျွန်တော်သည် ထိတ်ခနဲ ဖြစ်သွားသည်။ 'လက်ဖက်ရည်ဆိုင် သွားရအောင်' မိုးတဖွဲဖွဲတွင် ရုံးခန်းအပြင်ဘက် မြေနီလမ်းဘေးပေါ်ရောက်မှ ကျွန်တော် မနေနိုင်၍ 'ဘာဖြစ်လို့လဲဆရာ'ဟုမေးမိသည်။ 'မင်းမကြားသေးဘူးလား'ဟု ဇော်ဂျီက အံ့သြနေသည်။ 'ဟင့်အင်း ကျွန်တော် အခုပဲ ဘတ်စ်ကားကဆင်းပြီး ရုံးကိုတန်းလာတာ' ဒီတော့မှ ဇော်ဂျီက ဖြစ်ပုံကို ပြောပြသည်။ ခြင်္သေ့တပ် စစ်ယူနီဖောင်းကို ဝတ်ဆင်ထားသော လက်နက်ကိုင် လူ(၄)ယောက်သည် ကျွန်တော် ဖြတ်လာခဲ့သော အလယ်ဆင်ဝင်အောက်မှ တက်လာကာ ဦးအောင်ဆန်း၏ ရုံးခန်းတွင်းသို့ အတင်းတွန်းဝင်၍ အစည်းအဝေး ပြုလုပ်လျက်ရှိသော အမှုဆောင်ဝန်ကြီးများအား စတင်းဂန်းဖြင့် ပစ်ခတ်ကြပြီး မည်သူမျှ ဖမ်းဆီးခြင်းမခံရဘဲ ဂျစ်ကားဖြင့် ထွက်ပြေး လွတ်မြောက်သွားသည်။ ကျွန်တော် မရောက်မီ တစ်နာရီကျော်ကျော်ခန့်က ဖြစ်သည်။ ကျွန်တော်သည် သည်သတင်းကို ကြားသောအခါ ထိတ်လန့်တုန်လှုပ်၍ သွားသည်။ အသားများ တဆတ်ဆတ်တုန်၍ လာသည်။ အတွင်းဝန်ရုံး လက်ဖက်ရည်ဆိုင်ထဲတွင်ကား စာရေးစာချီစသော ရုံးသားတို့သည် ညှိုးငယ်သော မျက်နှာဖြင့် ဆိတ်ငြိမ်စွာ စားသောက်၍ နေကြသည်ကို တွေ့မြင်ရသည်။ တခြားစားပွဲရှိ နိုင်ငံရေးရာ အတွင်းဝန် ကိုကျော်မြင့်ကလေးက လှမ်း၍ နှုတ်ဆက်လိုက်သည်။ သူသည် ခပ်အေးအေး၊ ခပ်ထွေထွေပင် လက်ဖက်ရည်ကို သောက်နေသည်။ 'အင်မတန် နှမြောဖို့ကောင်းတယ်ဗျာ' 'သိပ်ပြီး ရက်စက်ကြမ်းကြုတ်တဲ့ နိုင်ငံရေး လုပ်ကြံမှုပဲ' စသည်ဖြင့် လူအချို့သည် ညည်းတွားလျက် ရှိကြသည်။ ဇော်ဂျီက 'အမျိုးသားပျက်စီးခြင်း တစ်ရပ်ပဲ'ဟု တသသပြောသည်။ ''ကျွန်တော် ရုံးထဲဝင်လာတော့ လက်နက်ကိုင် ပုလိပ်တွေကို တွေ့တယ်။ ဒါပေမဲ့ ကျွန်တော် ဝင်လာတာ မတားကြပါဘူး။ ဆင်ဝင်အောက်အဝင်မှာတောင် အသိစာရေးတစ်ယောက်နဲ့ တွေ့သားပဲ၊ သူကလည်း ဘာမှမပြောဘူး''။ ''လူတွေက မပြောရက်ကြဘူး''ဟု ဇော်ဂျီက ဆိုလေသည်။ လက်ဖက်ရည် သောက်နေကြစဉ် ခုတင်ပဲ ဆေးရုံမှ ပြန်လာသော ရုံးသားတစ်ဦးအပါး ကပ်လာ၍ 'ဘယ့်နဲ့လဲ'ဟု ကျွန်တော်တို့က ဝိုင်း၍ မေးမြန်းကြသည်။ သူက'မိုင်းပွန်စော်ဘွားကြီးမှ တစ်ပါး အားလုံးဆုံးရှာပြီ'ဟုပြောသည်။ သူသည် အသံတုန်နေ၍ မျက်နှာမှာ ဖြူဖပ်ဖြူရော် ဖြစ်နေသည်။ 'ဗိုလ်ချုပ်ကော' ဗိုလ်ချုပ်ကော'ဟု တစ်ယောက်က တိုးတိုးမေးသည်။ 'မျက်နှာကို အဝတ်နဲ့ဖုံးထားတယ်'်'။ ကျွန်တော်လည်း ကြာကြာ မနေနိုင်ဘဲ ဂျူဒါအီစကယ် (သိမ်ဖြူ)လမ်းတံခါးပေါက်မှ ကျော်၍ အပြင်ဘက်လမ်းသို့ ထွက်ခဲ့သည်။ မိုးသည် တစိမ့်စိမ့်ရွာလျက်ပင် ရှိသည်။ လူတစ်အုပ်သည် မိုးရွာထဲတွင် ထီးဆောင်း၍၊ တချို့က ထီးမပါဘဲ၊ တချို့က ပလက်ဖောင်းပေါ်တွင် ရပ်ကာ အတွင်းဝန် ရုံးဘက်သို့ မျှော်ကြည့်နေကြသည်။ လူတစ်ယောက်က