အာဇာနည်ခေါင်းဆောင်ကြီးများ

အာဇာနည်ခေါင်းဆောင်ကြီးများ

Literature - Vol.2 No.43
User Rating: / 0
PoorBest
ဗိုလ်ချုပ်အောင်ဆန်း(၁၉၁၅-၁၉၄၇)
(၁၃၊၂၊၁၉၇၁၅)ရက်နေ့တွင် မကွေးတိုင်း၊ တောင်တွင်းကြီးခရိုင်၊ နတ်မောက်မြို့၌ အမိန့်တော်ရရှေ့နေ ဦးဖာ-ဒေါ်စုတို့မှ နောင်တစ်ခေတ်တွင် ဗိုလ်ချုပ်အောင်ဆန်း ဟူ၍ မြန်မာနိုင်ငံသမိုင်း၌ တွင်စေမည့် သားရတနာကို ဖွားမြင်ခဲ့သည်။ ဇာတာအမည်မှာ မောင်ထိန်လင်းဖြစ်သော်လည်း ငယ်စဉ်ကပင် မောင်အောင်ဆန်းဟုတွင်သည်။ ငယ်စဉ်က နတ်မောက်မြို့၊ ဆရာတော် ဦးသောဘိတကျောင်း၌ နေခဲ့သည်။ (၁၉၂၈)ခုတွင် ရေနံချောင်း အမျိုးသား အထက်တန်းကျောင်းသို့ ပြောင်းရွှေ့ ပညာသင် ယူခဲ့ပြီး၊ ယင်းကျောင်းမှ မြန်မာ၊ ပါဠိ (၂)ဘာသာ ဂုဏ်ထူးဖြင့် ဆယ်တန်းအောင်မြင် ခဲ့သည်။ ပညာထူးချွန်သူဖြစ်၍ အထက်တန်းစကောလားရှစ်နှင့် ဦးရွှေခိုဆု ရရှိခဲ့ဖူးသည်။ ထို့နောက် ရန်ကုန်တက္ကသိုလ်သို့ တက်ရောက်ပြီး ဆက်လက်ပညာဆည်းပူးခဲ့သည်။ (၁၉၃၈)ခုနှစ်တွင် တက္ကသိုလ်မှထွက်ပြီး သခင်ကိုယ်တော်မှိုင်းကြီးမှူးသော တို့ဗမာအစည်း အရုံးသို့ဝင်ရောက်၍ သခင်အောင်ဆန်းအဖြစ် နိုင်ငံရေးနယ်ပယ်သို့ ခြေစုံပစ်ဝင်ခဲ့သည်။ (၁၉၃၉)တွင်တို့ဗမာအစည်းအရုံး၏ အတွင်းရေးမှူးအဖြစ်တင်မြောက်ခြင်းခံရသည်။ သခင်အောင်ဆန်းသည် ဒုတိယကမ္ဘာစစ်ဖြစ်လာ၍ မြန်မာ့လွတ်လပ်ရေးအတွက် စည်းစည်းလုံးလုံး ဆောင်ရွက်နိုင်ရန်ဖွဲ့စည်းခဲ့သော ဗမာ့ထွက်ရပ်ဂိုဏ်းတွင် အတွင်း ရေးမှူးအဖြစ်လည်း တာဝန်ယူခဲ့သည်။ မြန်မာ့လွတ်လပ်ရေးအတွက် လက်နက်ကိုင်တော်လှန်ရေးဆင်နွှဲရန် ပေါ်ပေါက်ခဲ့သော ပြည်သူ့အရေးတော်ပုံပါတီ (နောင်ဆိုရှယ်လစ်ပါတီ)၏ ပြည်ပဆက်သွယ်ရေး ခေါင်းဆောင်တာဝန်ကိုလည်း ယူခဲ့သည်။ (၁၉၄ဝ)မတ်လအတွင်း အိန္ဒိယနိုင်ငံရမ်းဂါးမြို့၌ ကျင်းပသော အိန္ဒိယအမျိုးသား ကွန်ဂရက်ညီလာခံသို့ တက်ရောက်ခဲ့သည်။ သခင်အောင်ဆန်းအား အင်္ဂလိပ်နယ်ချဲ့အစိုးရကို ဆန့်ကျင် ဟောပြောမှုဖြင့် ဖမ်းဆီးရန် ဟင်္သာတခရိုင် ရာဇဝတ်ဝန် ဆုငွေ(၅)ကျပ်ဖြင့် ဖမ်းဝရမ်းထုတ်ခဲ့သည်။ (၁၉၄ဝ)သြဂုတ်လအတွင်း မြန်မာ့လွတ်လပ်ရေးအတွက် အင်္ဂလိပ်နယ်ချဲ့ အစိုးရအား မြန်မာ့မြေပေါ်မှ လက်နက်အားဖြင့် မောင်းထုတ်နိုင်ရန်အတွက် နိုင်ငံခြားမှ အကူအညီရယူရန် တရုတ်နိုင်ငံသို့ စွန့်စားထွက်ခွာခဲ့သည်။ တရုတ်ပြည်အမွိုင်၌ သောင်တင်နေစဉ် မြန်မာနိုင်ငံမှရဲဘော်များ၏ စီစဉ်ဆောင်ရွက်ပေးမှုကြောင့် ဂျပန်အရာရှိ စူဖူကိကေအိချိနှင့် အဆက်အသွယ်ရကာ ဂျပန်နိုင်ငံသို့ ရောက်သွားသည်။ ဂျပန်ပြည်တွင် ''ဗမာ့လွတ်လပ်ရေး စီမံကိန်း'' စာတမ်းတစ်ရပ်ကို ရေးဆွဲကာ ဂျပန်စစ်အာဏာပိုင်များနှင့် ညှိနှိုင်းခဲ့သည်။ ယင်းစီမံကိန်းအရ မြန်မာပြည်အတွင်းမှ မျိုးချစ်လူငယ်များကိုစုစည်းကာ အလီလီခွဲလျက် ဂျပန်ပြည်သို့ ပို့ပေးခဲ့သည်။ ဤမျိုးချစ်လူငယ်တစ်စုသည် ပင်လျှင် နောင်သောအခါတွင် ဗိုလ်တေဇ(ခေါ်)ဗိုလ်အောင်ဆန်း ခေါင်းဆောင်သည့် ရဲဘော်သုံးကျိပ် ဖြစ်လာခဲ့သည်။ ဤမျိုးချစ် လူငယ်များသည် ဗမာ့လွတ်လပ်ရေးတပ်မတော် (ဘီအိုင်အေ)ကို ယိုးဒယား(ယခုထိုင်း)နိုင်ငံ ဘန်ကောက် တွင် ဖွဲ့စည်းတည်ထောင်ကာ မြန်မာနိုင်ငံအတွင်းသို့ ဂျပန်များနှင့်အတူ ဝင်ရောက်တိုက်ခိုက်ခဲ့သည်။ ဂျပန်တပ်မတော်က မြန်မာနိုင်ငံကို သိမ်းပြီးသောအခါ အင်အားကြီးထွားပြီး ဗရမ်းဗတာဖြစ်လာသော ဗမာ့လွတ်လပ်ရေး တပ်မတော်ကို အင်အားလျော့ချပြီး ဗမာ့ကာကွယ်ရေးတပ်မတော်(ဘီဒီအေ)အဖြစ် ပြန်လည်ဖွဲစည်းသည့်အခါ ဗိုလ်ချုပ်အောင်ဆန်း သည် ဘီဒီအေ၏ စစ်သေနာပတိ ဖြစ်လာသည်။ (၁၉၄၂)ခုနှစ် စက်တင်ဘာလတွင် သူနာပြုဆရာမ ဒေါ်ခင်ကြည်နှင့် လက်ထပ် သည်။ မြန်မာနိုင်ငံကို ဂျပန်ကရွှေရည်စိမ် လွတ်လပ်ရေးပေးသောအခါ ဗိုလ်ချုပ်အောင်ဆန်းသည် စစ်ဝန်ကြီးနှင့် စစ်သေနာပတိ ဖြစ်လာသည်။ ဖက်ဆစ်ဂျပန်စစ်အုပ်ချုပ်ရေးသမားများသည် မြန်မာနိုင်ငံနှင့် ပြည်သူတို့အား ဖက်ဆစ်နိုင်ငံ၏ လက်အောက်ခံနိုင်ငံ တစ်နိုင်ငံသဖွယ် သဘောထားလာကြသည်။ ထို့ကြောင့် (၁၉၄၄)ခုနှစ် သြဂုတ်လအတွင်းမှာ ဗိုလ်ချုပ်အောင်ဆန်းနှင့် သခင်စိုးတို့ ဦးဆောင်ပြီး ဖက်ဆစ်တိုက်ဖျက်ရေး ပြည်သူ့လွတ်လပ်ရေးအဖွဲ့ချုပ် (ဖတပလ) ဟဖက်ဆစ်တိုက်ဖျက်ရေး ပြည်သူ့လွတ်လပ်ရေးအဖွဲ့ချုပ် (ဖဆပလ)' ကို ဖွဲ့စည်းတည်ထောင်ကာ (၂၇၊၃၊၁၉၄၅)ရက်နေ့တွင် ဗမာ့ကာကွယ်ရေး တပ်မတော်သည် ဗိုလ်ချုပ်ဆောင်ဆန်း၏ တိုက်ရိုက်ကွပ်ကဲညွှန်ကြားမှုဖြင့် ဖက်ဆစ်ဂျပန် တို့ကို အတိအလင်း စစ်ကြေညာကာ ဖက်ဆစ်တော်လှန်ရေးကို ဆင်နွှဲခဲ့သည်။ ဒုတိယ ကမ္ဘာစစ်ကြီးပြီးနောက်တွင် ဗမာ့တပ်မတော်ကို ဂန္ဒီစာချုပ်အရ ဆက်လက်ဖွဲ့စည်း တည်ထောင်ပြီးနောက် ဗိုလ်ချုပ်အောင်ဆန်းသည် တပ်မတော်မှ နှုတ်ထွက်ကာ နိုင်ငံရေး ခေါင်းဆောင် ဖဆပလဥက္ကဋ္ဌအဖြစ် တိုင်းပြည်တာဝန်ကို ဆက်လက်ထမ်းဆောင်ခဲ့သည်။ ဒုတိယကမ္ဘာစစ်အပြီးတွင် မြန်မာနိုင်ငံဘုရင်ခံ ဆာဒေါ်မန်စမစ်က ဗိုလ်ချုပ်အောင်ဆန်း အပါအဝင် ဖဆပလခေါင်းဆောင်များအား ဘုရင်ခံ၏ အမှုဆောင်ကောင်စီတွင် ရာထူး လက်ခံရန် စကားကမ်းလှမ်းသော်လည်း ဖဆပလမှ ချမှတ်ထားသော စည်းကမ်းချက်များ အတိုင်းမရ၍ ဗိုလ်ချုပ်အောင်ဆန်းတို့က လက်မခံခဲ့ဘဲ၊ ဘုရင်ခံ၏ စက္ကူဖြူစီမံကိန်း တိုက်ဖျက်ရေးကိုသာ ပြည်သူလူထုအားစည်းရုံးကာ အင်တိုက်အားတိုက်ဆောင်ရွက်ခဲ့သဖြင့် ပုလိပ်သပိတ်အပါအဝင် အထွေထွေ အမှုထမ်းပေါင်းစုံသပိတ်ကြီး ပေါ်ပေါက်လာပြီး၊ နယ်ချဲ့ အင်္ဂလိပ်တို့၏ အုပ်ချုပ်ရေးရပ်တန့်သွားခဲ့ရသည်။ ဗြိတိန်အစိုးရလည်း ဘုရင်ခံ ဆာဒေါ်မန် စမစ်ကို အင်္ဂလန်သို့ပြန်ခေါ်ပြီး၊ ဘုရင်ခံအသစ်အဖြစ် ဆာဟူးဘတ်ရန်စ်ကို ခန့်အပ်လိုက် သည်။ ဘုရင်ခံသစ် ဆာဟူးဘတ်ရန်စ်က ဗိုလ်ချုပ်တို့အလိုကျ အစိုးရအဖွဲ့စည်းရန် စကားကမ်းလှမ်းလာတော့သည်။ ထိုကမ်းလှမ်းချက်များကို ဖဆပလနှင့်ဆွေးနွေးညှိနှိုင်း