ကျွန်တော့် လက်မောင်းကို ဆွဲကိုင်၍ 'ဒီမယ် ခုနက ဝန်ကြီးတွေ သေနတ်ပစ်ခံရတယ် ကြားတယ်၊ ဟုတ်သလား ခင်ဗျာ'ဟု မေးသည်။ သူကား အကြောင်းမျိုးစုံကို သိချင်နေပေလိမ့်မည်။ 'ဟုတ်ကဲ့'ဟူ၍သာ ဖြေကြားပြီးတစ်ဖက်သို့ ဖြစ်ကူး၍ အသင့်တွေ့ရသော ဒေါင်းတံဆိပ်ကားကို တက်စီးလိုက်သည်။ ကားသည် လမ်းမတော်သို့ ပြေးလျက်ရှိသည်။ ကားထဲတွင် လူမနည်းလှပေ။ ခရီးသည် အားလုံး မျက်စိမျက်နှာ မကောင်းကြ။ ခပ်ရွယ်ရွယ် မိန်းမပျိုတစ်ဦးက 'ဖြစ်မှဖြစ်ရလေနော်၊ ဖြစ်မှဖြစ်ရလေနော်'ဟု မြည်တမ်းလျက်ရှိသည်။ ဈေးသည်ဟု ထင်ရသော ခပ်အိုအိုမိန်းမကြီး နှစ်ယောက်ကား 'ဗိုလ်ချုပ် အသက်ရှင်ပါစေတော်၊ ဗိုလ်ချုပ် အသက်ရှင်ပါစေတော်' ဆုတောင်း၍ နေကြသည်။ ယခုမှပင် သိရသော မိန်းမတစ်ယောက်က မေးမြန်းသည်ကို 'မပြောကြနဲ့၊ မပြောကြနဲ့' မပြောကြနဲ့'ဟု အသာလက်ကုတ်၍ တီးတိုး တားမြစ်သည်။ သူတို့လည်း မပြောရက်ကြ။ သန့်ပြန့်စွာ ဝတ်စားထားသော တရုတ်တစ်ဦးက 'အားကီး ရက်စက်တာပဲ'ဟု ကျွန်တော့်ဘက်သို့ လှည့်၍ ရေရွတ်လျက် ရှိသည်။ မျက်နှာထားတင်းတင်းနဲ့ ဒရိုင်ဘာလည်း တောက်ခေါက်လိုက်သည်။ သိမ်ကြီးဈေးသို့ ရောက်လာသောအခါ လူသွားလူလာ ကင်းရှင်းနေပြီး ဈေးဆိုင်များမှာ ပိတ်ထားလေပြီ။ သတင်းသည် တမုဟုတ်ချင်း ပျံ့နှံ့၍ သွားလေပြီ။ မော်တော်ကား၊ လန်ချားတို့ကား ခပ်မြန်မြန် သွားလာကြသည်။ ကားပေါ်မှဆင်း၍ လမ်းထဲသို့ ဝင်လာသောအခါ အိမ်ဝတွင် လူတို့သည် မှိုင်တိုင်တိုင်နှင့် ရပ်ကာ ကြည့်နေသည်ကို တွေ့မြင်ရသည်။ လူတို့သည် အငြိမ်မနေနိုင်ကြ။ မိုးသည် မစဲဘဲ ရွာလျက်ပင်။ လူတို့သည် 'ဖြစ်မှဖြစ်ရလေ၊ ဖြစ်မှဖြစ်ရလေ'ဟု တတွတ်တွတ် မြည်တမ်းရင်းပင် ညနေစောင်း လာတော့သည်။ ဗိုလ်ချုပ်ဆုံးကြောင်းကား ညနေ သတင်းစာများမှ ကြားရလေပြီ။ မည်သူ့မျက်နှာကြည့်ကြည့် မျက်နှာ ညှိုးငယ်နွမ်းလျစွာနှင့်။ လမ်းပေါ်မှ စက်ပြင်ဆရာတစ်ဦး၏ မိန်းမပါးစပ်မှ 'ကျုပ်တို့တော့ ထမင်းလည်း မချက်တော့ဘူး။ စားချင်စိတ်လည်း မရှိတော့ပါဘူးရှင်' ဟူသော အသံသည် သဲ့သဲ့မျှ ပေါ်ထွက်လာသည်။ နေဝင်မီးငြိမ်း အမိန့် ထုတ်ထားသဖြင့် ညဥ့်ဦးသည် တိတ်ဆိတ်ကာ မှောင်လှသည်။ အိမ်သားများဆုံတိုင်း ညနေခင်းက အကြောင်းကိုသာ ပြောကြသည်။ ရှိုက်သံ၊ တမ်းတသံ၊ ညဉ်းညူသံ၊ တသသံ။ တိတ်ဆိတ်မှောင်မည်းသဖြင့် စောစော အိပ်ရာဝင်ကြသော်လည်း အိပ်မပျော်နိုင်ကြ။ နေ့ခင်းကဟာ အိပ်မက်ပဲ ဖြစ်ကြပါစေတော့ဟု မိန်းမများ ဆုတောင်းကြသည်။ ညဥ့်နက်သော်လည်း ချောင်းဟန့်သံ၊ လူးလွန့်သံတို့သည် ဆက်၍နေသည်။ ရှဲခနဲမီးခြစ်၍ နောက်ဖေး ထကြပြန်သည်။ တစ်ရေးနိုးတိုင်း သတိရလျက် ရှိသည်။ မကြာခဏ အိပ်မက်ပြီး နိုးသည်။ သို့နှင့်ပင် တအောက်မေ့မေ့၊ တသသနှင့် ထိုညကို လွန်မြောက်ရလေသည်။
ဒဂုန်တာရာ