ကြပြီးနောက် ဗိုလ်ချုပ်အောင်ဆန်းနှင့် ဖဆပလခေါင်းဆောင်များသည် ဘုရင်ခံ၏ အမှုဆောင် ကောင်စီဝင်ရာထူးကို ယူလိုက်ကြသည်။ ထို့ကြောင့် (၂၈၊၉၊၁၉၄၆)ရက်နေ့မှစ၍ ဗိုလ်ချုပ် အောင်ဆန်းသည် ဘုရင်ခံ၏ အမှုဆောင်ကောင်စီ ဒုတိယဥက္ကဋ္ဌ ဖြစ်လာသည်။ ထို့နောက် တစ်နှစ်အတွင်း လုံးဝလွတ်လပ်ရေးရရှိရေးဆောင်ပုဒ်အရ မြန်မာ့လွတ်လပ်ရေးကိစ္စ ဆွေးနွေးရန် ဗြိတိသျှလေဘာ အစိုးရ၏ ဖိတ်ကြားချက်အရ မြန်မာကိုယ်စားလှယ်အဖွဲ့ကို ဗိုလ်ချုပ်အောင်ဆန်းဦးဆောင်ပြီး (၁၉၄၇)ခုနှစ် ဇန်နဝါရီလတွင် လန်ဒန်သို့သွားရောက်ခဲ့ သည်။ ထိုဆွေးနွေးပွဲမှ မြန်မာနိုင်ငံအား တစ်နှစ်အတွင်း လွတ်လပ်ရေးပေးမည့် အောင်ဆန်း- အက်တလီစာချုပ် ချုပ်ဆိုနိုင်ခဲ့သည်။ သို့သော်မြန်မာနိုင်ငံကို လွတ်လပ်ရေးပေးရာတွင် ဗြိတိသျှတို့က တောင်တန်းဒေသများ ကို ချန်ထားလိုသောကြောင့် ဗိုလ်ချုပ်အောင်ဆန်းက တောင်တန်းဒေသကိုပါ တစ်ပါတည်း လွတ်လပ်ရေးပေးရန် တောင်းဆိုခဲ့ပြီး၊ တောင်တန်းဒေသနှင့် မြန်မာပြည်ပပေါင်းစည်းအတွက် အားသွန်ကြိုးပမ်းခဲ့ပြန်သည်။ ဗိုလ်ချုပ်အောင်ဆန်း၏ ကြိုးစားရိုးသားမှုကြောင့် တောင်တန်း ဒေသ တိုင်းရင်းသားခေါင်းဆောင်များ၏ ယုံကြည်ကိုးစားမှုကိုပါရရှိခဲ့ပြီး၊ မြန်မာနိုင်ငံ သမိုင်း တွင် အရေးပါသော တိုင်းရင်းသားပေါင်းစုံသွေးစည်းညီညွတ်ရေး သင်္ကေတဖြစ်ခဲ့သည့် ပင်လုံစာချုပ် ချုပ်ဆိုနိုင်ခဲ့သည်။ ထိုလုပ်ငန်းများပြီးစီး၍ လွတ်လပ်ရေးရရန် သေချာသော အခြေအနေသို့ ရောက်သောအခါ လွတ်လပ်သော မြန်မာနိုင်ငံ၏ ဖွဲ့စည်းပုံအခြေခံဥပဒေ ရေးဆွဲကြမည့် တိုင်းပြုပြည်ပြုလွှတ်တော်အတွက် ရွေးကောက်ပွဲကြီးကို (၁၉၄၇)ခုနှစ်၊ ဧပြီလတွင် အောင်မြင်စွာကျင်းပနိုင်ခဲ့သည်။ ယင်းသို့ မြန်မာ့လွတ်လပ်ရေး ဗိမာန်ကြီး ပြီးခါနီးအချိန် လွတ်လပ်သော မြန်မာနိုင်ငံတည်ထောင်ရေး အားသွန်ကြိုးပမ်းနေဆဲတွင် နယ်ချဲ့လက်ပါးစေ ဦးစောနှင့် အပေါင်းပါတို့၏ ရက်စက်ယုတ်မာစွာ လုပ်ကြံသတ်ဖြတ်မှု ကြောင့် (၁၉၊၇၊၁၉၄၇)ရက်နေ့တွင် အခြားသော လုပ်ဖော်ကိုင်ဖက် တိုင်းပြည်ခေါင်းဆောင် အာဇာနည်ကြီးများနှင့်အတူ ကျဆုံးခဲ့ရပေသည်။


သခင်မြ(၁၈၉၇-၁၉၄၇)
သခင်မြသည် ဗိုလ်ချုပ်အောင်ဆန်း ခေါင်းဆောင်သောဝန်ကြီးအဖွဲ့တွင် ပြည်ထဲ ရေးဝန်ကြီးအဖြစ် တာဝန်ထမ်းဆောင်ခဲ့ သည်။ ကွယ်လွန်သူ အမျိုးသားအာဇာနည် ခေါင်းဆောင်ကြီး သခင်မြသည် ပြည်မြို့နယ်၊ ထုံးဘိုရွာဇာတိဖြစ်သည်။ အဖဦးဘိုးချွန်နှင့် အမိဒေါ်သက်လယ်တို့မှ (၇၊၁ဝ၊၁၈၉၇)ရက် နေ့တွင် ဖွားမြင်သည်။ ငယ်နာမည် မောင်ဘ ရွှေ ဖြစ်သည်။ နှမ မမြငွေတစ်ဦးသာရှိ၍ နောင်အခါ သီလရှင်ဝတ်သွားပြီး။ ဒေါ်ခေမာ ဝတီ ဖြစ်လာခဲ့သည်။ သာယာဝတီ အေဘီအမ်ကျောင်းမှ သတ္တမတန်းအောင်ပြီး ဆယ်တန်းကို ရန်ကုန်ဘက်ပတစ် အထက်တန်းကျောင်းမှ အောင်သည်။ (၁၉၁၈)ခုနှစ်တွင် ရန်ကုန်ကောလိပ်နှင့် ကာလတ္တား တက္ကသိုလ်တို့မှ အိုင်အက်စ်စီတန်းကို ဓာတုဗေဒဂုဏ်ထူးဖြင့် အောင်သည်။ (၁၉၂ဝ)ပြည့်နှစ် တက္ကသိုလ် သပိတ်မှောက် ကောင်စီတွင် ဒုတိယဥက္ကဋ္ဌ ဖြစ်ခဲ့သည်။ ယင်းသပိတ် နောက်ပေါ်လာသော အမျိုးသားပညာရေးကောင်စီတွင်လည်း အဖွဲ့ဝင်တစ်ဦး ဖြစ်ရုံမက ကြည့်မြင်တိုင် အမျိုးသားအထက်တန်းကျောင်းအုပ်လည်း လုပ်ခဲ့ဖူးသည်။ (၁၉၂၄)ခုနှစ်တွင် ဘီအက်စ်စီတန်းကို ဓာတုဗေဒဂုဏ်ထူးဖြင့် အမျိုးသား ကောလိပ်မှပင် အောင်သည်။ (၁၉၂၆)ခုနှစ်တွင် ဒေါ်ခင်ညွန့်နှင့် လက်ထပ်သည်။ (၁၉၂၇)ခုနှစ်တွင် ဥပဒေဝိဇ္ဇာဘွဲ့အောင်ပြီးသောအခါ သာယာဝတီသို့ပြန်၍ ရှေ့နေ အလုပ်ဖြင့် အသက်မွေးသည်။ (၁၉၃ဝ)ပြည့်နှစ် တောင်သူလယ်သမား အရေးတော်ပုံတွင် အရေးတော်ပုံသားများဘက်မှ ရှေ့နေလိုက်ရာမှ ထင်ရှားလာသည်။ (၁၉၃၆)ခုနှစ်ရောက်သော် တို့ဗမာအစည်းအရုံးဝင်ရာမှ သခင်ဖြစ်လာပြီး သခင်မြဟု ထင်ရှားလာခဲ့သည်။ ထို့နောက် တို့ဗမာအစည်းအရုံး၏ ကိုယ်ပွားဖြစ်သော ''ကိုယ်မင်းကိုယ်ချင်းအဖွဲ့''၏ ဥက္ကဋ္ဌ ဖြစ်လာသည်။ ကိုယ်မင်းကိုယ်ချင်းအဖွဲ့၏ တာဝန်ပေးချက်အရ သာယာဝတီတောင်ပိုင်းမှ အမတ်အဖြစ် ဝင်ရောက်ယှဉ်ပြိုင်ရာ အရွေးခံရ၍ (၉၁)ဌာနခေတ် ဥပဒေပြုလွှတ်တော်အတွက် ပထမဆုံး အရွေးခံရသော သခင်အမတ်သုံးဦးအနက် တစ်ဦးအပါအဝင်ဖြစ်ခဲ့သည်။ ထိုသို့ အမတ်အဖြစ် အရွေးခံရသော်လည်း အင်္ဂလိပ်နယ်ချဲ့ အုပ်စိုးမှုကို ဆန့်ကျင်သည့်အနေဖြင့် အမတ်လစာ မယူသည့် သခင်အမတ်တစ်ဦးလည်းဖြစ်သည်။ ပြည်သူ့အရေးတော်ပုံပါတီဖွဲ့သောအခါတွင် ဗိုလ်ချုပ်အောင်ဆန်းက ပြည်ပဆက်သွယ် ရေးတာဝန်ယူပြီး သခင်မြက ပြည်တွင်းခေါင်းဆောင် တာဝန် ယူခဲ့ရသည်။ (၁၉၄၁)ခုနှစ်တွင်မူ တို့ဗမာအသည်းအရုံး ဥက္ကဋ္ဌအဖြစ် တင်မြှောက်ခံရသည်။ ရဲဘော်သုံးကျိပ် ဂျပန်နိုင်ငံသို့ စစ်ပညာသင် သွားနိုင်ရေး အတွက် စီစဉ်ဆောင်ရွက်ပေးခဲ့သူ တစ်ဦးလည်း ဖြစ်သည်။ ဒေါက်တာဘမော် ဦးဆောင်သော ဂျပန်ခေတ်လွတ်လပ်ရေးအစိုးရအဖွဲ့တွင် ဒုတိယ ဝန်ကြီးချုပ်ဖြစ်သည်။ ဖက်ဆစ်တော်လှန်ရေးအတွက် ဖဆပလကို ဖွဲ့သောအခါ ပြည်သူ့အရေး တော်ပုံပါတီကို ကိုယ်စားပြု၍ သခင်မြလည်းပါဝင်ခဲ့သည်။ (၁၉၄၅)ခုနှစ်တွင် ပြည်သူ့ အရေးတော်ပုံပါတီကို မြန်မာပြည် ဆှိုရှယ်လစ်ပါတီဟု ပြင်ဆင်ဖွဲ့စည်းသောအခါ သခင်မြပင် ဥက္ကဋ္ဌဖြစ်လာသည်။ စစ်ပြီးစ ဖဆပလအဖွဲ့၏ ဗဟိုအလုပ်အမှုဆောင် တစ်ဦးလည်း ဖြစ်ခဲ့ သည်။ စစ်ပြီးခေတ် ဗိုလ်ချုပ်အောင်ဆန်းဦးစီးသော ကြားဖြတ်အစိုးရအဖွဲ့တွင် ဘဏ္ဍာရေးနှင့် အခွန်တော် ဌာနဝန်ကြီး တာဝန်များယူခဲ့ရသူလည်း ဖြစ်သည်။ ထို့နောက် ဖွဲ့စည်းပုံအခြေခံ ဥပဒေရေးဆွဲရေးကော်မတီ ဥက္ကဋ္ဌနှင့် တိုင်းပြုပြည်ပြုလွှတ်တော် ယာယီသဘာပတိ တာဝန် များ အပေးခံရသည်။ အောင်ဆန်း-အက်တလီ စာချုပ် ချုပ်ဆိုရန် ဗိုလ်ချုပ်အောင်ဆန်း ခေါင်းဆောင်သည့် လန်ဒန်သွား မြန်မာကိုယ်စားလှယ်အဖွဲ့တွင်လည်း ပါဝင်ခဲ့သည်။ လယ်သီးစား ဥပဒေဋီကာကိုလည်း ရေးသားခဲ့သေးသည်။ ဗိုလ်ချုပ်အောင်ဆန်းနှင့် အခြားခေါင်းဆောင်ကြီးများနှင့်အတူ မသမာသူတို့ လက်ချက်ဖြင့် (၁၉၊၇၊၁၉၄၇)ရက်၊ စနေနေ့၊ နံနက်(၁ဝ)နာရီ(၃၇)မိနစ်တွင် အသက်ဆုံးရှုံးခဲ့ရရှာသည်။


ဒီးဒုတ်ဦးဘချို(၁၈၉၃-၁၉၄၇)
ဒီးဒုတ်ဦးဘချိုမှာ မြောင်းမြဇာတိ ဖြစ်သည်။ အဖမြန်မာဆေးဆရာကြီး ဦးဘိုးစာနှင့် အမိဒေါ်မြစ်တို့မှ (၂၄၊၄၊ ၁၈၉၃)ရက်နေ့တွင် ဖွားမြင်သည်။ အသက်(၁၄)နှစ်တွင် မြောင်းမြမြို့ ဆရာ ဦးမောင်မောင်ကျောင်းမှ သတ္တမတန်းကို အထူးအောင်၍ စကောလားရှစ် ပညာ သင်ဆုရရှိခဲ့သည်။ ထို့နောက် ရန်ကုန်မြို့ ရှိ စိန်ပေါလ်ကျောင်းတွင် ဆက်လက် ပညာသင်ယူရာ (၁ဝ)တန်းကို အထူး အောင်သောကြောင့် ပညာသင်ဆုထပ်ရ သည်။ ရန်ကုန်တက္ကသိုလ်တွင် ဘီအေအထက်တန်းတက်နေဆဲ မျက်စိရောဂါကြောင့် တက္ကသိုလ်မှထွက်ခဲ့ရသည်။ ပေါင်းတည်နှင့် ဟင်္သာတမြို့များတွင် အစိုးရကျောင်းဆရာ အဖြစ် အမှုထမ်းခဲ့သည်။ ပညာအုပ်လည်း လုပ်ခဲ့ဖူးသည်။ (၁၉၂ဝ)တွင် ဒေါ်လှမေနှင့် လက်ထပ်သည်။ အမျိုးသားကျောင်းများဖွင့်လာသောအခါအစိုးရဝန်ထမ်းများအဖြစ်မှ ထွက်ပြီး အမျိုးသားကောလိပ်တွင် မြန်မာစာဆရာဝင်လုပ်သည်။ အစိုးရ အထောက်အပံ့မယူသော အမျိုးသားကျောင်းဆရာလည်း လုပ်ခဲ့ဖူးသည်။ တစ်ပတ်တစ်ကြိမ်ထုတ် ''မြန်မာ့ရီဗျူးဂျာနယ်''ကို အယ်ဒီတာချုပ်အဖြစ်ဦးစီးထုတ်ဝေခဲ့သည်။ ထို့နောက်''ဒီးဒုတ် ဂျာနယ်''ကို(၁၉၂၅)ခုနှစ်တွင် ဦးစီးထုတ်ဝေရာတွင်ဒီးဒုတ်ဦးဘချိုဟုထင်ရှားလာသည်။ ဆရာကြီးသည် အင်္ဂလိပ်-မြန်မာနှင့် ပါဠိစာပေများတွင် နှံ့စပ်ပြီး ဆေးကျမ်း၊ ဗေဒင်၊ နက္ခတ်နှင့် အဂ္ဂရပ် ပညာများကိုလည်းလိုက်စားခဲ့သည်။ မြန်မာသီချင်းကြီးကို လည်း စည်းစနစ်ကျစွာ တတ်မြောက်သူတစ်ဦးဖြစ်သည်။ တူရိယာ၊ ကဗျာ၊ ဂီတကို မြတ်နိုးပြီး စောင်းကောက်ကိုလည်း ပိုင်နိုင်စွားတီးတတ်သည်။ မြန်မာသီချင်းကြီး သီချင်းခန့်များကို မူမှန်အတိုင်းဖြစ်စေရန် ''ဂီတဝိသောဓနိ''ကျမ်းကိုလည်း တည်းဖြတ်ခဲ့သည်။ (၁၉၃၈)ခုနှစ်အတွင်း ဒီးဒုတ်နေ့စဉ်သတင်းစာကို ထုတ်ဝေခဲ့သည်။ ဆရာကြီး သည် သတင်းစာဆရာ၊ အယ်ဒီတာ၊ စာရေးဆရာ စသည့် စာပေသမားတစ်ဦး အနေဖြင့် ပြည်သူလူထု နိုင်ငံရေး အသိတရားနိုးကြားစေသည့် စာပေများကိုလည်း ရေးသားခဲ့သည်။ အင်္ဂလိပ်တို့ပေးသော ဒိုင်အာခီအုပ်ချုပ်ရေးနှင့် (၉၁)ဌာနအုပ်ချုပ်ရေး တို့ကို ဆန့်ကျင်ခဲ့သည်။ ဖေဘီယန် (Fabin) ပါတီကိုလည်းတည်ထောင်ခဲ့ပြီး ဥက္ကဋ္ဌ အဖြစ် တာဝန်ယူခဲ့သည်။ မြန်မာနိုင်ငံစာရေးဆရာအသင်း ဥက္ကဋ္ဌလည်းဖြစ်ခဲ့သေးသည်။ (၁၉၃၆) ခုနှစ် တက္ကသိုလ်သပိတ်မှောက် ကျောင်းသားများ စောင့်ရှောက်ရေးအဖွဲ့ဝင် တစ်ဦးအဖြစ်လည်း တာဝန်ယူခဲ့သည်။ ဂျပန်ခေတ် အဓိပတိဒေါက်တာဘမော်အစိုးရ လက်ထက်တွင် အတိုင်ပင်ခံ လွှတ်တော်အမတ်အဖြစ် ထမ်းဆောင်ခဲ့သည်။ စာရေးဆရာ အသင်းနာယကလည်း ဖြစ်သည်။ မြန်မာနိုင်ငံ လုံးဝလွတ်လပ်ရေး ရရှိရန် ကြိုးပမ်းရန်အတွက် ဖဆပလအဖွဲ့ချုပ်ဖွဲ့စည်းသောအခါ ဝင်ရောက်ဆောင်ရွက်သည်။ ဗိုလ်ချုပ်အောင်ဆန်း ခေါင်းဆောင်သော ဖဆပလကြားဖြတ်အစိုးရ အဖွဲ့ဝင်ပြန်ကြားရေး ဝန်ကြီးအဖြစ် တာဝန်ယူခဲ့သည်။ တိုင်းပြုပြည်ပြုလွှတ်တော်တွင် မြန်မာနိုင်ငံ ဖွဲ့စည်းပုံအခြေခံ ဥပဒေရေးဆွဲရေး ကော်မတီအဖွဲ့ဝင်အဖြစ် ဗိုလ်ချုပ်အောင်ဆန်း၊ သခင်မြတို့ နှင့်အတူ အထူးအပင်ပန်းခံ၍ ဆောင်ရွက်ခဲ့သည်။ ချင်းပြည်နယ်၊ ထီးလင်းမြို့တွင် ကျင်းပသော ချင်း-ဗမာချစ်ကြည်ရေးကျောက်တိုင်ဖွင့်ပွဲ အခမ်းအနားသို့ ဗိုလ်ချုပ်အောင်ဆန်း ကိုယ်စားအဖြစ်လည်းကောင်း၊ ပြန်ကြားရေးဝန်ကြီး အနေဖြင့်လည်းကောင်း တက်ရောက်ခဲ့သည်။ (၁၉၊၇၊၁၉၄၇)ရက် နံနက်(၁ဝ)နာရီ၊ (၃၇)မိနစ်တွင် အခြားခေါင်းဆောင် ကြီးများနှင့်အတူ လုပ်ကြံခံရပြီး၊ မွန်းလွဲ(၁)နာရီ(၄၅)မိနစ်တွင် ကွယ်လွန်သည်။


ဦးရာဇတ်(၁၈၉၈-၁၉၄၇)
အမျိုးသားအာဇာနည် ခေါင်းဆောင်ကြီး ဦးရာဇတ်သည် အငြိမ်းစား တိုက်ပိုင်အင်စပက်တော် မစ္စတာ အေရာမန်နှင့် ဒေါ်ညိမ်းလှတို့၏ သားဖြစ်သည်။ ဆရာကြီးကို မိတ္ထီလာ၌ (၁၉၊၁၊ ၁၈၉၈)ရက်နေ့တွင် ဖွားမြင်သည်။ မန္တလေးဝက်စလီ ယောက်ျားလေး ကျောင်းမှ ဆယ်တန်းကို ပါဠိ၊ အင်္ဂလိပ် စာဂုဏ်ထူးတို့ဖြင့် အောင်မြင်ခဲ့သည်။ တက္ကသိုလ်တွင် ပညာသင်နေစဉ် (၁၉၂ဝ)ပြည့်နှစ် တက္ကသိုလ်သပိတ်တွင် ပါဝင်ခဲ့သည်။ အစ္စလာမ်ဘာသာ ကိုးကွယ်သည်။ (၁၉၂၁)ခုတွင် မန္တလေး ဗဟိုအမျိုးသား အထက်တန်းကျောင်းကြီးကို ဦးစီးဖွင့်လှစ်ခဲ့ပြီး ထိုကျောင်း၌ အထက်တန်းပြဆရာလုပ်သည်။ (၁၉၂၂)ခုနှစ်တွင် အမျိုးသား ပညာရေးအဖွဲ့ကြီး၏ ဘီအေစာမေးပွဲကြီးကို အောင်ခဲ့၍ အေရာဇတ်ဘီအေ (နယ်ရှင်နယ်) အမည်ခံခဲ့သည်။ (၁၉၂၂ မှ ၁၉၄၁)ခုနှစ်တိုင် ဗဟိုအမျိုးသားအထက်တန်း ကျောင်းတွင် ကျောင်းအုပ်ဆရာကြီးအဖြစ်ထမ်းရွက်ခဲ့သည်။ ဗဟိုအမျိုးသား အထက်တန်း ကျောင်းအုပ်အဖြစ် ဆောင်ရွက်စဉ် ရဲညွန့်တပ်ဖွဲ့စည်းပြီး ကျောင်းသားလူငယ်များကို စစ်ပညာသင်ပေးရုံမက မျိုးချစ်စိတ်လည်း သွင်းပေးသည်။ (၁၉၃၈) ခုနှစ်တွင် ရွှေဘိုသူ ဒေါ်ခင်ခင်နှင့်လက်ထပ်သည်။ (၁၉၄၅)ခုနှစ်တွင် စစ်အတွင်းက ပိတ်ထားခဲ့ရသော အမျိုးသားကျောင်းကြီးကို ပြန်လည်ဖွင့်လှစ်သောအခါ အမျိုးသားကျောင်းတွင် ဆရာပြန်လုပ်သည်။ အထက်မြန်မာနိုင်ငံလုံးဆိုင်ရာ ဖဆပလအဖွဲ့ ဥက္ကဋ္ဌလည်း ဖြစ်လာသည်။ ဗမာမွတ်စလင်ကွန်ဂရက် (ဗ.မ.က) ဥက္ကဋ္ဌလည်း ဖြစ်ခဲ့သည်။ မြန်မာနိုင်ငံဖွဲ့စည်းပုံအခြေခံဥပဒေရေးဆွဲရေးကော်မတီဝင် တစ်ဦးလည်း ဖြစ်သည်။ ဗိုလ်ချုပ်အောင်ဆန်းဦးဆောင်သော ကြားဖြတ်အစိုးရအဖွဲ့တွင် ပညာရေးနှင့် အမျိုးသားစီမံကိန်းဌာနဝန်ကြီးအဖြစ် တာဝန်ယူနေစဉ် အခြား ခေါင်းဆောင်ကြီးများနှင့် အတူ မသမာသူတို့၏ လက်ချက်ဖြင့် (၁၉၊၇၊၁၉၄၇) ရက်၊ စနေနေ့၊ နံနက်(၁ဝ)နာရီ(၃၇) မိနစ်တွင် လုပ်ကြံခံရပြီး အသက်ဆုံးရှုံးခဲ့သည်။


မန်းဘခိုင်(၁၉ဝ၃-၁၉၄၇)
ကရင်အမျိုးသား အာဇာနည် ခေါင်းဆောင်ကြီး မန်းဘခိုင်သည် ဟင်္သာတမြို့နယ်၊ ယုန်တလင်းရွာဇာတိ ဖြစ်သည်။ အဖယုန်တလင်းရွာ သူကြီး မန်းပေကုန်းနှင့် အမိဒေါ်ပုဖြစ်သည်။ မွေးသက္ကရာဇ်မှာ(၂၆၊၁ဝ၊၁၉ဝ၃) ရက် ဖြစ်သည်။ ဟင်္သာတမြို့ အေဘီအမ် ကျောင်းတွင် ပညာသင်ယူခဲ့ရာ(၁၉၂ဝ) ပြည့်နှစ်တွင် သတ္တမတန်းအောင်သည်။ က ရ င် ဘာသာသင်ကျောင်း တစ်ကျောင်းကို ဦးစီးဖွင့်လှစ်ခဲ့သူတစ်ဦးလည်းဖြစ်သည်။ (၁၉၃၇)ခုတွင် ပုသိမ် မြောက်ပိုင်းမှအမတ်အဖြစ် အရွေးခံရသည်။ (၁၉၃၈)ခုတွင် ပဲခူးသူ ဒေါ်ခင်နီနှင့်လက်ထပ်သည်။ (၁၉၄၁)ခုတွင် တရားရေးဌာနအတွင်းဝန်ဖြစ်ခဲ့သည်။ ဖက်ဆစ်တော်လှန်ရေးတွင်လည်း ပါဝင်ခဲ့ရုံမက ကရင်-ဗမာချစ်ကြည်ရေးကို အထူးဆောင်ရွက်ခဲ့သူ တစ်ဦးလည်း ဖြစ်လာသည်။ ကရင်လူငယ်များ အစည်းအရုံး ဥက္ကဋ္ဌအဖြစ်တင်မြှောက်ခြင်းခံရသည်။ ဗိုလ်ချုပ်အောင်ဆန်းဦးဆောင်သော ကြားဖြတ် အစိုးရအဖွဲ့တွင် စက်မှုလက်မှုနှင့် အလုပ်သမားဝန်ကြီးဌာန ဝန်ကြီးလည်းဖြစ်သည်။ ဗိုလ်ချုပ်အောင်ဆန်းနှင့်အတူ လုပ်ကြံခံရ၍ (၁၉၊၇၊၁၉၄၇)ရက်နေ့တွင် ကွယ်လွန်ခဲ့သည်။


မိုင်းပွန်စော်ဘွားကြီးစပ်စံထွန်း (၁၉ဝ၇-၁၉၄၇)
မိုင်းပွန်စော်ဘွားကြီး စပ်ခွန်ထီးနှင့် မြောက်နန်းဆောင် မဟာဒေဝီနန်းစိန်ဥ တို့၏သား စပ်စံထွန်းသည် (၃၁၊၇၊၁၉ဝ၇) ရက်နေ့တွင်ဖွားမြင်သည်။ တောင်ကြီးမြို့ ရှမ်းစော်ဘွားသားများ အထက်တန်းကျောင်းမှ ဆယ်တန်းအောင်သည်။ မန္တလေးပုလိပ်အတတ်သင်ကျောင်းလည်း တက်ခဲ့ဖူးသည်။ ထို့နောက်ပုလိပ်အရာရှိ အဖြစ် ခေတ္တအမှုထမ်းခဲ့သည်။ (၁၉၂၈) ခုနှစ်တွင် စော်ဘွားအဖြစ်ခံယူလိုက်၍ မိုင်းပွန်စော်ဘွားကြီးဖြစ်လာသည်။ (၁၉၃၂)ခုတွင် မိုးမိတ်စော်ဘွားကြီး၏သမီး စပ်ခင်သောင်းနှင့်လက်ထပ်သည်။ ရှမ်းပြည်နယ်တွင် သိပ္ပံနည်းကျ စိုက်ပျိုးရေးလုပ်ငန်းများ ထွန်းကားလာစေရန် ကြိုးပမ်းခဲ့သူ တစ်ဦးလည်းဖြစ်သည်။ အင်္ဂလန်နိုင်ငံမှ စိုက်ပျိုးရေးဆိုင်ရာ ခေတ်မီစာအုပ်များ၊ ကိရိယာတန်ဆာပလာများနှင့် သီးနှံမျိုးစေ့များကိုပင် မှာယူခဲ့ဖူးသည်။ ဒုတိယကမ္ဘာစစ်ကြီးပြီး၍ အင်္ဂလိပ်များမြန်မာနိုင်ငံသို့ ပြန်ဝင်လာသော် ယင်းနှင့်အတူ ပါလာသော စက္ကူဖြူအုပ်ချုပ်ရေးကို ဆန့်ကျင်ခဲ့သူဖြစ်သည်။ တောင်တန်းနှင့် မြေပြန့်သွေးခွဲ၍ အုပ်ချုပ်သည်ကိုမလိုလား၍ မြေပြန့်နှင့် တောင်တန်းစည်းလုံး ညီညွတ်ရေးအတွက် လုံးပမ်းခဲ့သူဖြစ်သည်။ ထို့ကြောင့်လည်း ပင်လုံစာချုပ်ကို လက်မှတ်ရေးထိုးခဲ့သည့် စော်ဘွားလည်းဖြစ်သည်။ ဗိုလ်ချုပ်အောင်ဆန်း ဦးဆောင်သော ကြားဖြတ်အစိုးရအဖွဲ့တွင် အတိုင်ပင်ခံ တောင်တန်းဒေသရေးရာ ဝန်ကြီးဖြစ်လာသည်။ ထို့ပြင် တိုင်းပြုပြည်ပြုလွှတ်တော်၏ ပြည်ထောင်စုနှင့် ပြည်နယ်ဆိုင်ရာ ဆပ်ကော်မတီ၊ လူနည်းစုဆိုင်ရာ ဆပ်ကော်မတီ၏ ဖွဲ့စည်းပုံ အခြေခံဥပဒေရေးဆွဲရေးကော်မတီများ တွင်အဖွဲ့ဝင်လည်းဖြစ်ခဲ့သည်။ (၁၉၊၇၊ ၁၉၄၇)ရက်နေ့တွင် ဗိုလ်ချုပ်အောင်ဆန်းတို့နှင့် အတူလုပ်ကြံခံရပြီး၊ ဇူလိုင်လ (၂ဝ)ရက်၊ မွန်းတည့်(၁၂)နာရီတွင် ကွယ်လွန်ခဲ့သည်။


ဦးဘဝင်း(၁၉ဝ၁-၁၉၄၇)
နတ်မောက်မြို့ရှေ့နေ ဦးဖာ၊ ဒေါ်စုတို့၏ သားသမီး(၉)ယောက်အနက် ဦးဘဝင်းသည် အကြီးဆုံးသားဖြစ်သည်။ ဗိုလ်ချုပ်အောင်ဆန်း၏အစ်ကို အကြီးဆုံးဖြစ်ပြီး၊ (၁၁၊၆၊၁၉ဝ၁)ရက်နေ့တွင် ဖွားမြင်သည်။ (၁၉၁၄)ခုတွင် နတ်မောက် အလယ်တန်းကျောင်းမှ သတ္တမတန်း အောင်သည်။ မြန်မာလို ကိုးတန်းအောင် ပြီးနောက် အလယ်တန်းဆရာဖြစ် စာမေး ပွဲလည်းအောင်သောအခါ နတ်မောက်၌ပင် ကျောင်းအုပ်ခေတ္တလုပ်သည်။ ထို့နောက် ရေနံချောင်း၌ ကျောင်းဆရာ၊ ဘီအိုစီစာရေးဘဝဖြင့် ကျင်လည်ရင်း အင်္ဂလိပ်စာအလွတ် ပညာသင်ကျောင်းတက်သည်။ (၁၉၂၄)ခုတွင် ရေနံချောင်း အမျိုးသား အထက်တန်းကျောင်းမှ ဆယ်တန်းကို သုံးဘာသာဂုဏ်ထူးဖြင့် အောင်ရုံမက ပထမလည်းရသည်။ (၁၉၂၉)ခုတွင် ရန်ကုန်တက္ကသိုလ်မှ သင်္ချာဂုဏ်ထူးတန်းအောင်၍ ဘီအက်စ်စီ ဘွဲ့ရသည်။ ပထမဆုံးတက္ကသိုလ်ဘွဲ့ရ နတ်မောက်သားလည်း ဖြစ်သည်။ ဘွဲ့ရပြီးနောက် ရေနံချောင်း အမျိုးသားအထက်တန်းကျောင်းတွင် အထက်တန်းပြ ဆရာအဖြစ်လည်းကောင်း၊ ဖြူးမြို့ အမျိုးသား အထက်တန်းကျောင်းတွင် အထက်တန်းပြ ကျောင်းအုပ်အဖြစ်လည်းကောင်း ဆောင်ရွက်ခဲ့သည်။ (၁၉၃၅)ခုတွင် တောင်တွင်းကြီးမြို့မှ ဦးစံ၊ ဒေါ်ရွှေမေတို့၏သမီး ဒေါ်ခင်စောနှင့် လက်ထပ်သည်။ စစ်ပြီးခေတ်တွင် ရေနံချောင်းမြို့နယ် ဖဆပလ ဥက္ကဋ္ဌဖြစ်လာသည်။ (၁၉၄၇)ခုနှစ်တွင် ထောက်ပံ့ရေးနှင့် ကူးသန်းရောင်းဝယ်ရေးဝန်ကြီးအဖြစ် တာဝန်ထမ်းဆောင်သည်။ တိုင်းပြုပြည်ပြုလွှတ် တော်ဖွဲ့စည်းပုံ အခြေခံဥပဒေရေးဆွဲရေး ကော်မတီတွင်လည်း ပါဝင်ခဲ့သည်။ (၁၉၊၇၊ ၁၉၄၇)ရက်၊ စနေနေ့၊ နံနက်(၁ဝ)နာရီ(၃၇)မိနစ်တွင် လုပ်ကြံခံရပြီး ကွယ်လွန်သည်။


ဦးအုန်းမောင်(၁၉၁၃-၁၉၄၇)
ဦးအုန်းမောင်သည် မင်းဘူးမြို့ မစ္စတာ အိပ်ခ်ျဒဗလျုတရပ်(တ်)ဝန်း၊ ဒေါ်ရွှေမြင့် တို့၏ဒုတိယသားဖြစ်သည်။ မွေးသက္ကရာဇ်မှာ (၂၊၂၊၁၉၁၃)ရက်ဖြစ်သည်။ တက္ကသိုလ် ကျောင်းသားဘဝက ရန်ကုန်တက္ကသိုလ် တပ်ရင်းတွင် တပ်ခွဲတပ်ထောက် အဖြစ်ဆောင်ရွက်ခဲ့သည်။ (၁၉၃၄)ခုနှစ် တွင်ဝိဇ္ဇာတန်းအောင်သည်။ (၁၉၃၇)ခု တွင် အိုင်စီအက်(စ်) စာမေးပွဲဖြေသူ (၃)ဦး အနက်ပထမရသည်။ (၁၉၃၉)ခုတွင် မန္တလေးမြို့၊ အရှေ့နယ်ပိုင်ဝန်ထောက် အဖြစ်ဆောင်ရွက်ခဲ့သည်။ (၁၉၄၇)ခုတွင် မြစ်ကြီးနားအရေးပိုင်အဖြစ် ခန့်အပ်ခြင်းခံရသည်။ (၁၉၊၇၊၁၉၄၇)ရက်၊ စနေနေ့၊ နံနက်(၁ဝ)နာရီ၊ (၃၇)မိနစ်တွင်လုပ်ကြံခံရသည်။


ရဲဘော်ကိုထွေး(၁၉၂၉-၁၉၄၇)
မန္တလေးမြို့ တောင်ပြင်သိပ္ပံရပ် ပင်စင်စား လယ်ယာစိုက်ပျိုးရေးဝန်ထောက် ဦးကိုကိုလေး၊ ဒေါ်မင်းရီတို့၏ ဆဋ္ဌမမြောက်သားဖြစ်သည်။ နဝမတန်းအထိ ပညာသင်ကြားခဲ့သည်။ အသက်(၁၈)နှစ်အရွယ်တွင် ပညာရေးဝန်ကြီး ဦးရာဇတ်၏ သက်တော်စောင့်အဖြစ် ခန့်အပ်ခြင်းခံရသည်။ (၁၉၊၇၊ ၁၉၄၇)ရက်၊ စနေနေ့၊ နံနက်(၁ဝ)နာရီိ၊ (၃၇)မိနစ်တွင် အာဇာနည် ခေါင်းဆောင်ကြီးများကို လုပ်ကြံသော မသမာသူတို့၏လက်ချက်ဖြင့်ကျဆုံးရသည်။